ރައީސް މައުމޫން ޢަބްދުލްޤައްޔޫމްގެ ދަނބިދަރިކަލުން މުހައްމަދު ނަދީމްގެ މައްޗަށް ޓެރަރިޒަމް ތުހުމަތުކޮށް ޝަރީޢަތް ނިމެންދެން ބަންދުގައި ބެހެއްޓުމަށް ކުރި އަމުރު އިސްތިއުނާފް ކުރުމަށް ހުށަހަޅާފައިވާ މައްސަލައިގެ އަޑުއެހުމެއް މިއަދު ބޭއްވުމަށް ތާވަލްކޮށްފިއެވެ.
މި މައްސަލަ ތާވަލް ކޮށްފައިވަނި މިއަދު ހެނދުނު 9:15 ގައި ހައިކޯޓުގައެވެ. ނަދީމް މިދިޔަ މަހުގެ 24 ވަނަ ދުވަހު ބަންދުން ދޫކޮށްލީ، އޭނާ ބަންދުގައި ބެހެއްޓުމަށް ކްރިމިނަލް ކޯޓުން ނެރެފައިވާ އަމުރު އެކޯޓުން ބާތިލް ކުރުމުންނެވެ،
ނަދީމް ހައްޔަރުކުރީ މިއަހަރުގެ ފެބްރުއަރީ 1 ވަނަ ދުވަހު ސުޕްރީމް ކޯޓުން ނެރުނު އަމުރު ތަންފީޒް ނުކޮށް ކުއްލި ޙާލަތު އިއުލާނުކުރުމަށް ފަހު ފެބްރުއަރީ 5 ވަނަ ދުވަހުގެ ރޭގަ އެވެ. ގާނޫނުއަސާސީ އާއި ގާނޫނުތަކާއި އުސޫލުތަކުގެ ބޭރުން، ވެރިކަން ބަދަލުކޮށް، ދައުލަތަށާއި ސަރުކާރަށް ނޭދެވޭ ނުފޫޒު ފޯރުވައި، އާންމުންގެ ސަލާމަތަށް ނުރައްކާތެރިވާ ފަދަ ހާލަތެއް ނަދީމު މެދުވެރި ކުރުވާފައިވާ ކަމަށް ވެސް އޭނާގެ މައްޗަށް އުފުލި ދައުވާގައި ބުނެފައި ވެއެވެ.
މިއަދު ބާއްވަނީ ނަދީމް ބަންދުކުރުމަށް ކްރިމިނަލް ކޯޓުން ނެރުނު އަމުރަކީ ބާތިލް އަމުރެއްކަމަށް ކަނޑައަޅައިދިނުމަށް ހައިކޯޓަށް ހުށަހަޅާފައިވާ މައްސަލައިގެ އަޑުއެހުމެއް ކަމަށް މައުލޫމާތު ލިބެއެވެ. އެއަމުރަކީ ފުރަތަމަ ދުވަހުން ފެށިގެންވެސް ނެރެވޭނެ އަމުރެއް ނޫން ކަމަށް ނަދީމްގެ ޤާނޫނީ ވަކީލް އިބްރާހީމް ޝަމީލް ވިދާޅުވެއެވެ.