ސްޕެނިޝް ލީގުގައި ރޭ ކުޅުނު މެޗުގައި ރަށުން ބޭރުގައި އެންމެ ފަހު ވަގުތު ކާމިޔާބުކުރި ލަނޑުން ޑިޕޯޓިވޯ އަލަވޭސް އަތުން ރެއާލް މެޑްރިޑް ބަލިވެ އެޓީމުގެ ކޯޗު ހުލެން ލޮޕެޓީގަށް މައްސަލަތަކާއި ކުރިމަތިލާން ޖެހިއްޖެއެވެ.
މިއީ ރެއާލް އެންމެ ފަހުން ކުޅުނު ހަތަރު މެޗުގެ ތެރެއިން ބަލިވި ތިންވަނަ މެޗަށްވާއިރު ލީގުގައި އެޓީމަށް އެންމެ ފަހުން މޮޅެއް ހޯދިފައިވަނީ މިދިޔަ ސެޕްޓެންބަރު މަހުގެ 22 ވަނަ ދުވަހު އެސްޕަންޔޯލް އަތުންނެވެ.
މީގެއިތުރުން، މިއީ 1931 ވަނަ އަހަރުގެ ފަހުން ލީގުގައި ރެއާލް އަތުން އަލަވޭސް މޮޅުވި ފުރަތަމަ މެޗެވެ.
އަލަވޭސްގެ ދަނޑުގައި ކުޅުނު މިމެޗުގެ ފުރަތަމަ ހާފުގެ ކުރީކޮޅު ރެއާލްގެ ކަރީމް ބެންޒެމާ އާއި ޑެނީ ސެބަޔޯސް ފޮނުވާލި ބޯޅަތައް އަލަވޭސްގެ ގޯލްކީޕަރު ފެނާންޑޯ ޕަޗޭކޯ ފްލޮރޭސް މަތަކުރިއިރު މިމެޗުގައި ލިބުނު އެންމެ ރަނގަޅު އެއް ފުރުޞަތު ބެންޒެމާ އަށް ލިބުމުން އޭނާ ބޮލުން ފޮނުވާލި ނަމަވެސް އަލަވޭސްގެ ކުޅުންތެރިން ވަނީ ސަލާމަތްކޮށްފައެވެ. އޭގެފަހުން ރެއާލްގެ ނާޗޯ ފެނާންޑޭޒް އާއި ގަރެތު ބޭލް ފޮނުވާލި ހަމަލާތައް ގޯލަށް އަމާޒުވާގޮތެއްނުވިއެވެ.
މިހާފުގައި އަލަވޭސް އަށް މާގިނަ ފުރުޞަތުތަކެއް ލިބިފައިނުވާއިރު ރެއާލްގެ ގޯލަށް އަމާޒުކޮށް އެންމެ ހަމަލާއެއްވެސް ފޮނުވާލެވިފައެއްނުވެއެވެ. މިމެޗުގެ ފުރަތަމަ ހާފު ނިމުނީ ދެޓީމަށް ލަނޑެއްނުޖެހި އެއްވަރުވެގެންނެވެ.
ރެއާލުން ދެވަނަ ހާފަށް ނިކުތްއިރު ކޯޗު ލޮޕެޓީގު ވަނީ ފްރާންސްގެ ފޯވާޑް ބެންޒެމާގެ ބަދަލުގައި މަރިއާނޯ ޑިއާޒް ކުޅެން ނެރެފައެވެ.
ދެވަނަ ހާފުގައި ރެއާލުން ވަނީ ގިނަ ފުރުޞަތުތަކެއް ތަނަވަސްކޮށް އަލަވޭސްގެ ގޯލަށް އަމާޒުކޮށް ނުރައްކާތެރި ގިނަ ހަމަލާތަކެއް ފޮނުވާލައިފައެވެ. ނަމަވެސް، މިހުރިހާ ހަމަލާތަކެއް ނާކާމިޔާބުކުރުމުގައި އަލަވޭސްގެ ކީޕަރު ޕަޗޭކޯ ވަނީ މޮޅު ކުޅުމެއް ދައްކާފައެވެ. އެގޮތުން، ރެއާލްގެ ބްރެޒިލް މިޑްފީލްޑަރު ކަސެމީރޯ އާއި މަރިއާނޯ ޑިއާޒް އަދި ގަރެތު ބޭލް ފޮނުވާލި ހަމަލާތައް ވެސް އަލަވޭސްގެ ކީޕަރު ޕަޗޭކޯ މަތަކުރިއެވެ.
މިހާފުގައި އަލަވޭސް އަށް ލަނޑުޖެހުމަށް ލިބުނު ފުރުޞަތުތަކުގައި އެޓީމުގެ ރުބެން ޑުއާޓޭ އާއި ޖޮނަތަން ކަލޭރީ އަދި ރުބެން ސޮބްރީނޯ ފޮނުވާލި ހަމަލާތައް ރެއާލްގެ ގޯލްކީޕަރު ތިބައުޓް ކޯޓުއާ ވަނީ މަތަކޮށްފައެވެ.
މިމެޗުގެ 80 ވަނަ މިނެޓުގައި ރެއާލްގެ ވޭލްސް ވިންގާ ބޭލް އަށް ވަނީ އަނިޔާވެގެން ބަދަލުކޮށްފައެވެ. އޭނާގެ ބަދަލުގައި ކުޅެން ނިކުތީ ބްރެޒިލްގެ ޒުވާން ކުޅުންތެރިޔާ ވިނީޝިއަސް ޖޫނިއާ އެވެ.
އަލަވޭސް އިން ކާމިޔާބުކުރި ހަމައެކަނި ލަނޑު، މެޗުގެ އިތުރުވަގުތުގެ ފަސްވަނަ މިނެޓުގައި ޖަހައިދިނީ މަނޫ ގާސިއާ އެވެ. މިއީ އަލަވޭސްގެ ކުޅުންތެރިއަކު ނަގައިދިން ކޯނަރަކުން ލިބުނު ބޯޅައެއް ބޮލުން ފޮނުވާލައިގެން އޭނާ ކާމިޔާބުކުރި ގޯލެކެވެ.
މިމެޗުން މޮޅުވެ އަލަވޭސް ވަނީ ޕޮއިންޓްގެ ގޮތުން ރެއާލް އަދި ބާސެލޯނާ އާ އެއްވަރުވެފައެވެ. ނަމަވެސް، ފައިދާ ގޯލްގެ ތަފާތުން އަދިވެސް ކުރީގައި އުޅެނީ ބާސާ އެވެ. މި ތިން ޓީމަށް ވެސް ލިބިފައިވަނީ 14 ޕޮއިންޓެވެ.
މިމުބާރާތުގައި އިއްޔެ ކުޅުނު މެޗުތަކުގެ ނަތީޖާއަށް ބަލާއިރު، އެއިބާ އަތުން 3-2 އިން ޖިރޯނާ ބަލިވިއިރު ލެވާންޓޭ ވަނީ ރަށުން ބޭރުގައި ގެޓަފޭ އަތުން 1-0 މޮޅުވެފައެވެ. ރަޔޯ ވަޔެކާނޯ އަތުން އަމިއްލަ ދަނޑުގައި ލެގަނޭސް 1-0 އިން މޮޅުވިއިރު ހުކުރު ދުވަހުގެ ރޭ ކުޅުނު މެޗުގައި ރެއާލް ސޮސިއެޑާޑް ވަނީ ރަށުން ބޭރުގައި 3-1 އިން އެތުލެޓިކް ބިލްބާއޯ ބަލިކޮށްފައެވެ.