އިންތިހާބީ ރައީސް އިބްރާހިމް މުހައްމަދު ސޯލިހު، އިބޫއަށް މަރުހަބާ ދެންނެވުމަށް އިނގިރޭސިވިލާތުގެ ފޮރިން އެންޑް ކޮމަންވެލްތް އޮފީހުގެ މިނިސްޓަރު، މާކް ފީލްޑް ރާއްޖެ ވަޑައިގެންފި އެވެ.
މާކް ފީލްޑް މިއަދު ހެނދުނު ރާއްޖެ ވަޑައިގެންނެވި އިރު އޭނާގެ އަރިހުގައި އިނގިރޭސިވިލާތުން ލަންކާ، ރާއްޖެއަށް ކަނޑައަޅުއްވާފައި ހުންނަ ސަފީރު ޖޭމްސް ޑައުރިސް ބައިވެރިވެ ވަޑައިގެންނެވި އެވެ. އެބޭފުޅުންނަށް އެއާޕޯޓުން މަރުހަބާ ވިދާޅުވީ، ފޮރިން ސެކެޓްރީ އަހުމަދު ސަހީރެވެ.
މާކް ފީލްޑް އިބޫއާ ބައްދަލު ކުރައްވަން ހަމަޖެހިފައި ވަނީ، މިއަދު ހެނދުނު 10:00 އެވެ. އޭނާ އިބޫއާ ބައްދަލު ކުރައްވަނީ އިބޫގެ ކެމްޕޭން ހެޑްކުއާޓަރު ސައިންޓްރީ އިމާާރާތުގެ ފަސްވަނަ ފަންގިފިލާގަ އެވެ. އިނގިރޭސިވިލާތުން މީގެ ކުރިން ވެސް ވަނީ ބަޔާނެއް ނެރެ އިބޫއަށް މަރުހަބާ ކިޔައިފަ އެވެ.
މާކް ފީލްޑްގެ މި ދަތުރުފުޅުގައި އާ ސަރުކާރާ އެކު އިތުރަށް ގުޅުން ބަދަހި ކުރުމާ މެދު މަޝްވަރާ ކުރާނެ ކަމަށް ފޮރިން އޮފީހުން ނެރުނު ބަޔާނުގައި ބުނެފައިވެއެވެ. އަދި ސިޔާސީ އެކި ފަރާތްތަކާއި މަދަނީ ޖަމްއިއްޔާތަކާ ވެސް ބައްދަލު ކުރައްވާނެ ކަމަށް ބަޔާނުގައިވެ އެވެ. އަދި ވަކީލުންނާ ބައްދަލު ކުރައްވާ ޑިމޮކްރަސީ އާއި ހެޔޮވެރިކަމަށް ރާއްޖޭގައި ކުރިއެރުވުމަށް ދެވޭނެ އެހީތައް ދެނެ ގަންނާނެ ކަމަށް ވެސް ވެއެވެ. މީގެ އިތުރަށް ފޮރިން މިނިސްޓަރު މުހައްމަދު އާސިމްއާ ވެސް ބައްދަލު ކުރައްވަން ވަނީ ހަމަޖެހިފަ އެވެ.