ދެކުނު އަދި ސެންޓްރަލް އޭޝިއާގެ ކަންތައްތައް ބެލެހެއްޓުމަށް އެމެރިކާއިން ގާއިމްކޮށްފައި ހުންނަ ބިއުރޯގެ ޑެޕިއުޓީ އެސިސްޓެންޓް ސެކެރެޓަރީ އެލިސް ވެލްސް ރަސްމީ ދަތުރުފުޅެއްގައި ރާއްޖެ ވަޑައިގަންނަވާ ގޮތަށް ހަމަޖެހިއްޖެ އެވެ. އެލިސްގެ ދަތުރުފުޅުގައި އަވައްޓެރި ސްރީލަންކާއަށް ވެސް ވަޑައިގަންނަވާނެއެވެ.
ރާއްޖެއާއި ލަންކާއަށް ތިންދުވަހުގެ ދަތުރުފުޅެއް އެލިސް ފައްޓަވާ ގޮތަށް ހަމަޖެހިފައިވަނީ މިމަހުގެ ނުވަ ވަނަ ދުވަހުއެވެ. މި ދަތުރުފުޅުގައި ރާއްޖެއަށް ވަޑައިގެން ސަރުކާރުގެ އިސްވެރިންނާ ބައްދަލުކުރައްވާނެ ކަމަށް އެމެރިކާ ސަރުކާރުން ވަނީ ހާމަކޮށްފަ އެވެ. އަދި އިންތިހާބީ ރައީސް އިބްރާހިމް މުހައްމަދު ސޯލިހް (އިބޫ) އާ ބައްދަލުކުރައްވާ އެމަނިކުފާނަށް މަރުހަބާ ދެންނެވުމުގެ ހާއްސަ ބައްދަލުވުމެއް ބޭއްވުމަށް ހަމަޖެހިފައިވާކަމަށް ވެސް ވަނީ ހާމަކޮށްފަ އެވެ.
އެލިސް ވެލްސްގެ މި ދަތުރުފުޅުގައި ރާއްޖެ، ލަންކާ އަދި އެމެރިކާގެ ގުޅުން ހަރުދަނާކޮށް، އިންޑިއާ ކަނޑުގެ ސުލްހަ ދެމެހެއްޓުމަށްޓަކައި އެމެރިކާގެ ރޯލު ފުޅާކުރުމާ ބެހޭގޮތުން ވެސް މަޝްވަރާކުރެވިގެންދާނެއެވެ.
އެމެރިކާގެ ސަރަހައްދީ ސަފީރު ރާއްޖެ ވަޑައިގެންނެވުމަށް ހަމަޖެހިފައިވާއިރު، އެމެރިކާއިން ވަނީ މިދިޔަ މަހު ރާއްޖޭގައި ބޭއްވި ރިޔާސީ އިންތިހާބާ މެދު ހިތްހަމަޖެހުން ފާޅުކޮށް، އިންތިހާބުން ކާމިޔާބު ހޯއްދެވި އިބްރާހިމް މުހައްމަދު ސޯލިހަށް މަރުހަބާ ކިޔާފަ އެވެ. އަދި ދިފާއީ ކަންކަމާއި އަމާންކަމާއި ޑިމޮކްރަސީ ކުރިއެރުވުމަށްޓަކައި އާ ސަރުކާރާއެކު ގުޅުން ވަރުގަދަ ކުރުމުގެ ޝައުގުވެރިކަން ވެސް ފާޅުކޮށްފަ އެވެ.
ވެލްސް ރާއްޖެ ވަޑައިގަންނަވަން ހަމަޖެހިފައިވާއިރު، ރިޔާސީ އިންތިޚާބަށް ފަހު އެމެރިކާގެ އިތުރުން ބޭރުގެ ބައެއް ގައުމުތަކުގެ ޑިޕްލޮމެޓުން ދަނީ ރާއްޖެ ވަޑައިގަންނަވަމުންނެވެ. އެގޮތުން އާދީއްތަ ދުވަހު އިނގިރޭސިވިލާތުގެ ފޮރިން އެންޑް ކޮމަންވެލްތް އޮފީސް ފޯ އޭޝިއާ ޕެސިފިކް މާކް ފީލްޑް ވެސް ރާއްޖެ ވަޑައިގެންނެވި އެވެ.