އައްޑޫ ސިޓީ މަރަދޫ ފޭދޫގައި ހޮނިހިރު ދުވަހުގެ ރޭ ހިންގި މާރާމާރީއެއްގައި ތޫނު އެއްޗަކުން ހަމަލާދިނުމުގެ ސަބަބުން ހާލު ސީރިއަސްވި މުހައްމަދު އީވާންގެ ފުއްޕާމޭގެ އޮޕަރޭޝަނެއް ކޮށްފި އެވެ.
އައިޖީއެމް ހޮސްޕިޓަލްގައި ފަރުވާ ދެމުންދާ އީވާންގެ ފުއްޕާމޭގެ އޮޕަރޭޝަން ކުރީ ރޭ މެންދަމުގެ ވަގުތެއްގައެވެ.
އެ އޮޕަރޭޝަން ކުރީ ވަޅިޖެހުމުގެ ސަބަބުން ފުއްޕާމެއަށް އެޅިފައިވާ ލޭ ސާފު ކުރުމަށާއި ފުއްޕާމޭގެ ހޮޅިއަކަށް ލިބިފައިވާ ގެއްލުން ރަނގަޅު ކުރުމަށެވެ. އެ އޮޕަރޭޝަން ގާތްގަނޑަކަށް ހަތަރު ގަޑިއިރަށް ދިގުދެމިގެންދިޔަ ކަމަށް އީވާންގެ އާއިލާއިން ބުނެ އެވެ.
އޮޕަރޭޝަނަށް ފަހު އީވާންގެ ހާލު ކުޑަކޮށް ރަނގަ ކަމަށާއި މިހާރު ވެސް އޮތީ އައިސީޔޫގައި ކަމަށް އޭނާގެ އާއިލާއާއި ހަވާލާދީ ރިޕޯޓްތައް ބުނެއެވެ.
އީވާން އަށް ހަމަލާ ދިނީ ރައްޓެހި ބަޔަކާ ބައްދަލު ކުރަން މަރަދޫ ފޭދޫއަށް ގޮސް އުޅެނިކޮށެވެ. މަރަދޫ ފޭދޫ ބޮޑުމަގުގައި ހުރި މިސްކިތެއް ކައިރީގައި އީވާން ހުއްޓާ 16 މީހުންގެ ގްރޫޕަކުން އޭނާ އަށް ހަމަލާދިން ކަމަށް އާއިލާ އިން ބުނެ އެވެ.
އީވާންގެ ބުރަކަށްޓަށާއި، ކަރަށް އަދި ބޮލަށް ވެސް ވަނީ ތޫނު އެއްޗަކުން ހަމަލާދީފައި ކަމަށެވެ. މި މާރާމާރީއާ ގުޅިގެން މިހާތަނަށް ހަ މީހަކު ހައްޔަރުކޮށްފައިވާއިރު، އޭގެ ތެރެއިން 17 އަހަރުގެ ކުޑަ ކުއްޖަކު ވެސް ހިމެނެ އެވެ.