ގުޅިފައިވާ ޕާޓީތަކުން މަޖިލިސް އިންތިހާބަށް ނުކުންނާނީ ގުޅިގެން ކަމަށާއި މަޖިލިސް އިންތިހާބު ވެސް ބޮޑުތަކުން ކާމިޔާބު ކުރާނީ ކޯލިޝަނުން ކަމަށް ރައްޔިތުންގެ މަޖިލީހުގެ ކިނބިދޫ ދާއިރާގެ މެމްބަރު އަބްދުﷲ ރިޔާޒު ވިދާޅުވެއްޖެއެވެ.
ރިޔާޒު ވިދާޅުވީ މަޖިލީހުގެ މެޖޯރިޓީ މިހާރު ވެސް އޮތީ ގުޅިފައިވާ ޕާޓީތަކަށް ކަމަށެވެ. އެގޮތުން 12 މެމްބަރުންގެ ތެރެއިން ހަތަރު މެމްބަރެއްގެ ގޮނޑީގެ ސައްހަކަން ކަށަވަރުވުމުން ގުޅިފައިވާ ޕާޓީތަކަށް ވަރަށް ބޮޑު ހިތްވަރެއް ލިބިއްޖެ ކަމަށްވެސް އޭނާ ވިދާޅުވިއެވެ. އަދި ވިދާޅުވީ ވާކީ ތިއްބެވި އަށް މެމްބަރުންގެ ގޮނޑީގެ ސައްހަކަން ސުޕްރީމް ކޯޓުން ކަށަވަރު ކުރުމާއެކު މަޖިލީހުގެ ރައީސް އަބްދުﷲ މަސީހުގެ މައްޗަށް އިތުބާރު ނެތް ކަމުގެ ވޯޓު އަނެއްކާވެސް ހުށަހަޅުއްވާނެ ކަމަށެވެ.
މަޖިލީހުގެ މެޖޯރިޓީއަށް މެމްބަރުން ތަބާވެވަޑައިގެން، މަސީހު އިސްތިއުފާ ދެއްވަން ޖެހޭ ކަމަށް ރިޔާޒް ވިދާޅުވިއެވެ. އެންމެ ރީތި ގޮތަކީ އެއީ ކަމަށެވެ. މަސީހު މަގާމުން އިސްތިއުފާ ދެއްވުމަށް ގުޅިފައިވާ ޕާޓީތަކުން ވެސް އޭނާއަށް ދަންނަވާފައިވާނެ ކަމަށާއި އިންތިހާބީ ރައީސް ސޯލިހު އެދިވަޑައިގަތުމަކީ ވެސް އެއީ ކަމަށް ރިޔާޒު ވިދާޅުވިއެވެ.
"އަޅުގަނޑު އުންމީދު ކުރަނީ މަސީހު އަވަހަށް އިސްތިއުފާ ދެއްވާނެ ކަމަށް. ވަރަށް ޑިޕްލޮމެޓިކްކޮށް ވެސް އެމަނިކުފާނަށް ދަންނަވައިފިން. އެއީކަން އިންތިހާބީ ރައީސް ވެސް ބޭނުންފުޅުވާ ގޮތަކީ އެބޭފުޅާ ރީތިކޮށް އިސްތިއުފާ ދެއްވުންކަން،" ރިޔާޒު ވިދާޅުވިއެވެ.