ޕީޕީއެމްގެ ޕާލިމެންޓްރީ ގްރޫޕްގެ ޑެޕިއުޓީކަމުން ވިލުފުށީ ދާއިރާގެ މެމްބަރު ރިޔާޒު ރަޝީދު ވަކިކުރުމުގެ މަސައްކަތް އެޕާޓީން ފަށައިފިއެވެ.
އިތުބާރު ހުރި ގޮތަކަށް މައުލޫމާތު ލިބިފައިވާ ގޮތުގައި މިއަދު އެޕާޓީން ބޭއްވި ޕީޖީ ގްރޫޕު ބައްދަލުވުމެއްގައި މެމްބަރަކު ވަނީ ރިޔާޒު އެމަގާމުން ވަކިކުރުމަށް ހުށަހަޅާފައެވެ. އަދި އެކަން ރައީސް އަބްދުﷲ ޔާމީނަށް ހުށަހަޅައި، ރައީސްގެ ހުއްދަ ލިބިވަޑައިގަތުމާއި އެކު މެމްބަރުންގެ ވޯޓަކުން ރިޔާޒު ވަކި ކުރުމަށް ވަނީ ނިންމާފައެވެ.
Alhamdhulillah, Maruh’abaa Brother Dr.Jameel !!! pic.twitter.com/WAaDqN2mNh
— Riyaz Rasheed (@riyaz_rasheed) October 6, 2018
ރިޔާޒު ޕީޖީ ގްރޫޕްގެ ޑެޕިއުޓީއަކަށް ހޮވާފައިވަނީވެސް ޕީޖީ ގްރޫޕްގެ މެމްބަރުން ވޯޓު ދެއްވައިގެންނެވެ.
ރިޔާޒު ޕީޖީގެ ނައިބު ކަމުން ވަކިކުރަން ހުށަހެޅީ ދާދި ފަހުން ޖުމްހުރީ ޕާޓީގެ ލީޑަރ ގާސިމް އިބްރާހިމް އާއި ކުރީގެ ނައިބް ރައީސް ޑރ. ޖަމީލް ރާއްޖެ ވަޑައިގެންނެވުމާއި ގުޅިގެން އެ ބޭފުޅުންނަށް މަރުހަބާ ދެންނެވުމާއި ގުޅިގެންނެވެ.
މިކަމާއި ގުޅިގެން ރިޔާޒުވަނީ މީޑިއާތަކަށް ޖަވާބު ދެއްވާފައެވެ. ރިޔާޒު ވިދާޅުވީ އިންތިހާބަށްފަހު އެމަނިކުފާން ހުންނެވީ ވަރަށް މާޔޫސްވެފައިކަމަށާއި، ރިޔާސީ އިންތިހާބުގެ ނަތީޖާ މިގޮތަށް ނިކުންނަން ޖެހޭ ސަބަބެއް ނުވިސްނޭކަމަށެވެ.
ރިޔާޒު ވިދާޅުވީ އޭނާ އާއި މެދު ފިޔަވަޅު އެޅުމުގެ ކުރިން ޕާޓީން ވާހަކަ ދައްކަން ޖެހޭ ކަމަށެވެ. ރިޔާޒު ފަހަކަށް އައިސް ޕީޕީއެމްގެ ހަރަކާތްތަކުން ފެއަށް ޖެހިވަޑައިގެންނެވެ. އެކަމާއި ގުޅިގެންވެސް ޕީޕީއެމްގެ ބައެއް މެމްބަރުން ދަނީ ރިޔާޒުއަށް ފާޑު ކިޔަމުންނެވެ.