ނުރައްކާތެރި މާރާމާރީތައް ހުއްޓުވުމަށާއި އެ ފަދަ އަމަލުތައް ހިންގާ ފަރާތްތައް ހޯދައި އެފަދަ ކުށްތައް މަދު ކުރުމުގެ މަސައްކަތްތައް ކުރަމުންދާ ކަމަށް ފުލުހުން ބުނެފިއެވެ.
މިކަން ފުލުހުން ހާމަކުރައްވާފައިވަނީ ފުލުހުން ނެރުނު ބަޔާނެއްގައެވެ. އެ ބަޔާނުގައި ބުނެފައި ވަނީ މި ހަފްތާތެރޭގައި އައްޑޫ އަދި މާލޭގައި ހިންގި މާރާމާރީ ފުލުހުން ދަނީ ތަހުގީގު ކުރަމުން ކަމަށެވެ.
ބުދަ ދުވަހުގެ ރޭ ހިންގި ވަޅިހަރައި ޒަހަމްކޮށްލި 14 އަހަރުގެ ކުއްޖާ ވަނީ މަރުވެފައެވެ. ގަލޮޅު އޮޓޯ ގަރާޖު ކުރިމަތިން ވަޅިން ހަމަލާ ދިނުމުގެ ސަބަބުން ފަރުވާ ދެމުން ދަނިކޮށް މަރުވެފައިވަނީ ސ. ފޭދޫ، ހީނާމާގެ، ޝައްފާން އިސްމާއިލް އެވެ.
ބުދަ ދުވަހުގެ ރޭ މެންދަމު 14 އަހަރުގެ ކުއްޖަކަށް ހަމަލާދީ ޒަހަމްކޮށްލާފައިވާއިރު، ބުދަ ދުވަހުގެ ހެނދުނު ވެސް ވަނީ ވަޅިން ހަމަލާދީ ޒުވާނަކު ޒަހަމްކޮށްލާފައެވެ. އަދި ހޯމަ ދުވަހުގެ ރޭ ކަރަށް ވަޅި ހެރުމުން ލިބުނު އަނިޔާތަކުގައި ޒަހަމްވި ޒުވާނާ ވެސް ވަނީ ސީރިއަސް ހާލަތެއްގައެވެ.
އައްޑޫ ސިޓީގައި ވަޅިން ހަމަލާދީ ޒަހަމްކޮށްލި ޒުވާނާ އަށް އައިޖީއެމްއެޗްގައި ފަރުވާ ދެމުންދާއިރު އޭނާގެ ހާލު ވެސް ސީރިއަސްއެވެ. ވަރަށް ގާތްގާތުގައި ހިންގަމުންދާ މާރާމާރީތަކުގެ ސަބަބުން ގިނަބައެއްގެ ހިތްތަކަށް ވަނީ ބިިރުވެރިކަން ވެރިިވެފައެވެ.
ނުރައްކާތެރި މާރާމާރީތައް ކުރާ ފަރާތްތަކުގެ މައްސަލަ ތަހުގީގުކޮށް އެފަދަ ފަރާތްތަކަށް ގާނޫނީ ގޮތުން އެޅޭނެ އެންމެ ހަރުކަށި ފިޔަވަޅު އަޅާނެ ކަމަށް ފުލުހުން ނެރުނު ބަޔާނުގައި ވަނީ ބުނެފައެވެ.