މިދިޔަ މަހު މޯލްޑިވްސް އިންލެންޑް ރެވެނިއު އޮތޯރިޓީ (މީރާ) މެދުވެރިކޮށް ދައުލަތަށް 1.3 ބިލިއަން ރުފިޔާ ލިބިއްޖެ އެވެ.
މިކަން ހާމަކޮށްފައިވަނީ މީރާއިން އާންމުކުރި މިދިޔަ މަހުގެ ތަފާސް ހިސާބުތަކުންނެވެ.
އެ ތަފާސްހިސާބުތަކުން ދައްކާ ގޮތުން މިދިޔަ މަހު ލިބުނު 1.3 ބިލިއަން ރުފިޔާއަކީ މިދިޔަ މަހު ލިބޭނެ ކަމަށް ލަފާކުރި އަދަދަށް ވުރެ އަށް ޕަސެންޓް މަދު އަދަދެކެވެ. އެހެން ނަމަވެސް އެއީ މިދިޔަ އަހަރުގެ ސެޕްޓެމްބަރު މަހާ އަޅާ ބަލާއިރު 25 ޕަސެންޓް އިތުރު އަދަދެއް ކަމަށް މީރާއިން ބުނެއެވެ. އޭގެ ތެރެއިން 915 މިލިއަން ރުފިޔާ ލިބުނީ އެމެރިކާ ޑޮލަރުންނެވެ. އެއީ 59.4 މިލިއަން ޑޮލަރެވެ.
އެ ހިސާބުތައް ދައްކާ ގޮތުން ލިބުނު އާމްދަނީގެ އެންމެ ބޮޑު ޕަސެންޓަކީ މުދަލާއި ޚިދުމަތުގެ އަގުން ނަގާ ޓެކްސް ނުވަތަ ޖީއެސްޓީ އެވެ. ޖީއެސްޓީގެ ގޮތުގައި 500 މިލިއަނަށް ވުރެ ގިނަ ރުފިޔާ ވަނީ ލިބިފައެވެ. ދެވަނަ އަށް އެންމެ ގިނައީ ޓޫރިޒަމް ލޭންޑް ރެންޓްގެ ގޮތުގައި ލިބުނު ފައިސާ އެވެ. ޓޫރިޒަމް ލޭންޑް ރެންޓްގެ ގޮތުގައި 326 މިލިއަނަށް ވުރެ ގިނަ ރުފިޔާ ލިބިފައިވެއެވެ.
މިދިޔަ އަހަރުގެ ސެޕްޓެމްބަރު މަހަށް ވުރެ މިދިޔަ މަހުު އާމްދަނީ އިތުރުވީ ޓޫރިޒަމް ލޭންޑް ރެންޓާއި ލޭންޑް އެކުއިޒިޝަން އެންޑް ކޮންވާޝަން ފީގެ ގޮތުގައި ފައިސާ އިތުރުވުމުން ކަމަށް މީރާއިން ބުންޏެވެ. އެކަމަކު ލޭންޑް ރެންޓް ދެއްކުން ބައެއް ފަރާތްތަކުން ފަސް ކޮށްފައިވާތީ ލަފާކުރި ވަރަށް ވުރެ މިދިޔަ މަހުގެ އާމްދަނީ ދަށްވީ ކަމަށް މީރާއިން ބުންޏެވެ.