ރިޔާސީ އިންތިހާބުގެ ވޯޓު ކަރުދާސް ޗާޕް ކުރި، އެމް ސެވަން ޕްރިންޓާސްގެ މުވައްޒަފުން ކޯޓުގައި ހެކިބަސް ދިނުމަށް އެދި ޕީޕީއެމްގެ ބައެއް އިސް ބޭފުޅުން ފައިސާގެ ބޮޑެތި އަދަދުތަކުން ރިޝްވަތު ހުށަހެޅި ކަމަށް ބުނާ މައްސަލަ ފުލުހުންނަށް ހުށަހަޅައިފި އެވެ.
އެމް ސެވަންގެ އިސް އޮފިޝަލަކާއި ހަވާލާދީ އޮންލައިން ނޫސް "މިހާރު" އިން ރިޕޯޓްކޮށްފައިވާ ގޮތުގައި ވޯޓު ކަރުދާހުގައި މައްސަލަތަކެއް ހުންނާނެ ކަމަށް ބުނެ ކޯޓުގައި ހެކިބަސް ދިނުމަށް އެ ކުންފުނީގެ ގިނަ މުވައްޒަފުންތަކަކަށް ރިޝްވަތު ދިނުމަށް މަސައްކަތް ކޮށްފައިވެއެވެ. އޭގެ ތެރެއިން ދިވެހި މުވައްޒަފުންނަށް އެއް މިލިއަން ރުފިޔާ ހުށަހެޅިއިރު ބިދޭސީ މުވައްޒަފުންނަށް 40،000 ޑޮލަރު ހުށަހެޅި ކަމަށް އޭނާ ވިދާޅުވި ކަމަށް ވެސް އެ ނޫހުގައި ބުނެފައިވެއެވެ.
އެ މައްސަލަ އެ ކުންފުނީގެ ފަރާތުން ފުލުހުންނަށް ހުށަހެޅީ މިދިޔަ އާދިއްދަ ދުވަހު އެވެ.
ރިޝްވަތު ހުށަހެޅި މީހުންގެ ތެރޭގައި ހިމެނެނީ ޕީޕީއެމްގެ މަޖިލިސް މެމްބަރުންނާއި ދައުލަތުގެ އިސް މަގާމުތަކުގައި ތިއްބެވި ބޭފުޅުން ކަމަށް އެ އޮފިޝަލް ވިދާޅުވެފައިވާ ކަމަށް މައުލޫމާތު ލިބެއެވެ.
މުވައްޒަފުންނަށް ވަނީ ބިރު ދައްކާފައި އެ ވާހަކަ ނުދެއްކުމަށް ބުނެފައި ކަމަށާއި މުވައްޒަފުން ރޮއެފައި އެ ބޭފުޅުންނަށް އެ ވާހަކަތައް ކިޔައިދީފައިވާ ކަމަށް އެމް ސެވަން އިސް މުވައްޒަފަކު ވިދާޅުވެފައިވާ ކަމަށް އެ މުވައްޒަފާއި ހަވާލާދީ މިހާރު ނޫހުގައި ބުނެފައިވެއެވެ.
ގިނަ އަދަދެއްގެ ފައިސާ ހުށަހެޅި ނަމަވެސް އެ ކުންފުނީގެ އެއްވެސް މުވައްޒަފަކު ރިޝްވަތު ހިފާފައި ނުވާ ކަމަށް އެ ފަރާތުން ބުނެފައިވާ ކަމަށް މިހާރު ނޫހުން ބުނެއެވެ.
ވޯޓު ކަރުދާސް ޕްރިންޓް ކުރި ކުންފުނީގެ މުވައްޒަފުންނަށް ރިޝްވަތު ދޭން އުޅުނު ކަމަށް ބުނާ މައްސަލައެއް ފެންމަތިވެފައިވާއިރު އިންތިހާބު ނާކާމިޔާބުވި ރައީސް އަބްދުﷲ ޔާމީންގެ ފަރާތުން އިއްޔެ ވަނީ އިންތިހާބާ ގުޅޭ ދުސްތޫރީ މައްސަލައެއް ސުޕްރީމް ކޯޓަށް ހުށަހަޅައިފަ އެވެ. އަދި އެ މައްސަލަ މިހާރު ވަނީ ކޯޓަށް ބަލައިގެންފަ އެވެ.