ޑރ. ޝަމީމަކީ ވަރަށް ގާތް އެކުވެރި އަޚެއް ކަމަށާއި އެބޭފުޅާއަކީ އެއްވެސް ބަޔަކަށް ނުރައްކަލެއް ކޮށްފާނެ ބޭފުޅެއް ނޫން ކަމަށް ރާއްޖޭގެ މަޝްހޫރު ދީނީ އިލްމުވެރިއެއް ކަމަށްވާ ޑރ. މުހައްމަދު އިޔާޒް ވިދާޅުވެއްޖެއެވެ.
ޑރ. އިޔާޒް ކުރެއްވި ޓްވީޓެއްގައި މިހެން ވިދާޅުވެފައިމިވަނީ ދީނީ އިލްމުވެރިޔާ ޝެއިޚް އާދަމް ޝަމީމް އިބްރާހިމް އިންޑިއާގެ އެއާޕޯޓެއްގައި ހިފަހައްޓައި އެގައުމުން ޑީޕޯޓު ކޮށްލުމަށް ނިންމައިފައިވާ ކަމަށް ޚަބަރުފެތުރިފައިވާ ދަނޑިވަޅުގައެވެ.
Dr Adam Shameem aky v gaaiy ekuveri akh eh. Eyna aky evves bayakah nurakkaleh kohfaane fadha beyfulheh noon. Maaiy Allah eyna ashaai aaila ah keiytherikan dhevvaashi. Aameen.
— Dr.Mohamed Iyaz (@dr_iyaz) October 12, 2018
"ވީނިއުސް" އިން ރިޕޯޓްކުރާ ގޮތުގައި ޝެއިޚް ޝަމީމް މިއަދު ހެނދުނު އިންޑިއާއަށް ވަޑައިގަތުމުން، ޓްރިވެންޑްރަމް އެއާޕޯޓުގައި ހިފެހެއްޓުމަށް ފަހު، ޝަމީމް އެޤައުމުން ޑީޕޯޓްކުރުމަށް ކަމާބެހޭ އިދާރާތަކުން ނިންމާފައިވާ ކަމަށެވެ.
އެހެންނަމަވެސް ޝަމީމް ހައްޔަރު ކުރި ސަބަބެއް އަދި ޑީޕޯޓު ކުރާ ސަބަބެއްވެސް ސާފެއް ނުވެއެވެ.
ޝަމީމް ހިފެހެއްޓުމަށްފަހު އެންމެ އަވަހަށް ރާއްޖެ އަންނަ ފްލައިޓެއްގައި އޭނާ މާލެ ފޮނުވާލުމަށް ނިންމި ކަމުގައިވިޔަސް، ފަހުން އިމިގްރޭޝަނުން ވަނީ އެ ނިންމުން ބަދަލުކޮށް ޝަމީމް ޑީޕޯޓު ކޮށްލުމަށް ފަހު މާދަމާ މާލެ ފޮނުވާލުމަށް ނިންމާފައި ކަމަށްވެސް "ވީނިއުސް" އިން ރިޕޯޓްކުރެއެވެ.
އަދި ޝެއިޚް ޝަމީމް އިންޑިއާއަށް ވަޑައިގެންނެވީ އާއިލާގެ ބޭފުޅަކާއި އެކު ބޭސްފަރުވާ އަށް ކަމަށާއި، އެއާޕޯޓުން ޝަމީމް ހައްޔަރުކުރުމާއި ގުޅިގެން އާއިލާއިން ވަނީ އިންޑިއާގައި ހުންނަ ރާއްޖޭގެ ކޮންސިއުލޭޓަށް އަންގާފައި ކަމަށްވެސް މަޢުލޫމާތު ލިބެއެވެ.
ނަމަވެސް މިކަމާއި ބެހޭ އެއްވެސް މަޢުލޫމާތެއް އިންޑިއާގެ އިމިގްރޭޝަނުން ވެސް އަދި ރާއްޖޭގެ ކަމާބެހޭ އެއްވެސް އިދާރާއަކުން ވެސް ހާމަކޮށްފައެއް ނުވެއެވެ.