ރައީސް އޮފީހުގެ ލީގަލް އެފެއާޒް މިނިސްޓަރު އާޒިމާ ޝަކޫރުގެ ދަރިއެއްގެ ވީޑިއޯއެއް ސޯޝަލް މީޑިއާގައި ދައުރުކުރުވާ ބައެއް ފަރާތްތަކުން އެދަރިފުޅަށް ނިސްބަތްކޮށް ބަސްތައް ބުނަމުންދާތީ، އެކަމާ ހިތްހަމަނުޖެހުން ފާޅު ކުރައްވާ މަންމަގެ އަނިޔާވެރިކަމުގެ އަގު ދަރިފުޅު ދައްކާކަށް ނުޖެހޭ ކަމަށް ރައްޔިތުންގެ މަޖިލީހުގެ އައްޑޫ މީދޫ ދާއިރާގެ މެމްބަރު ރޮޒެއިނާ އާދަމް ވިދާޅުވެއްޖެއެވެ.
ރޮޒެއިނާ ކުރެއްވި ޓްވީޓެއްގައި ވިދާޅުވެފައިވަނީ އާޒިމާ ޝަކޫރު ސިޔާސީ ގޮތުން ކުރައްވާ ކަންކަމަށް ހިތްހަމަ ނުޖެހޭ ކަމަށާއި އެހެން ނަމަވެސް އާޒިމާގެ ދަރިފުޅުގެ ކަންކަން އާޒިމާ ދެކެ އަންނަ ރުޅީގައި ސޯޝަލް މީޑިއާގަ ފަތުރާ އެއްޗެހި ކިޔުމަކީ ބަލައިގަނެވޭ ކަމެއް ނޫންކަމަށެވެ.
Alhugandaky Azima Shakoor siyaasy gothun kuravva kankama varah hiyhama nujehey meeheh.
Ehennamaves Azima ge dharifulhuge kankan Azima dheke annarulheega social media ga fathura ehchehi kiyumaky balaiganevey kamehnoon.
Ekujjaage mammage aniyaaverikamuge agu eyna dhakkaakah nujehey— 𝐌𝐏 𝐑𝐨𝐳𝐚𝐢𝐧𝐚 𝐀𝐝𝐚𝐦 🎈 (@Roxeyna) October 14, 2018
މީގެ ދުވަސްކޮޅެއް ކުރިން ގަލޮޅު އުތުރު ދާއިރާގެ މެމްބަރު އީވާ އަބްދުﷲ އެ ކަމަނާގެ ދަރިފުޅަކު ގޮވައިގެން ބްރިޖު މަތިން ދުއްވާފައި ދިޔަ މަންޒަރުތަކެއް ފޮޓޯ ނަގާ ބަޔަކު ވަނީ ސޯޝަލް މީޑިއާގައި ގިނަ ކުރެވޭތޯ މަސައްކަތްކޮށްފައެވެ. އެ ކަމުގެ ހިތްހަމަނުޖެހުން އީވާ ވެސް ފާޅުކުރައްވާފައެވެ.
މިއީ ފަހަކަށް އައިސް ސޯޝަލް މީޑިއާގައި ބައެއް ފަރާތްތަކުން ވަރަށް ގިނައިން ކުރަމުންދާ ކަމެކެވެ. އަނެކާ ދެކެ ހިތްހަމަނުޖެހި ރުޅި އަންނަ ކޮންމެ ފަހަރަކު އަނބިދަރިންގެ ފޮޓޯތައް އާންމުކޮށް ފާޑުފާޑުގެ ނޭއްގާނީ ވާހަކަތައް ވެސް ފަތުރައެވެ. މިއީ ކޮންމެ ފަރާތަކުން ކުރި ކަމުގައި ވިޔަސް ބަލައިގަނެވޭނެ ކަންތަކެއް ނޫނެވެ.
އެ ފަރާތަކާއި ތިމާއާއި ދެމެދު އޮންނަ ރުޅިވެރިކަމެއް ނުވަތަ ހިތްހަމަނުޖެހުމަކަށް އާއިލާ އަދި ދަރިން ވެއްދުުމުގެ ކުރިން ކޮންމެ ފަރާތަކުން ވެސް އެމީހެއްގެ އަމިއްލަ ދަރިއެއްގެ ފޮޓޯ ނުވަތަ އާއިލާ މީހެއްގެ ފޮޓޯ ނުވަތަ ވީޑިއޯ ގިނަކޮށްލުމުގެ ނިޔަތުގައި ބަޔަކު އެފަދައިން ބޭނުން ކޮށްފިނަމަ ތިމާގެ ހިތަށް އަރާނީ ކީކޭތޯ ކުރެވޭނީ ކޮންކަހަލަ އިހުސާސްތަކެއްތޯ ވިސްނާލުން މުހިއްމެވެ. މިފަދަ ނާތަހުޒީބު އަމަލުތަކުން ދުރުވެގަންނަން ޖެހެއެވެ.