މިއަދު 10 ޖަހާއިރަށް ސުޕްރީމް ކޯޓުގައި ތާވަލް ކުރެވިފައިވާ ރިޔާސީ އިންތިޚާބާއިބެހޭ ދުސްތޫރީ މައްސަލައިގެ ދެވަނަ ދުވަހުގެ އަޑުއެހުމަށް ކޯޓަށް ވަނުމަށް ބޭނުންވާ އާންމު ފަރާތްތަކުން އިރުނާރަނީސް ކިޔު ހަދަން ފަށައިފިއެވެ.
މި އަޑުއެހުމަށް ވަންނަން ގޮސްފައިތިބި ބައެއް ފަރާތްތަކުން ވަނީ އަމިއްްލައަށް ނަމްބަރު ޕްރިންޓްކޮށްގެން ގޮސް ސަފުގައި ތިބި ފަރާތްތަކުގެ ތަރުތީބުން ނަމްބަރު ބަހާފައެވެ. މިއަދުގެ ކިޔުގައި އެމްސެވަންގެ މެނޭޖްމަންޓަށް ނިސްބަތްވާ ފަރާތްތަކާއި މުވައްޒަފުން ތިބިކަން ފާހަގަ ކުރެވެއެވެ. މީގެ އިތުރުން ކިއުގައި ތިބި މީހުންގެ ތެރޭގައި ގުޅިފައިވާ ޕާޓީތަކުގެ ސަޕޯޓަރުންނާއި ޕީޕީއެމްގެ ބައެއް އެކްޓިވިސްޓުން ހިމެނެއެވެ.
ސުޕްރީމް ކޯޓުގެ ޝަރީއަތުގެ މަޖިލިސް ޖާގަ އޮތް ގޮތުން އެ ކޯޓަށް އަޑުއަހަން ވަދެވޭނީ ގިނަވެގެން 30 ވަރަކަށް މީހުންނަށެވެ. ނަމަވެސް ގިނަ ބަޔަކަށް ވަދެވޭ ޖާގަ ތަނަވަސް ކުރުމުގެ ފުރުސަތު އޮންނާނެ ކަމަށް މައުލޫމާތު ލިބެއެވެ.
ސުޕްރީމް ކޯޓުގައި މިއަދު ހެނދުނު 10:30 ގައި ފަށާ އަޑުއެހުމަށް ނަން ނޯޓުކުރަން ފަށާނީ 8:30 ގައެވެ.
އިންތިހާބު ބާތިލު ކުރުމަށް ރައީސް އަބްދުﷲ ޔާމީން ހުށަހެޅުއްވި މައްސަލާގައި އިލެކްޝަންސް ކޮމިޝަނާއި ގުޅިފައިވާ ހަތަރު ޕާޓީތަކުގެ ފަރާތުން ޖަވާބުދާރީވާނެއެވެ.