އެމްޑަބްލިއުއެސްސީ އާއި ހައުސިންގ މިނިސްޓްރީ އިން ގަވައިދާ ހިލާފަށް ބިމުން ފެން ނަގައި ފެން ބޭރުކޮށްފައިވާތީ، އެންވަޔަރަންމެންޓް ޕްރޮޓެކްޝަންސް އޭޖެންސީ (އީޕީއޭ) އިން އެ ދެމުއައްސަސާ ޖޫރިމަނާކޮށްފިއެވެ.
ބިމުން ފެންނަގައި ފެން ބޭރު ކުރުމުގެ ގަވައިދުގެ ހަތް ވަނަ މާއްދާގެ، (ހ) ގައި ބަޔާންކޮށްފައިވާ ގޮތާ ހިލާފަށް މާލޭގެ ހަވީރީ ހިނގުން ސަރަހައްދުގައި ބިމުން ފެންނަގައި ފެން ބޭރުކުރުމުގެ ހުއްދައަށް އެދި އެ އެޖެންސީއަށް ހުށަހެޅުމެއް ނެތި މާލޭ ވޯޓަރ އެންޑް ސްވަރޭޖް ކޮމްޕެނީ އިން މަސައްކަތް ކޮށްފައިވާ ކަމަށް އީޕީއޭއިން ބުނެއެވެ. އެމްޑަބްލިއުއެސްސީ އިން މިކަން ކޮށްފައިވަނީ ޖުލައި 11 އިން 16 ވަނަ ދުވަހުގެ ނިޔަލަށެވެ.
މިކަމާ ގުޅިގެން އީޕީއޭ އިން ވަނީ އެމްޑަބްލިއުއެސްސީ 55000ރ. އިން ޖޫރިމަނާކޮށްފައެވެ.
މީގެ އިތުރުން ހައުސިންގ މިނިސްޓްރީގެ އިމާރާތް ހުންނަ ކޮމްޕައުންޑުގެ ހުޅަނގު ކަންމަތީގައި މި އަހަރުގެ ޖުލައި 10 ވަނަ ދުވަހު ބިމުން ފެން ނަގައި ފެން ބޭރުކޮށްފައިވާ ކަން އީޕީއޭ އިން ކުރި ތަހުގީގުން އެނގޭތީވެ ހައުސިންގ މިނިސްޓްރީ ވެސް އީޕީއޭ އިން ވަނީ ޖޫރިމަނާ ކޮށްފައެވެ. އެ މިނިސްޓްރީ ޖޫރިމަނާ ކޮށްފައިވަނީ 50000ރ. އިން ކަމަށް އިޕީއޭއިން ބުނެއެވެ.
މި ޖޫރިމަނާ ފައިސާ 30 ދުވަހުގެ ތެރޭގައި ދައްކާ ހަލާސް ކުރުމަށް އެމްޑަބްލިއުއެސްސީ އާއި ހައުސިންގ މިނިސްޓްރީއަށް އީޕީއޭއިން ވަނީ އެދިފައެވެ.