އިންޑިއާގެ ގޯއެއާގެ ދަތުރުތައް އިންޑިޔާގެ މުމްބާއީއިން ރާއްޖެއަށް މިއަދު ފަށައިފި އެވެ.
ގޯއެއާގެ ފުރަތަމަ ބޯޓު މިއަދު ރާއްޖެ އައުމުން ވެލާނާ އިންޓަނޭޝަނަލް އެއާޕޯޓުން ވަނީ މަރުހަބާ ކިޔާފައެވެ. އެގޮތުން މަރުހަބާ ކިޔުމުގައި މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް)ގެ އިސްބޭފުޅުންނާއި، ސިވިލް އޭވިއޭޝަން އޮތޯރިޓީގެ ބޭފުޅުންނާއި، ރާއްޖޭގައި ހުންނަވާ އިންޑިއާ ސަފީރު އަކިލޭޝް މިސްރާ ބައިވެރިވެވަޑައިގެންނެވިއެވެ.
އިންޑިއާގެ ގޯއެއާގެ ދަތުރުތައް ރާއްޖެއަށް ފެށުން އިފްތިތާހު ކުރުމަށް ހޮނިހިރު ދުވަހުގެ ރޭ މާލޭގައި ވަނީ ހާއްސަ ރަސްމިއްޔާތެއް ބާއްވާފަ އެވެ. އެ ރަސްމިއްޔާތު ޝަރަފްވެރި ކޮށްދެއްވީ ރައީސުލްޖުމްހޫރިއްޔާގެ ނައިބް ކަމުގެ މަގާމަށް އިންތިހާބުވެވަޑައިގެންފައިވާ ފައިސަލް ނަސީމް އެވެ.
ގޯއެއާގެ ދަތުރުތައް ރާއްޖެއަށް ފެށުމަށް ރާއްޖޭގެ ސިވިލް އޭވިއޭޝަން އޮތޯރިޓީން ހުއްދަ ދީފައިވަނީ 2016 ވަނަ އަހަރުގެ ތެރޭގަ އެވެ. ގޯއެއާގެ ދަތުރުތައް ރާއްޖެއަށް ފަށާފައިވާއިރު ގޯއެއާގެ ދިވެހި އެޖެންޓަކީ ވޮޔޭޖަސް މޯލްޑިވްސް އެވެ. ގޯއެއާގެ މިދަތުރުތަކުގައި ބޭނުންކުރަނީ 152 މީހުން އުފުލޭ އެއާބަސް އޭ320ގެ މަންތިދާ ބޯޓެވެ.
ރާއްޖެއަށް އެންމެ ގިނަ ފަތުރުވެރިން މިހާރު ވެސް ޒިޔާރަތްކުރާ އެއް ގައުމަކީ އިންޑިއާ ކަމަށްވާއިރު ގޯއެއާގެ ދަތުރުތައް ރާއްޖެއަށް ފެށުމާ ގުޅިގެން އިންޑިއާ އިން ރާއްޖެއަށް ޒިޔާރަތްކުރާ ފަތުރުވެރިންގެ އަދަދު އިތުރުވެގެންދާނެ ކަމަށް ރާއްޖެ ޓޫރިޒަމް މިނިސްޓްރީން ވަނީ ބުނެފަ އެވެ.