ރައްޔިތުންގެ މަޖިލީހުގެ ބައެއް މެންބަރުން ފުލުހުންގެ ސަފުތައް ފަޅާލުމަށްފަހު ރައްޔިތުންގެ މަޖިލިސް ކުރާ ގެއަށް ވަދެވަޑައިގެންނެވި ކަމަށް ބުނާ މައްސަލާގައި 12 މެންބަރެއްގެ މައްޗަށް ދައުލަތުން ކުރި ދައުވާ ޕީޖީ އޮފީހުން އަނބުރާ ގެންގޮސްފި އެވެ.
މަޖިލީހުގެ 12 މެންބަރަކަށް ދައުލަތުން އުފުލި ދައުވާ އަނބުރާ ގެންގޮސްފައި މިވަނީ މިދައުވާއާއި ގުޅިގެން އަޑުއެހުންތަކެއް ވެސް ބޭއްވުމަށްފަހު އެވެ. ދައުލަތުން ދައުވާ އަނބުރާ ގެންދިޔަ ސަބަބެއް އަދި އެނގިފައެއް ނުވެ އެވެ.
ދައުލަތުން ދައުވާކުރި 12 މެންބަރުންގެ ތެރޭގައި ހިމެނޭ ބޭފުޅުންނަކީ އެމްޑީޕީގެ ޕާލިމެންޓްރީ ގުރޫޕްގެ ލީޑަރު / ހިންނަވަރު ދާއިރާގެ މެންބަރު އިބްރާހީމް މުހައްމަދު ސޯލިހް، ޖޭޕީގެ ޕާލިމެންޓްރީ ގުރޫޕްގެ ނައިބް ލީޑަރު / ކިނބިދޫ ދާއިރާގެ މެންބަރު އަބްދުﷲ ރިޔާޒު، ރައްޔިތުންގެ މަޖިލީހުގެ ކުރީގެ ރައީސް / ހެންވޭރު އުތުރު ދާއިރާގެ މެންބަރު އަބްދުﷲ ޝާހިދު، ހިތަދޫ އުތުރު ދާއިރާގެ މެންބަރު މުހައްމަދު އަސްލަމް، ހެންވޭރު ދެކުނު ދާއިރާގެ މެންބަރު މުހައްމަދު އަބްދުލް ކަރީމް، މާފަންނު ހުޅަނގު ދާއިރާގެ މެންބަރު މުހައްމަދު ފަލާހް، ކެންދޫ ދާއިރާގެ މެންބަރު އަލީ ހުސައިން، ހިތަދޫ މެދު ދާއިރާގެ މެންބަރު އިބްރާހީމް ދީދީ، ނޮޅިވަރަމް ދާއިރާގެ މެންބަރު ހުސައިން އަރީފް، ވިލިނގިލި ދާއިރާގެ މެންބަރު ސައުދު ހުސައިން، ތުލުސްދޫ ދާއިރާގެ މެންބަރު މުހައްމަދު ވަހީދު އިބްރާހީމް، އަދި މަޑުއްވަރީ ދާއިރާގެ މެންބަރު މުހައްމަދު އަމީތު އެވެ.
މި ބޭފުޅުންގެ މައްޗަށް ދައުލަތުން ކްރިމިނަލް ކޯޓުގައި ދައުވާކުރީ މިދިޔަ އަހަރުގެ އޯގަސްޓް މަހުގެ ތިންވަނަ ހަފްތާގެ ތެރޭގަ އެވެ.
ރައްޔިތުންގެ މަޖިލީހުގެ 12 މެންބަރަކަށް ދައުވާކުރަން ފޮނުވީ މިދިޔަ އަހަރުގެ ޖުލައި މަހުގެ 24 ވަނަ ދުވަހު ފުލުހުންގެ ސަފުތައް ފަޅާލުމަށްފަހު ރައްޔިތުންގެ މަޖިލީހުގެ އިދާރާއަށް ވެދެވަޑައިގެންނެވި ކަމަށް ބުނާ މައްސަލާގަ އެވެ. ނަމަވެސް މިމައްސަލާގައި ތުހުމަތުކުރާ މެންބަރުން ވިދާޅުވީ އެބޭފުޅުން ފުލުހުންގެ ސަފުތައް ފަޅާލާފައި ނުވާނެ ކަމަށާއި އެބޭފުޅުންނަކީ މަޖިލީހުގެ މެންބަރުންނަށް ވާތީ އެބޭފުޅުން މަޖިލީހަށް ވަދެވަޑައިގަތުމަށް ފުލުހުން ފުރުސަތު ދެއްވި ކަމަށެވެ. އަދި އެބޭފުޅުން މަޖިލީހަށް ހާޒިރުވަނިކޮށް ފުލުހުންނަށް އެބޭފުޅުން ހުއްޓުވޭނެ އެއްވެސް ގާނޫނީ ހައިސިއްޔަތެއް ނޯންނާނެ ކަމަށްވެސް މެންބަރުން ވަނީ ވިދާޅުވެފަ އެވެ.
ޖުލައި މަހުގެ 24 ވަނަ ދުވަހު މެންބަރުން މަޖިލީހަށް ވަނުމާއެކު ފުލުހުންނާއި ސިފައިން ވަނީ ބާރުގެ ބޭނުންކޮށްގެން ގާނޫނާ ހިލާފަށް މެންބަރުން މަޖިލިސް ކުރާ ގެއިން ނެރެފަ އެވެ.