ސައްހަ ނޫން ކޯޓު އަމުރެއް ނެރެ ރައީސް އަބުދުﷲ ޔާމީން ހައްޔަރުކޮށް، ރަހީނު ކުރަން އުޅުނު ކަމަށްބުނެ، ޖަލު ހުކުމެއް އިއްވާފައިވާ އދ. މާމިގިލީ ކޯޓުގެ ކުރީގެ އިސް މެޖިސްޓްރޭޓް އަހުމަދު ނިހާންގެ އިސްތިއުނާފު އަޑުއެހުންތައް ހައިކޯޓުން ނިންމާލައިފި އެވެ.
އެ މައްސަލައާއި ގުޅިގެން ނިހާންގެ މައްޗަށް ވަނީ ހަތަރު ދައުވާއެއް އުފުލާފައެވެ. އެއީ، އަސްލެއް ނެތް އެއްޗެއް ސައްހަ ކަމަށް ދެއްކުމައްޓަކައި ލިޔުމެއް އުފެއްދި ކަމުގެ ދައުވާ އާއި ރަސްމީ ވާޖިބު އަދާ ކުރުމުގައި އެކަށިގެން ނުވާ އަމަލެއް ހިންގި ކަމުގެ ދައުވާ އާއި ރަސްމީ ހައިސިއްޔަތު ނަހަމަ ގޮތުގައި ބޭނުން ކުރި ކަމުގެ ދައުވާ އާއި ޓެރަރިޒަމް އަމަލެއް ހިންގުމުގައި ބައިވެރި އެފަދަ އަމަލެއް ހިންގުމުގެ ދައުވާ އެވެ.
ޓެރަރިޒަމްގެ އަމަލެއް ހިންގަން އުޅުމާއި އެކަމުގައި ބައިވެރިވުމުގެ ކުށް ސާބިތުވުމުގެ ސަބަބުން ނިހާން އަށް ވަނީ 17 އަހަރުގެ ޖަލު ހުކުމެއް ވަނީ އިއްވާފައެވެ. އެ ހުކުމް ނިހާންގެ މައްޗަށް އިއްވާފައިވަނީ އާ ޓެރަރިޒަމްގެ ގާނޫނުގެ ހަވަނަ މާއްދާގެ ނ. އާ ހަވާލާދީ އެވެ. އެ ހުކުމުގައި ބުނެފައިވަނީ، މާމިގިލީ ކޯޓުގައި އެ ކޯޓުގެ ލެޕްޓޮޕެއް ބޭނުން ކޮށްގެން ގާޒީ ނިހާން ކޯޓު އަމުރެއް ޑައުންލޯޑް ކުރިކަން ސާބިތުވާ ކަމަށެވެ. އަދި އެ އަމުރަށް ބަދަލު ގެނައިކަން ވެސް ސާބިތުވާ ކަމަށެވެ. އަދި އެފަދަ އަމުރެއް ނެރުމުގެ ނުރައްކާތެރިކަމާ މެދު ނިހާން ވާހަކަ ދައްކާފައިވާކަން ވެސް ހެކިންގެ ހެކިބަހުން އެނގޭ ކަމަށެވެ.
ޓެރަރިޒަމްގެ ކުށް ނިހާންގެ މައްޗަށް ސާބިތުވެފައިވަނީ، ރައީސުލްޖުމްހޫރިއްޔާ ގަދަކަމުން ހައްޔަރުކޮށް، ރަހީނުކޮށް، އާންމުންގެ މެދުގައި ބިރުވެރިން އުފެދޭ ފަދަ، އަމަލެއް ހިންގަން މުހުތާޒު މަސައްކަތްކުރެއްވި ކަމަށް އަމިއްލައަށް ވިދާޅުވުމުންނާއި ދައުލަތުން ހުށަހެޅި ހެކިން ސާބިތުވާތީ ކަމަށް ކްރިމިނަލް ކޯޓުން ވަނީ ކަނޑައަޅާފަ އެވެ.
ނިހާންގެ އިސްތިއުނާފު އަޑުއެހުން ތާވަލްކޮށްފައިވާ އިރު، އޭނާގެ ވަކީލު ކުރީގެ ބަންޑާރަނައިބް ހުސްނުއްސުއޫދު ވަނީ ސުޕުރީމްކޯޓުން ދިވެހި ރާއްޖޭގެ ކޯޓުތަކާއި، ޓްރައިބިއުނަލް ތަކުގައި ވަކާލާތު ކުރުމުން، ސަސްޕެންޑްކޮށްފަ އެވެ. މި މައްސަލާގައި ދެން އޮންނާނީ ހުކުމް އިއްވުމެވެ.