ރިޔާސީ އިންތިޚާބުން ނާކާމިޔާބީއާ ކުރިމަތިލައްވަން ޖެހިވަޑައިގަތުމުން އެ އިންތިޚާބު ބާތިލުކުރަން ރައީސް އަބްދުﷲ ޔާމީން ހުށަހަޅުއްވާފައިވާ މައްސަލައިގައި ފަހު އަޑުއެހުމަށް ވަނުމަށް ފުރުސަތު ލިބުނީ ހަމައެކަނި ޕީޕީއެމްގެ ސަޕޯޓަރުންނަށެވެ.
މިއަދުގެ އަޑުއެހުމަށް ވަނުމަށް ޕީޕީއެމްގެ ސަޕޯޓަރުން ވަނީ އިއްޔެ ހަވީރުއްސުރެ ކިޔޫ ހަދާފައެވެ.
ކިޔޫގައި މީހަކު ބެހެއްޓުމަށްފަހު މިއަދު ކިޔޫއަށް ވެންނެވުމަށް ގަލޮޅު ދެކުނު ދާއިރާގެ މެމްބަރު އަހުމަދު މަހްލޫފް ވަޑައިގެންނެވުމުން އެތަނުގައި ތިބި ޕީޕީއެމްގެ ސަޕޯޓަރުންވަނީ އޭނާ ކިޔޫއިން ބޭރުކޮށްލާފައެވެ.
ޝަރީއަތް އަޑުއެހުމަށް ވަނުމުގެ ފުރުސަތު ދެނީ އާންމުންގެ ގާތްގަނޑަކަށް 25 މީހުންނަށެވެ. އޭގެ އިތުރުން 10 ނޫސްވެރިއަކަށާއި އެ މައްސަލަ އަށް ތަދައްހުލްވެފައިވާ ޕާޓީތަކަށް ވަކި އަދަދެއްގެ މީހުންނަށެވެ. މީގެ ކުރިން ބޭއްވި އަޑުއެހުންތަކަށް ގުޅިފައިވާ ޕާޓީތަކަށް ތާއީދުކުރާ ފަރާތްތަކުން ކުރިޔާލާ ކިއުގައި ޖެހިގެން ވަދެފައި ވެއެވެ.
ސުޕްރީމް ކޯޓު ސަރަހައްދުގައި އެސްއޯ ފުލުހުންނާއި ގިނަ އަދަދެއްގެ ސިފައިން ދަނީ ހަރަކާތްތެރި ވަމުންނެވެ.