ރިޔާސީ އިންތިޚާބު ބާތިލް ކުރުމަށް ރައީސް އަބްދުﷲ ޔާމީންގެ ފަރާތްޕުޅުން ސުޕްރީމް ކޯޓަށް ހުށަހެޅުއްވީ އިންތިޚާބު ގަޑުބަޑު ކޮށްފައި އޮތްކަމުގެ ހެކިތައް ފެންނަން ހުރީމާ ކަމަށް ޕީޕީއެމްގެ ޕާލަމެންޓްރީ ގްރޫޕްގެ ލީޑަރު އަހުމަދު ނިހާން ވިދާޅުވެއްޖެ އެވެ.
ނިހާން މިހެން ވިދާޅުވެފައިވަނީ ރޭ ޕީއެސްއެމް ނިއުސްގެ "އެންމެ ފުރަތަމަ ގައުމު" ޕްރޮގްރާމްގައި ވާހަކަ ދައްކަވަމުންނެވެ. އެގޮތުން ދެއްކެވި ވާހަކައިގާ ނިހާން ވިދާޅުވީ އިންތިޚާބު ބާތިލް ކުރުމަށް ކޯޓަށް ދިއުމަކީ ފަސޭހަ ކަމަކަށް ނުވި ނަމަވެސް، އެކަން ކުރަން މަޖުބޫރުވީ ރައްޔިތުން ގެނައި ޝަކުވާތަކުގެ ސަބަބުން ކަމަށެވެ. އަދި އެކަމުގެ ފަރުވާ ލިބެން އޮތް ތަނަކީ ސުޕްރީމް ކޯޓު ކަމަށް ވާތީ އެ ކޯޓަށް ވަޑައިގަތީ ކަމަށް ވެސް ނިހާން ވިދާޅުވި އެވެ.
އިންތިހާއަށް ބޮޑު ތަފާތަކުން އިންތިޚާބުގައި ބަލިވެވަޑައިގެންނެވުމުން، ރައީސް ޔާމީން ސުޕްރީމް ކޯޓަށް ހުށަހެޅުއްވި މައްސަލައިގެ އަޑުއެހުންތައް ފެށިގެންދަނީ ކުރިޔަށެވެ. މި މައްސަލައާއިބެހޭ ގޮތުން އިލެކްޝަންސް ކޮމިޝަން (އީސީ) އިން ސިފަަކުރި ގޮތުގައި، ރައީސް ޔާމީންގެ ފަަރާތްޕުޅުން ފާހަގަކުރައްވާ ކަންކަމަށް "ތުހުމަތުގެ ދަރަޖަ ވެސް ލިބިގެން ނުވެ" އެވެ. އެހާ ބޮޑު ތަފާތަކުން ރައީސް ޔާމީން ނާކާމިޔާބުވި އިންތިޚާބެއް ބާތިލް ކުރަން ހުށަހަޅަން ޖެހޭ ވަރުގެ އެއްވެސް ހެއްކެއް ނެތް ކަމަށް އެ ކޮމިޝަނުން ގަބޫލު ކުރެ އެވެ.
އީސީގެ މެމްބަރުންގެ އިހުމާލުން ނުވަތަ އެބޭފުޅުން ރާވައިގެން ގަސްދުގައި އިންތިޚާބުގެ ކަންކަން ރާވާފައި ހުރީ ގޯސްކޮށް ކަން ހެކިތަކުން އެނގިވަޑައިގެންނެވި ކަމަށް ނިހާން ވިދާޅުވިއެވެ. ސުޕްރީމް ކޯޓަށް މައްސަލަ ހުށަހަޅުއްވައިގެން، ކަން ހިނގި ގޮތް ބަލަން މަޖުބޫރުވި އެހެން ވެގެން ކަމަށް ވެސް ނިހާން ތަކުރާރުކޮށް ވިދާޅުވި އެވެ.
"އޭގެ ކޮބައިތޯ ގޯހަކީ؟ އަޅުގަނޑު މި ދަންނަވަނީ ބެލުމުގެ ކޮބައިތޯއޭ (ގޯހަކީ). ބަލަން އިދިކޮޅު މީހުން ދެކޮޅު ހަދަނީ ކީއްވެތޯއޭ؟ ކެތްތެރިކަމާ އެކު މަޑުކޮށްލަންވީނޫންތޯ ގޯހެއް ހަދާފައި ހުރިތޯ ބަލަން،" ރައްޔިތުންގެ މަޖިލިހުގެ ވިލިމާލެ ދާއިރާގެ މެމްބަރުކަން ވެސް ކުރައްވާ ނިހާން ވިދާޅުވި އެވެ.
"ހިތާމަ އަކީ މިހެން ދާން ޖެހުން. އެކަމަކު އަޅުގަނޑުމެންގެ އުންމީދަކީ އިންސާފު ގާއިމު ކުރެވުން،" އިންތިޚާބު އޮޅުވާލުމަށް ގިނަ ކަންކަން ހިންގާފައިވާ ކަމުގެ ތަފްސީލް ދެއްވައި ނިހާން ވިދާޅުވި އެވެ.
ނިހާން ވިދާޅުވީ އިންތިޚާބާ ގުޅޭ ގޮތުން ކޮންމެ ނިންމުމެއް ވެސް ސުޕްރީމް ކޯޓުން ނިންމި ކަމުގައިވިޔަސް، އެކަން ބަލައިގަނެ ކުރިއަށް ހިނގައިގަންނަން ޖެހޭ ކަމަށެވެ. އަދި ސިޔާސީ ގޮތުން ނުކުމެ ތިއްބެވީ އެކަމުގެ ހިތްވަރު ހުރީމަ ކަމަށް ވެސް ނިހާން ވިދާޅުވި އެވެ.
ޕީޕީއެމްގެ އެކި ފަރާތްތަކުން އިންތިޚާބަށް އަމާޒު ކުރައްވާ ދައްކަވާ ބައެއް ވާހަކަތައް ވަނީ ބޮޑު ޖޯކަކަށް ވެފައެވެ. ބޯގަބޫލު ނުކުރެވޭ ފަދަ އެތައް ޚިޔާލީ ވާހަކަތަކެއް ފަތުރަމުންދާ ކަމަށް ބުނެ ސޯޝަލް މީޑިއާގައިވެސް ދަނީ ޕީޕީއެމަށް ވަރަށް ބޮޑަށް ފާޑުވުން އަމާޒުވަމުންނެވެ.
މިހެން މިކަން އޮތްއިރު ޕީޕީއެމުން ހުށަހަޅާފައިވާ މައްސަލައިގެ ފަހުގެ އަޑުއެހުން މިހާރުވަނީ ސުޕްރީމް ކޯޓުގައި ފެށިފައެވެ. ކޯޓުގެ ނިންމެވުމުގެ އިންތިޒާރުގައި މުޅި ގައުމުއޮތީ ކެތްމަދުވެފައެވެ.