2016 ވަނަ އަހަރުގެ މާރޗް މަހުގެ ތެރޭގައި އަނިޔާވެރި ގޮތަކަށް މަރާލައި ހިތަދޫ އަލައޮޅެއްގެ ތެރެއަށް އެއްލާލައިފައި އޮއްވައި ފެނުނު ހިތަދޫގެ ވިޔަފާރިވެރިޔާ އަލީ އަބްދުﷲ މަރާލި މަރުގެ މައްސަލައިގައި އަޑުއެހުމެއް މިއަދު ކްރިމިނަލް ކޯޓުގައި ތާވަލް ކޮށްފިއެވެ.
މިއަދު މެންދުރުފަހު 1:30 އަށް ތާވަލް ކޮށްފައި ވަނީ އަލީ މަރާލި މައްސަލައިގައި އެނގިހުރެ މީހަކު މެރުމުގެ ދައުވާ އުފުލާފައިވާ ހިތަދޫ ހެޕީ ފިއުޗާ އަހުމަދު އިބްރާހީމްދީދީގެ މައްޗަށް ކުރާ ދައުވާގެ އަޑުއެހުމެކެވެ.
އަހްމަދް އިބްރާހިމްދީދީ އަކީ އަލީއަށް ބޮޑުބޭބެ ކިޔާ މީހެކެވެ.
އަހްމަދް އިބްރާހިމްދީދީގެ މައްޗަށް ކުރާ ދައުވާގެ އަޑުއެހުމެއް ކްރިމިނަލް ކޯޓުގައި ތާވަލްކޮށްފައި މިވަނީ އޭނާގެ މައްސަލައެއް އެ ކޯޓުގައި ކުރިއަށް ނުދާތާ ގިނަ ދުވަސްތަކަކަށް ފަހުގައެވެ.
އަލީ މަރާލާފައިވަނީ އޭނާ ހިންގި ޓޫވޭވް ފިހާރައިގެ މުދަލާއި ފައިސާގެ ދަހިވެތި ކަމުގައި ކަމަށް ފުލުހުން ވަނީ މީގެ ކުރިން ބުނެފައެވެ. އަދި އަހުމަދު ދީދީއާއި ގުޅުންހުރި ގެއަކުން 40،000 އަށްވުރެ ގިނަ ފައިސާ ފެނިފައިވާ ކަމަށް ވެސް ފުލުހުން ވަނީ ކުރިން ބުނެފައެވެ.
'އައްޑޫލައިވް' އަށް މައުލޫމާތު ލިބިފައިވާ ގޮތުގައި އަހްމަދް އިބްރާހިމްދީދީގެ ނިޔަފަތިތަކުގެ ދަށުން ނެގި ޑީއެންއޭ ސާމްޕަލް އަލީ އަބްދުﷲގެ ޑީއެންއޭ އާއި ދިމާވެއެވެ. އެކަން އަލީގެ މަރުގެ މައްސަލައިގައި ގަސްތުގައި މީހަކު މެރުމުގައި ބައިވެރިވުމުގެ ދައުވާ ލިބޭ ދެމީހުންގެ މައްސަލައިގެ އަޑުއެހުމެއްގައި ދައުލަތުގެ ވަކީލާ ވަނީ ހާމަކޮށްފައެވެ.
އަލީގެ މަރަކީ ފަހުގެ ތާރީހެއްގައި ރާއްޖެއިން ފެނުނު އެންމެ ލާއިންސާނީ، އަނިޔާވެރި އެއް މަރެވެ. އޭނާއަކީ ހިތަދޫގެ ގިނަ ރައްޔިތުންގެ ލޯބި ހޯދާފައިވާ މީހުންނާ އެކުވެރި ވިޔަފާރިވެރިއެކެވެ.