އިލެކްޝަންސް ކޮމިޝަން (އީސީ)ގެ މެންބަރުން ދުވަސްތަކެއްގައި ރާއްޖެއިން ބޭރުގައި އުޅުއްވުމަށް ފަހު އެނބުރި ރާއްޖެ ވަޑައިގަންނަވަން ފަށައިފި އެވެ.
ރިޔާސީ އިންތިހާބުގެ ދާއިމީ ނަތީޖާ އިއުލާން ކުރުމަށް ފަހު ޕީޕީއެމްގެ ފަރާތުން އީސީއަށް އައި ތުހުމަތުތަކާއި ފާޑު ކިޔުންތަކާ ހެދި މެންބަރުންނާ ދިމާކޮށް، އާއިލާ އަށާއި ހުދު އެބޭފުޅުންގެ ޖިސްމަށް އެކި ކަހަލަ އަނިޔާދޭނެ ކަމުގެ އިންޒާރު ލިބެމުންދާ ކަމަށް ބުނެ އެ ކޮމިޝަންގެ މެންބަރުން ބޭރަށް ފުރާވަޑައިގަތެވެ. ބޭރަށް ފުރާވަޑައިނުގެން ރާއްޖޭގައި މަޑު ކުރީ އީސީގެ ރައީސް އަހުމަދު ޝަރީފް އެވެ.
އީސީގެ މެންބަރު އަކްރަމް އިއްޔެ ރާއްޖެ ވަޑައިގެން އިރު މެންބަރު އަލީ ނަޝާތު މީގެ ތިން ދުވަސް ކުރިން ވަނީ ރާއްޖެ ވަޑައިގެންފަ އެވެ. އަދި މެންބަރު އަހުމަދު އަމުޖަދު ވެސް ވަނީ ރާއްޖެ ވަޑައިގެންފަ އެވެ. މިހާރު ރާއްޖޭން ބޭރުގައި ހުންނެވީ މެންބަރު އިސްމާއިލް ހަބީބު އެވެ.