ކުރީގެ ރައީސް މައުމޫން އަބްދުލްގައްޔޫމް ޖަލަށް ލުމަށް ކްރިމިނަލް ކޯޓުން ކޮށްފައިވާ ހުކުމުގެ އިސްތިއުނާފު މަރުހަލާގެ އަޑުއެހުންތައް ނިންމާލާފައިވާ އިރު އެމައްސަލާގެ ހުކުމް ކުރުމަށްޓަކާ މާދަމާ ޝަރީއަތެއް ބޭއްވުމަށް ހައިކޯޓުގައި ތާވަލްކޮށްފިއެވެ.
މިމައްސަލާގެ އެންމެ ފަހު އަޑުއެހުން ބާއްވާފައި ވަނީ މިމަހުގެ 10 ވަނަ ދުވަހުއެވެ. އެދުވަހުގެ އަޑުއެހުމުގައި ވަނީ ދެ ފަރާތުން ހުލާސާ ބަޔާން އިއްވާ އަޑުއެހުންތައް ނިންމާލާފައިވާކަން އިއުލާން ކޮށްފައެވެ.
ރައީސް މައުމޫނު ތަހުގީގަށް ފޯން ނުދެއްވި މައްސަލާގައި އަދުލު އިންސާފަށް ހުރަސްއެޅިކަމުގެ ދައުވާ އުފުލައި ރައީސް މައުމޫން އެއް އަހަރާއި ހަތް މަހާއި ހަ ދުވަހަށް ޖަލަށް ލުމަށް ކްރިމިނަލް ކޯޓުން ހުކުމްކުރީ މިދިޔަ ޖޫން މަހުއެވެ.
ރައީސް މައުމޫނުގެ ހުކުމް ތަންފީޒު ކުރަމުންދަނިކޮށް ރިޔާސީ އިންތިހާބު އިބްރާހިމް މުހައްމަހު ސޯލިހް ކާމިޔާބު ކުރެއްވުމާއި ގުޅިގެން ކްރްިމިނަލް ކޯޓުން ކަފާލާތުގެ ދަށުން މައުމޫނު ގެއަށް ބަދަލުކޮށްފައި ވަނީ ސެޕްޓެމްބަރު މަހުގެ 30 ވަނަ ދުވަހުގައެވެ. ރައީސް މައުމޫނުގެ ކަފާލާތު ފީގެ ގޮތުގައި 60000 ރުފިޔާ ކްރިމިނަލް ކޯޓުގައި ވަނީ ބަހައްޓާފައެވެ.