ސްޕެނިޝް ލީގުގައި ރޭ އަމިއްލަ ދަނޑުގައި ސެވިއްޔާ އަތުން 4-2 އިން ބާސެލޯނާ މޮޅުވި މެޗުގެ ފުރަތަމަ ހާފުގެ ކުރީކޮޅު އެޓީމުގެ ކެޕްޓަން ލިއޮނަލް މެސީގެ އަތުގެ ކަށިކޮޅެއްގައި ރެނދުލައި ކުރިއަށް އޮތް އެލް ކްލެސިކޯގައި އަންނަ އާދީއްތަ ދުވަހު ރެއާލް މެޑްރިޑާ ދެކޮޅަށް ކުޅުމަށް ހަމަޖެހިފައިވާ މެޗުގައި ނުކުޅެވޭނެއެވެ.
ބާސާގެ ކޭމްޕް ނޯ ގައި ރޭ ކުޅުނު މެޗުގައި މެސީ އަށް އަނިޔާވީ ސެވިއްޔާގެ ފްރޭންކޯ ވަޒްކޭޒް އާ ދެ ކުޅުންތެރިން ބޯޅަ ހޯދަން މަސައްކަތްކުރި ވަގުތު، އަތްމައްޗަށް ވެއްޓިގެންނެވެ. މިމެޗުގައި ލިބުނު އަނިޔާއަށް ފަރުވާދިނުމަށްފަހު އިތުރަށް ކުޅުމާއިގެން ކުރިއަށް ނުދެވޭނެކަން ޔަޤީންވުމުން މެޗުގެ 26 ވަނަ މިނެޓުގައި މެސީ ބަދަލުކޮށްފައިވާއިރު އޭނާގެ ބަދަލުގައި ކުޅެން ނިކުތީ އޮސްމާނޭ ޑެމްބެލޭ އެވެ. މިއަނިޔާއާއި ގުޅިގެން މެސީ އަށް ތިން ހަފްތާއަށް ކުޅުމާއި ދުރުގައި ހުންނަން ޖެހޭނެއެވެ.
މިމެޗުގެ ދެވަނަ މިނެޓުގައި ބާސާ އަށް ލީޑް ނަގައިދިނީ ފިލިއްޕޭ ކުޓީނިއޯ އެވެ. މިއީ މެސީ ދިން ބޯޅައަކުން އޭނާ ކާމިޔާބުކުރި ގޯލެކެވެ. އޭގެ 10 މިނެޓުފަހުން، ލުއިސް ސުއަރޭޒް ތަނަވަސްކުރި ފުރުޞަތަކުން މެސީ ވަނީ ބާސާ އަށް ދެލަނޑުގެ ލީޑެއް ނަގައިދީފައެވެ. މިމެޗުގެ ފުރަތަމަ ހާފު ނިމުނީ 2-0 އިން ބާސާ ކުރީގައިއޮވެގެންނެވެ.
މެޗުގެ 63 ވަނަ މިނެޓުގައި ބާސާއަށް ލިބުނު ޕެނަލްޓީއަކުން ސުއަރޭޒް ވަނީ އެޓީމުގެ ލީޑް ފުޅާކޮށްދީފައެވެ. މިއީ ސުއަރޭޒް އަށް ސެވިއްޔާގެ ގޯލްކީޕަރު ތޯމަސް ވަޗްލިކް ކުރި ފައުލަކަށް ރެފްރީ ދިން ޕެނަލްޓީއެކެވެ.
މިމެޗުގައި ސެވިއްޔާއިން ކާމިޔާބުކުރި ފުރަތަމަ ގޯލަކީ ކުރިން އެޓީމަށް ކުޅުނު ކްލެމެން ލެންގްލޭ އަތުން ބައިކޮޅަށް ވަން ގޯލެކެވެ. އޭގެފަހުން، މެޗުގެ ފުރިހަމަ ވަގުތު ހަމަވާން ދެމިނެޓަށްވެފައިވަނިކޮށް ބާސާ އަށް އަލުން ތިން ލަނޑުގެ ލީޑް ހޯދައިދިނީ އިވާން ރަކިޓިޗް އެވެ. ސެވިއްޔާގެ ފަހު ގޯލް، މެޗުގެ އިތުރުވަގުތުގައި ޖަހައިދިނީ ލުއިސް މުރިއެލް އެވެ.
މިމުބާރާތުގައި ރޭ ވިޔާރެއާލް އާ ދެކޮޅަށް ރަށުން ބޭރުގައި އެތުލެޓިކޯ މެޑްރިޑް ކުޅުނު މެޗު ނިމުނީ 1-1 އިން ދެޓީމު އެއްވަރުވެގެންނެވެ. މިމެޗުގެ 51 ވަނަ މިނެޓުގައި އެތުލެޓިކޯ އަށް ބްރެޒިލްގެ ފުލްބެކް ފިލިއްޕޭ ލުއިސް ލީޑް ނަގައިދިން ނަމަވެސް ވިޔާރެއާލްގެ މާރިއޯ ގަސްޕާ ވަނީ 65 ވަނަ މިނެޓުގައި އެޓީމަށް އެއްވަރުކޮށްދީފައެވެ. ސްޕެނިޝް ލީގުގައި ރޭ ކުޅެވުނު އަނެއް މެޗުގައި އަމިއްލަ ދަނޑުގައި ވެލެންސިއާ ވަނީ ލެގާނެސް އާ 1-1 އިން އެއްވަރުވެފައެވެ. މިމެޗުގެ 63 ވަނަ މިނެޓުގައި ލެގާނެސް އަށް ލީޑް ނަގައިދިނީ ލިބުނު ޕެނަލްޓީއަކުން ޖެރަޑް ގުމްބާއު އެވެ. ވެލެންސިއާ އަށް ނަތީޖާ ހަމަހަމަކޮށްދިނީ މެޗު ނިމެން ފަސްމިނެޓަށްވެފައިވަނިކޮށް ސްޕެއިނުގެ ފުލްބެކް ހޯސޭ ގާޔާ އެވެ.
ލަލީގާގައި ރޭ ކުޅުނު މެޗުތަކަށްފަހު، 18 ޕޮއިންޓް ހަމަކޮށް ބާސެލޯނާ އަލުން އެއްވަނަ އަށް އެރިއިރު ވާދަވެރި ރެއާލް މެޑްރިޑް އޮތީ 14 ޕޮއިންޓާއެކު ފަސްވަނައިގައެވެ. 17 ޕޮއިންޓާއެކު ޑިޕޯޓިވޯ އަލަވެސް ދެވަނައިގައި އޮތްއިރު 16 ޕޮއިންޓާއެކު ތިންވަނައިގައި އޮތީ ބާސާ އަތުން ބަލިވި ސެވިއްޔާއެވެ. އެތުލެޓިކޯ އަށް ވެސް މިއަދަދަށް ޕޮއިންޓް ލިބިފައިވާއިރު ސެވިއްޔާ އަށް ކުރި ލިބެނީ ގޯލްގެ ތަފާތުންނެވެ.