ސ. ގަން އިންޓަނޭޝަނަލް އެއަޕޯޓުން ވަރަށް އަވަހަށް ބައިނަލް އަޤްވާމީ ދަތުރުތައް ފަށާނެ ކަމަށް ކުރީގެ އެކްޓިން ޓްރާންސްޕޯޓް މިނިސްޓަރު އަދި ޑިފެންސް މިނިސްޓަރު މުހައްމަދު ނާޒިމް ވިދާޅުވެފައި ވަނިކޮށް މޯލްޑިވިއަން އިން މިހާރު ދައްކަމުން އަންނަ ވާހަކަތަކަކީ ގަން އެެއާޕޯޓަށް އިންޓަނަޝަލް އޮޕަރޭޝަންތައް ފެށުމުގައި ސަރުކާރުގެ އިހުލާސްތެރި ކަމެއް ނެތުން ކަމަށް އައްޑޫ ސިޓީ ކައުންސިލުން ބުނެފި އެވެ.
ކައުންސިލުން މިހެން ބުނީ އިއްޔެ ނެރުނު ނޫސް ބަޔާނެއްގަ އެވެ.
"ނާޒިމް އިއުލާން ކުރެއްވީ ސަރުކާރުގެ ޕޮލިސީ ކަމަށް ވެދާނެއެވެ. އެހެންނަމަވެސް މިކަމުގައިވެސް މިސަރުކާރުގެ އިޚްލާސްތެރިކަމެއް ނެތްކަން ހާމަވަ ނީ، އިއްޔެގެ ހަވީރު ނޫހުގެ އޮންލައިންގައި ޝާއިއުކޮށްފައިވާ ލިއުމަކުންނެެވެ. އެ ލިއުމުގައިވާ ގޮތުން ގައުމީ އެއަރލައިން، މޯލްޑިވިއަން، ގަމުގެ އެއަރޕޯޓް ބައިނަލް އަގްވާމީ ދަތުރުތަކަށް ބޭރުގެ އެ އަލައިންތަކަށް ހުޅުވާލަން ދެކޮޅު ހަދަ އެވެ. މީގެ މާނައަކީ، ސަރުކާރުން ގަން އެއަރޕޯޓް ބޭރުގެ އުދުހުންތަކަށް ދެކޮޅު ހަދާ ކަމެވެ." ބަޔާނުގައިވެ އެވެ.
"ގަން އިންޓަނޭޝަނަލް އެއަރޕޯޓުން ބައިނަލްއަޤްވާމީ ދަތުރުތައް ފެށުމަކީ، އަބަދުވެސް އައްޑޫ ރައްޔިތުންގެ އުންމީދެކެވެ. ނަމަވެސް އަދާ ހަމައަށްވެސް މިކަން ވަނީ ހަގީގަތަކަށް ނުވެފަ އެވެ. މިއީ އައްޑޫ ރައްޔިތުން ވިސްނާލަން ޖެހޭ ކަމެކެވެ. ރާއްޖޭން ބޭރުން ސީދާ އަންނަ ފްލައިޓްތަކާއި، ޖެޓްތައް ގިނަ އަދަދަކަށް ޖައްސާ ގަމުގެ އެއަރޕޯޓުން ބޭރަށް ދަތުރުކުރެވޭނެ ފުރުސަތެއް ލިބުމަކީ، އައްޑޫ ރައްޔިތުން އެދިއެދި ތިބި ކަމެކެވެ. އެކަމަކު އެ އުންމީދު ހަގީގަތަކަށް ނުވެ 30 އަހަރުގެ ދިގު މާޒީއެއް ވަނީ ފާއިތުވެގެން ގޮސްފައެވެ. ރައީސް މައުމޫންގެ ވެރިކަމުގައި، އައްޑޫ ރައްޔިތުންނަށް ތަރައްގީގެ އެކި ހުވަފެންތައް ދެއްކިއެެވެ. ކޮންމެ ފަސްއަހަރަކުން އެއްފަހަރު އައްޑޫއަަށް އިގްތިސާދީ ބޮޑު ތަރައްޤީއެއްގެ ކުލަވަރު ފެނިގެންދެ އެވެ. ރިޒޯޓްތައް ހެދޭނެ ވާހަކައާއި، އެއަޕޯޓް އިންޓަރނޭޝަނަލް ވާނެ ވާހަކަ ދައްކަ އެވެ."
ކައުންސިލުން ބުނީ ގަން އިންޓަނޭޝަނަލް އެއަޕޯޓްގައި އިންޓަނޭޝަނަލް ނަން ބޯޑު އަޅުވައިގެން ތިއްބާ ހަނިމާދޫން އިންޑިއާ އަށް ދަތުރުތައް ވަނީ ފަށާފައިވާ ކަމަށާއި މިކަމުން ދޭހަ ވަނީ، އައްޑޫ ރައްޔިތުންނާ މެދު ސަރުކާރުގެ އިޚްލާސްތެރިކަމެއް ނެތްކަން ކަމަށެވެ.
"އައްޑޫގެ ތަރައްގީގެ ވާހަކައަކީ، ސިޔާސީ ވެރިންގެ އިންތިޚާބީ އެޖެންޑާއި އެންމެ ކުރިއަށް ލިއެފައި އޮންނަ ވާހަކައެވެ. ގާސިމް އިބްރާހީމަކީވެސް މިއަހަރުގެ ރިޔާސީ އިންތިޚާބުގައި ވަދަކުރައްވާނެކަން އިއުލާން ކުރެއްވުމަށްފަހު އައްޑުއަށް ވަޑައިގެން އައްޑޫގެ ތަރައްގީއަށް ކަންކަން ކޮށްދެއްްވާނެކަން އިއުލާންކުރައްވަފައިވާ ބޭފުޅެކެވެ.
ގާސިމްގެ އެޖެންޑާގައިވެސް ގަމުގެ އެއަރޕޯޓްގެ ވާހަކަ އޮންނާނެއެވެ. ޓްރާންސްޕޯޓް މިނިސްޓަރަކަށް ގާސިމް އިބްރާހީމްގެ ޖުމްހޫރީޕާޓީގެ ބޭފުޅަކު ހުރުމުން ގަމުގެ އެއަރޕޯޓް އަނެއްކާވެސް ސިޔާސީ ކުޅިވަރަކަށް ހަދާލަން ގާސިމް އިބްރާހީމްވެސް މަސައްކަތްކުރައްވަފާނެއެވެ. އައްޑޫ ރައްޔިތުން އެދެނީ، ގަމުން ބައިނަލް އަގްވާމީ ދަތުރުތައް ފެށި، އައްޑޫ ރައްޔިތުންނަށް ވިޔަފާރީގެ ކުރިއެރުން ލިބިގެން ދިއުމެވެ." ބަޔާނުގައިވެ އެވެ. "ނާޒިމްގެ އެކްޓިން މިނިސްޓަރުކަމުގައި، ގަމުން ވަރަށް އަވަހަށް ބައިނަލް އަގްވާމީ ދަތުރުތައް ފެށޭނެ ކަން ހާމަކޮށްފައި ވަނިކޮށް، މި މަޝްރޫޢު ލަސްވުމުގައި ވެރިކަމަށް ވާދަކުރައްވާ ސިޔާސީ ފަރާތްތަކުގެ މަސްލަހަތު ފުށުއެރުން ސަބަބަކަށް ވެދާނެއެވެ. ސިޔާސީ ވެރިންނަށް އާދޭސް ދަންނަވައި އެބޭފުޅުންގެ ހެއުފުޅުކަމުން ކަންކަން ކޮށްދެއްވަނީކަން ރައްޔިތުނަށް ވިސްނައިދެއްވުމަކީ، މީގެ ސަބަބަކަށް ވުމަކީ އެކަށީގެންވާ ކަމެކެވެ. މިކަންކަމަކީ، ދެން އައްޑޫ ރައްޔިތުން ތަހައްމަލުކުރަން ބޭނުންވާނެ ކަންކަމެއް ނޫންކަން މި ފުރުސަތުގައި ދަންނަވަމެވެ."
ކައުންސިލުން އަދި ބުނީ ރައީސް ވަހީދު އައްޑު އަށް ވަޑައިގެން، އައްޑޫގެ ތަރައްގީއަށްޓަކައި ފަށްޓަވައި ދެއްވި އާ ކަމެއް ނެތް ކަމަށާއި މަގު ހެދުމާއި، ސާފު ބޯފެނުގެ މަޝްރޫއަކީ، ކުރީގެ ރައީސް މުހައްމަދު ނަޝީދުގެ ސަރުކާރުން ފަށްޓަވާފައިވާ ކަންކަން ކަމަށެވެ. އަދި އައްޑޫ ރައްޔިތުން އެންމެ ބޮޑަށް ބޭނުން ވަނީ މާލެ ނުގޮސް ރާއްޖޭން ބޭރަށް ދަތުރު ކުރެވޭނެ އިންތިޒާމްތަކެއް ހަމަޖެހިގެން ދިއުން ކަމަށެވެ.
"ރައީސް ވަހީދު މިމަހުގެ ފަހުކޮޅު އައްޑުއަށް ވަޑައިގަންނަވާނެކަމުގެ އަޑުތައް އޮތް އިރު، އައްޑޫ ރައްޔިތުންގެ އެދުމަކީ، ގަމުގެ އެއަރޕޯޓުން ބޭރުގެ ދަތުރުތައް ކުރެވޭނެ އިންތިޒާމް ހަގީގަތަކަށް ވެގެންދިއުމެވެ." ބަޔާނުގައިވެ އެވެ.