ކާމިޔާބުގައި ހިތްތިރި ކުރެއްވުމަށާއި އާންމު މަސްލަހަތު ދެމެހެއްޓުމަށް އިލެކްޝަންސް ކޮމިޝަން(އީސީ)ގެ މެމްބަރު އިސްމާއީލް ހަބީބު އިލްތިމާސް ކުރައްވައިފިއެވެ.
މިއަދު ރައީސް އަބްދުﷲ ޔާމީން އެދިވަޑައިގެންނެވި ގޮތަށް އިންތިހާބު ބާތިލު ކުރެވެން ނެތް ކަމަށް ކަނޑައަޅައި ސްޕްރީމް ކޯޓުން ހުކުމް ކުރުމާއި ގުޅިގެން ކޯޓުން ނިކުންނެވުމަށްފަހު މީޑިއާއާއި ބައްދަލު ކުރައްވާ ދެއްކެވި ވާހަކަތަކުގައި ހަބީބް ވަނީ އީސީއާއެކު ތިއްބެވި އެ ބޭފުޅުންނަށް އިތުބާރު ކުރެއްވި ހުރިހާ ފަރާތްތަކަށް ޝުކުރު އަދާ ކުރައްވާފައެވެ.
ހަބީބް ވިދާޅުވީ ސެޕްޓެމްބަރު 23 ގައި ރާއްޖޭގައި ބޭއްވުނު ރިޔާސީ އިންތިޚާބަކީ ބާތިލްކުރަންޖެހޭ އިންތިޚާބެއް ކަމަށް ބުނާނީ ބުއްދި ސަލާމަތުންނެތް ފަރާތަކުން ކަމަށެވެ. އަދި ކޯޓުން އިންތިޚާބު ބާތިލް ކުރާނެ ކަމަށް ގަބޫލު ކުރާނީވެސް ހަމަ ބުއްދި ސަލާމަތުން ނެތް ބަޔަކު ކަމަށެވެ.
ދިވެހިންގެ ނިންމުން އެއީ ރަނގަޅު ނިންމުމެއް ކަމަށް ސުޕްރީމް ކޯޓުން ނިންމުމާއި ގުޅިގެން ސުޕްރީމް ކޯޓު ސަރަހައްދަށް ގިނަ އަދަދެއްގެ ރައްޔިތުން ދަނީ އެއްވެ އުފާފާޅުކުރަމުންނެވެ.