އިޓާލިއަން ސެރިއޭގައި މިލާންއަށް ނިސްބަތްވާ ދެ ކްލަބްގެ މެދުގައި ރޭ ކުޅެވުނު ފޯރިގަދަ ޑާބީ މެޗުގެ ފަހު ވަގުތު އާޖެންޓީނާގެ ފޯވާޑް މައުރޯ އިކާޑީ ކާމިޔާބުކުރި ގޯލުން އޭސީ މިލާންގެ މައްޗަށް އިންޓަ މިލާނުން ކުރި ހޯދައިފިއެވެ. މިމެޗުން އިންޓަ މޮޅުވީ 1-0 އިންނެވެ.
މިމެޗުން ހޯދީ މޮޅާއެކު އިންޓަ ވަނީ 9 މެޗުން 19 ޕޮއިންޓް ހަމަކޮށް ލީގު ތާވަލްގެ ތިންވަނައަށް ޖެހިލައިފައެވެ. އެއްވަނައިގައި 25 ޕޮއިންޓާ އެކު ޔުވެންޓަސް އޮތްއިރު ނަޕޯލީ އޮތީ 21 ޕޮއިންޓާއެކު ދެވަނައިގައެވެ. ވާދަވެރި މިލާން އޮތީ 12 ޕޮއިންޓާ އެކު 12 ވަނައިގަ އެވެ.
މިލާނުން މިމެޗަށް ނިކުތީ ލީގުގައި އެޓީމު އެންމެފަހުން ކުޅުނު މެޗުގެ ފުރަތަމަ އެގާރައަށް ދެ ބަދަލެއް ގެނެސްގެންނެވެ. އެގޮތުން، އެޓީމުގެ ކްރިސްޓިއަން ޒަޕާޓާ އާއި އިގްނާޒިއޯ އަބާޓޭގެ ބަދަލުގައި އަލޭސިއޯ ރޮމަނޯލީ އަދި ޑެވިޑޭ ކަލާބްރިއާ އަށް ވަނީ ފުރަތަމަ އެގާރައިން ޖާގަ ދީފައެވެ.
އިންޓަ އިން މިމެޗަށް ނިކުތްއިރު އެޓީމުގެ ފަހަތަށްކުޅޭ ބްރެޒިލްގެ ޑިފެންޑަރު މިރަންޑާގެ ބަދަލުގައި ހޮލެންޑްގެ ސްޓެފަން ޑި ވްރާ އާއި މިޑްފީލްޑްގައި ކުޅުނު ބޯރްހާ ވަލޭރޯގެ ބަދަލުގައި މާސެލޯ ބްރޮޒޮވިޗަށް ފުރަތަމަ އެގާރައިން ފުރުޞަތު ދީފައިވެއެވެ.
ދެ ޓީމަށް ނިސްބަތްވާ ސެންސީރޯ ސްޓޭޑިއަމުގައި ރޭ ކުޅުނު މި މެޗުގެ ފުރަތަމަ ހާފުގައި ދެޓީމުގެ ފަރާތުން ފޯރިގަދަ ކުޅުމެއް ފެނިގެންދިޔައިރު، 10 ވަނަ މިނެޓުގައި އިންޓަގެ ކެޕްޓަން އިކާޑީ ގޯލެއް ކާމިޔާބުކުރި ނަމަވެސް ރެފްރީ ވަނީ އޮފްސައިޑް ކަމަށް ނިންމާފައެވެ.
އޭގެފަހުން، މެޗުގެ 22 ވަނަ މިނެޓުގައި އިންޓަގެ ކްރޮއޭޝިއާ ވިންގާ އިވާން ޕެރިސިޗަށް ލަނޑުޖެހުމަށް ލިބުނު ފުރުޞަތުގައި ސިމޭ ވްރިޝާލްކޯ ތަނަވަސްކުރި ފުރުޞަތަކުން އޭނާ ބޮލުން ފޮނުވާލި ބޯޅަ މިލާންގެ އިތުބާރު ކީޕަރު ޖިއާންލުއިޖީ ޑޮނަރުއްމާ މަތަކުރިއެވެ.
އޭގެ މިނެޓެއްފަހުން، މިލާން އަށް ލިބުނު ހިލޭޖެހުމަކުން ތުރުކީގެ ހަކާން ޗާހަނޮގްލޫ ފޮނުވާލި ބޯޅަ ދިޔައީ ގޯލްގެ ދަނޑިކައިރިން ބޭރަށެވެ.
މެޗުގެ 30 ވަނަ މިނެޓުގައި އިންޓަގެ ރަޖާ ނައިންގޮލަން އަށް ލިބުނު އަނިޔާއަކާ ގުޅިގެން ބަދަލުކުރުމުން އެޓީމަށް ކޮންމެވެސް ވަރަކަށް މައްސަލަތައް ދިމާވިއެވެ. އޭނާގެ ބަދަލުގައި ކުޅެން ނިކުތީ ބޯރްހާ ވަލޭރޯ އެވެ.
މިހާފުގައި އިންޓަގެ ޑި ވްރާ އަށް ލިބުނު ފުރުޞަތެއްގައި އޭނާ ފޮނުވާލި ބޯޅައެއް ގޯލްގެ ދަނޑީގައި ޖެހުނުއިރު މަޓިއަސް ވެސީނޯ ފޮނުވާލި ހަމަލާ މިލާންގެ ކީޕަރު ޑޮނަރުއްމާ ވަނީ މަތަކޮށްފައެވެ.
ފުރަތަމަ ހާފު ނިމުމުގެ ކުރީން، މިލާންގެ ރޮމަނޯލީ ގޯލެއް ކާމިޔާބުކުރިއެވެ. ސޫސޯ ތަނަވަސްކުރި ފުރުޞަތަކުން ޕެނަލްޓީއޭރިޔާތެރެއަށް ހުރަސްވީ ބޯޅަ މަޓެއޯ މުސާޗިއޯގެ ބޮލުގައި ޖެހިފައި އައިއިރު ރޮމަނޯލީ އަށް ހުރެވުނީ އޮފްސައިޑް މަގާމެއްގައި ކަމަށްވާތީވެ ރެފްރީ އެލަނޑު ޤަބޫލެއްނުކުރިއެވެ. މިހާފު ނިމުނީ ދެޓީމަށް ލަނޑެއްނުޖެހި އެއްވަރުވެގެންނެވެ.
ދެވަނަ ހާފު ފެށިގެން އިންޓަ އިން މިލާންގެ ޑިފެންސަށް އުނދަގޫތައް ކުރިމަތިކުރި ނަމަވެސް ލަނޑެއް ކާމިޔާބުކުރެވޭގޮތެއްނުވިއެވެ. މިހާފުގައި، މިލާންގެ ސޫސޯ އަށް ލަނޑުޖެހުމަށް ލިބުނު ފުރުޞަތުގައި އޭނާ ފޮނުވާލި ބޯޅަ އިންޓަގެ ގޯލްކީޕަރު ސާމިރް ހަންޑަނޮވިޗް މަތަކުރިއިރު އިންޓަގެ އިކާޑީ ފޮނުވާލި ހަމަލާގެ ހުރަހަކަށްވީ މިލާން ކީޕަރު ޑޮނަރުއްމާ އެވެ.
މިމެޗުގެ އިތުރުވަގުތުގައި އިންޓަ މޮޅުކޮށްދިނީ ވެސީނޯ ނަގައިދިން ހުރަހަކުން ލިބުނު ބޯޅައެއް ބޮލުން ފޮނުވާލައިގެން އިކާޑީ އެވެ. މިއީ މިލާނާ ދެކޮޅަށް އިންޓަ އެންމެ ފަހުން ކުޅުނު ހަތަރު މެޗުގައި އޭނާ ކާމިޔާބުކުރި ފަސްވަނަ ގޯލެވެ.
މިމުބާރާތުގައި އިއްޔެ ކުޅުނު އެހެން މެޗުތަކުގެ ނަތީޖާއަށް ބަލާއިރު، ފްރޮސިނޯނޭ އާ އެމްޕޯލީ ބައްދަލުކުރި މެޗު 3-3 އިން އެއްވަރުވިއިރު ޓޮރީނޯ އާ ބޮލޯނިއާ ކުޅުނު މެޗު ނިމުނީ 2-2 އިން އެއްވަރުވެގެންނެވެ. ކިއޭވޯ ވެރޯނާ އަތުން 5-1 ގެ ތަފާތު ބޮޑު ނަތީޖާއަކުން އެޓަލާންޓާ މޮޅުވިއިރު ޕާމާ އަތުން ލާޒިއޯ މޮޅުވީ 2-0 އިންނެވެ. ކަލިއާރީ އާ ފިއޮރެންޓީނާ ބައްދަލުކުރި މެޗު ނިމުނީ 1-1 އިން އެއްވަރުވެގެންނެވެ.