އައްޑޫގެ ފެނުގެ ނިޒާމްގެ މަސައްކަތް ނިންމުމަށް 350،000 ޑޮލަރު (3.4 މިލިޔަން ރުފިޔާ) ގެ އެެއްބަސްވުމެއްގައި ފެނަކަ ކޯޕްރޭޝަނާއި އެންވަޔަރަމަންޓް މިނިސްޓްރީ އާ ދެމެދު އެއްބަސްވުމެއްގައި ސޮއިކޮށްފި އެވެ.
އެންވަޔަރަމެންޓް މިނިސްޓްރީގައި އިއްޔެ ބޭއްވި ރަސްމިއްޔާތެެއްގައި ފެނަކަ ކޯޕަރޭޝަންގެ ފަރާތުން އެއްބަސްވުމުގައި ސޮއި ކުރެއްވީ މެނޭޖިން ޑިރެކްޓަރު މުހައްމަދު ނިމާލު އެވެ. އަދި މިނިސްޓްރީގެ ފަރާތުން ސޮއި ކުރެއްވީ އެ މިނިސްޓްރީގެ ސްޓޭޓް މިނިސްޓަރު އަބްދުލް މަތީން މުހައްމަދު އެވެ.
މަތީން ވިދާޅުވީ ފެނަކަ ކޯޕަރޭޝަނާ ހަވާލު ކުރި އެ މަސައްކަތަކީ އިނގިރޭސިވަލާތުގެ ބައިވޯޓާ ކުންފުންޏާއި ދިވެހި ސަރުކާރާއި ގުޅިގެން ކުރިއަށް ގެންދަން ނިންމާފައިވާ މަސައްކަތެއް ކަމަށެވެ.
އެ އެއްބަސްވުމުގައިވާ ގޮތުން އެ މަސައްކަތަށް ދިވެހި ސަރުކާރުން 15 މިލިޔަން ޑޮލަރު ހޭދަކުރަން ޖެހޭ އިރު ބައިވޯޓާ ކުންފުނިން 27 މިލިޔަން ޑޮލަރު ހޭދަކުރަން ޖެހޭނެ ކަމަށް ވެސް މަތީން ވިދާޅުވި އެވެ.
މަތީން ވިދާޅުވީ އެގޮތަށް އެއްބަސް ވެފައިވީ ނަމަވެސް ބައެއް ދަތިތަކާ ހުރެ އެއްބަސްވި ގޮތަށް އެ ޕްރޮޖެކްޓަށް 27 މިލިޔަން ޑޮލަރު ހޭދަ ނުކުރެވޭނެ ކަމަށް 2011 ވަނަ އަހަރުގެތެރޭގައި ބައިވޯޓާ ކުންފުނިން ސަރުކާރަށް އަންގާފައިވާ ކަމަށް މަތީން ވިދާޅުވި އެވެ.
ނިމާލު ވިދާޅުވީ އެ ކުންފުނީގެ މަގުސަދަކީ ވީހާވެސް އަވަހަކަށް މަސައްކަތް ނިންމުން ކަމަށެވެ. އެގޮތުން ބައިވޯޓާ ކުންފުންޏާ ގުޅިގެން އިނގިރޭސިވިލާތުން ގެންނަން ޖެހޭ ސާމާނު ގެނައުމުގެ މަސައްކަތް ކުރަމުން އަންނަ ކަމަށް އޭނާ ވިދާޅުވި އެވެ.