އައްޑޫ ސިޓީ ހިތަދޫ ކޯއްޓޭ އާ ދިމާލުގައި މަސްވެރިކަން ކުރަން ނިކުމެ އުޅުން ދޯންޏެއްގެ އިންޖީނު ހުއްޓި ހާލުގައި ޖެހިފައިވަނިކޮށް އެމްއެންޑީއެފް އިން އެހީތެރިކަން ފޯރުކޮށްދޭން ފަށައިފިއެވެ.
"އަންފާލް" ނަމަކަށް ކިޔާ މަސް ދޯނީގެ އިންޖީނު ހުއްޓި ހާލުގައި ޖެހުނު މައުލޫމާތު އެމްއެންޑީއެފަށް ލިބުނީ ރޭ މެންދަމު 3:45 ހާއިރުކަމަށް އެމްއެންޑީއެފުން މައުލޫމާތުދެއެވެ. އެހަބަރު ލިބުމާއެކު އެމްއެންޑީއެފް ސަދަން އޭރިއާ ކޯސްޓްގާޑް ސްކޮޑްރަންއަށް ލިބުމާއެކު ސިފައިން އެސަރަހައްދުގައި ހަރަކާތްތެރިވާން ފަށާފައިވާކަމަށް އެމްއެންޑީއެފް އިން ބުނެއެވެ.
އެމްއެންޑީއެފް އިން އިތުރަށް ބުނީ، އައްޑޫ ސިޓީ ހިތަދޫގެ ކޯއްޓޭ ސަރަޙައްދުން 6 ނޯޓިކަލް މޭލު ބޭރުގައި މަސްވެރިކަން ކުރަން އުޅެނިކޮށް އެދޯނީގެ އިންޖީނު ހުއްޓުނީ ސްޓާޓިންގ މޯޓަރުގެ އިސްކުރެއް ބިންދައިގެން ގޮސްގެންކަމަށެވެ.
އެހާދިސާ ހިނގިއިރު ދޯނީގައި ތިބީ ހަތަރު ދިވެހިންކަމަށް އެމްއެންޑީއެފް އިން ބުނެއެވެ. އަދި އެ މަސް ދޯނި ކަފުޖަހާނެ ދޯންޏެއް ހޯދުމުގެ މަސައްކަތް ދޯނީގެ ވެރިފަރާތުން މިހާރު ކުރަމުން އަންނައިރު އެ ދޯނި އޮތް ސަރަޙައްދުގައި އެމްއެންޑީއެފް ސަދަން އޭރިއާ ކޯސްޓްގާޑް ސްކޮޑްރަންގެ ލޯންޗެއް ވެސް ހަރަކާތްތެރިވަމުން އަންނަކަމަށް އެމްއެންޑީއެފް އިން ބުނެއެވެ.