ހިއުމަން ރައިޓްސް ކޮމިޝަނުގެ ނޭޝަނަލް ޕްރިވެންޓިވް މެކޭނިޒަމް (އެން.ޕީ.އެމް)އިން ކ.ދޫނިދޫ ޕޮލިސް ކަސްޓޯޑިއަލް އަށް ޒިޔާރަތެއް ކޮށްފިއެވެ.
އާދިއްތަ ދުވަހު ކުރި މިޒިޔާރާތުގެ މައިގަނޑު މަގްސަދަކީ ތަހުގީގަށް ބަންދުކުރެވޭ މީހުން ބަންދުގައި ބައިތިއްބާއިރު އެމީހުންނާއި ދޭތެރޭ އަނިޔާވެރި ލާއިންސާނީ ނުވަތަ ދަށުދަރަޖައިގެ އަމަލެއް ހިނގާތޯ ބެލުމަށް ކަމަށް އެޗްއާރްސީއެމުން ބުނެފައިވެއެވެ. މީގެ އިތުރުން ދައުލަތުގެ ބެލުމުގެދަށުގައި ބައިތިއްބާފައި ތިބޭ މީހުންނަށް ލިބިދީފައިވާ އިންސާނީ ހައްގެއް ގެއްލޭފަދަ ކަމެއް ހިނގާތޯބަލާ މިނިވަންކަން ގެއްލޭގޮތަށް ބަންދުގައި ބައިތިއްބާ މީހުންގެ އާންމު ހާލަތާއި، މުވައްޒަފުންގެ ހާލަތު ދެނެގަތުން ކަމަށް ވެސް އެ ކޮމިޝަނުން ބުނެފައިވެއެވެ.
އެޗްއާރްސީއެމުން ބުނީ ކޮމިޝަނުން އާންމުކޮށް އަމަލު ކުރަމުންދާ އުސޫލުގެމަތިން މިޒިޔާރަތުގައި ފާހަގަ ކުރެވުނު މުހިންމު ކަންކަމުގެ މައްޗަށް އެކުލަވާލާ ރިޕޯޓު، ދުނިދޫ ޕޮލިސް ކަސްޓޯޑިއަލްއަށާއި، މޯލްޑިވްސް ޕޮލިސް ސާރވިސް އަދި ކަމާގުޅޭ އެހެނިހެން އިދާރާތަކާ ހިއްސާކުރާނެ ކަމަށެވެ.
އަދި ކޮމިޝަނުގެ ރިޕޯޓުގައި ފާހަގަ ކޮށްފައިވާ ކަންކަމާއި، އިސްލާހު ކުރުމަށް ހުށަހަޅާފައިވާ ހުށައެޅުންތަކާ ގުޅޭގޮތުން މޯލްޑިވްސް ޕޮލިސް ސާރވިސް އާއި ބައްދަލުކޮށް، މިރިޕޯޓުގެ ހުށައެޅުންތައް ތަންފީޒުވަމުންދާ މިންވަރު ދެނެގަތުމަށް ލިޔުމުން އަހަރަކު ދެފަހަރު ފޮލޯއަޕް ހެދުމަށް ކޮމިޝަނުން ވަނީ ކަނޑައަޅާފައިވާ ކަމަށް ވެސް އެޗްއާރްސީއެމުން މައުލޫމާތުދެއެވެ.
މިފަދަ ޒިޔާރަތްތައް ދޭތެރެ ދޭތެރެއިން ޖަލުތަކަށް އެޗްއާރްސީއެމުން ކުރަމުން ދެއެވެ. އަދި އެ ފަރާތުން ބެއްލެވުމަށްފަހު ނެރޭ ރިޕޯޓުން ރަނގަޅުކުރަންޖެހޭ ކަންތައް ފާހަގަވެ އެކަންތަކަށް ކަމާބެހޭ ފަރާތްތަކުން ސަމާލުކަން ދެމުންދާކަން ވެސް ފާހަގަކުރެވެއެވެ.