ޕީއެސްއެމްގެ 3 ވެރިޔަކާ ދެކޮޅަށް އެތަނުގެ މުވައްޒަފެއް ކަމަށްވާ މުހައްމަދު އަފްސަލް އަބުރުގެ މައްސަލައެއް ފުލުހުންނަށް ހުށަހަޅައިފިއެވެ.
އަފްސަލް މައްސަލަ ހުށަހަޅާފައިވަނީ ޕީއެސްއެމްގެ މެނޭޖިން ޑައިރެކްޓަރު އިބްރާހީމް ހަލީލާއި، ޑެޕިއުޓީ މެނޭޖިން ޑައިރެކްޓަރު މުހައްމަދު އިކްރާމް އަބްދުލް ލަތީފާއި، އަދި ޕީއެސްއެމްގެ ޑިރެކްޓަ އޮފް ނިއުސް ފަޔާޒު ޔޫސުފުއާއި ދެކޮޅަށެވެ.
އެ ތިން ބޭފުޅުންގެ މައްޗަށް އަބުރުގެ މައްސަލައެއް އަފްސަލް ފުލުހުންނަށް ހުށަހަޅާފައިވަނީ ހަގީގަތް އޮޅުވާލާ، ސާބިތު ނުހިފޭ ދޮގު ވާހަކަ ދައްކާ އޭނާގެ ބޮލުގައި އިލްޒާމުތަކެއް އަޅުވާފައިވާ ކަމަށް ބުނެއެވެ. އެ މައްސަލާގައި އެ ތިން ބޭފުޅުންގެ އެ އަމަލުތަކުގެ ސަބަބުން އޭނާއާއި އެކު މަސައްކަތް ކުރާ މީހުން އޭނާއާއި އެކި ސުވާލުތައްކޮށް، އޭނާއާއި މެދު މީހުން ދެކެމުން އައި ގޮތް ބަދަލުވެ އޭނާގެ އަބުރަށާއި އިއްޒަތަށް ގެއްލުން ވެފައިވާ ކަމަށް ބުނެފައިވެއެވެ.
ދިވެހިރާއްޖޭގެ އަޑު އަދި ފަހުން ޕީއެސްއެމްގައި ގިނަ ދުވަސްތަކެއް ވަންދެން ނޫސްވެރިއެއްގެ ގޮތުގައި ހަރަކާތްތެރިވަމުން ދިޔަ އަފްސަލު ވަނީ މިދިޔަ އޮގަސްޓު މަހުގެ 27 ވަނަ ދުވަހުން ފެށިގެން ޕީއެސްއެމްގެ ނިއުސް ރޫމުން ބޭރުކޮށް ރޭޑިއޯ ޕްރޮގުރާމްސް ބަޔަށް ލާފައެވެ.
ރޭޑިއޯ ޕްރޮގުރާމްސް ބަޔަށް އަފްސަލު ބަދަލު ކުރި އިރު އޭނާ ހުރީ ނިއުސް އެޑިޓަރެއްގެ މަގާމުގައި ކަމަށް މައުލޫމާތު ލިބެއެވެ.