އިނގިރޭސި ޕްރިމިއާ ލީގުގައި ރޭ ލެސްޓަރ ސިޓީ އަތުން އަމިއްލަ ދަނޑުގައި މޮޅުވެ އާސެނަލުން މިސީޒަނުގައި ވިދިވިދިގެން މޮޅުވަމުން އަންނަ މެޗުތަކުގެ އަދަދު 10 އަށް އިތުރުކޮށްފިއެވެ. އާސެނަލުން މިމެޗު ކާމިޔާބުކުރީ 3-1 އިންނެވެ.
މިއީ 2007 ވަނަ އަހަރަށް ފަހު އާސެނަލުން ހުރިހާ މުބާރާތެއްގައި ޖެހިޖެހިގެން 10 މެޗުން މޮޅުވި ފުރަަތަމަ ފަހަރެވެ. މީގެއިތުރުން، މިއީ ލީގުގައި އެޓީމު ވިދިވިދިގެން މޮޅުވި 7 ވަނަ މެޗެވެ.
މިމެޗުން ހޯދީ މޮޅާއެކު އާސެނަލް ވަނީ ލީގު ތާވަލްގެ ހަތަރުވަނަ އަށް ޖެހިލައިފައެވެ. އެއީ ކުޅުނު 9 މެޗުން 21 ޕޮއިންޓް ހަމަކޮށްގެންނެވެ. ތިންވަނައިގައި އޮތް ޗެލްސީ އާ ފަސްވަނައިގައި އޮތް ޓޮޓެންހަމް ހޮޓްސްޕާ އަށް ވެސް މިއަދަދަށް ޕޮއިންޓް ލިބިފައިވާއިރު ޗެލްސީ އަށް ކުރި ލިބެނީ ފައިދާ ގޯލްގެ ތަފާތުންނެވެ. އެއްވަނައިގައި އުޅޭ މެންޗެސްޓަރ ސިޓީ އާއި ދެވަނައިގައި އޮތް ލިވަޕޫލަށް 23 ޕޮއިންޓް ލިބިފައިވާއިރު ސިޓީ އަށް ކުރި ލިބެނީ ފައިދާ ގޯލްގެ ތަފާތުންނެވެ.
ލަންޑަންގެ އެމިރޭޓްސް ސްޓޭޑިއަމްގައި ކުޅެވުނު މިމެޗުގެ 31 ވަނަ މިނެޓުގައި ކުރީން ލީޑް ނެގީ ލެސްޓަރ އިންނެވެ. މިއީ ލެސްޓަރ އަށް ކުޅޭ އިނގިރޭސި ވިލާތުގެ ފުލްބެކް ބެން ޗިލްވެލް ފޮނުވާލި ހަމަލާއެއް އާސެނަލްގެ ފުލްބެކް ހެކްޓަ ބެލަރީން ދިފާއުކުރަން އުޅުމުގެ ތެރޭގައި އޭނާ އަތުން ބައިކޮޅަށް ވަން ގޯލެކެވެ.
ލެސްޓަރގެ ގޯލުގެ ކުރީން، އެޓީމުގެ ހެރީ މެގުއަޔާ އަށް ލަނޑުޖެހުމަށް ވަރަށް ރަނގަޅު ފުރުޞަތެއްލިބި ބޭކާރުވެފައިވެއެވެ. އެގޮތުން، އެޓީމުގެ ޖޭމްސް މެޑިސަން ނަގައިދިން ހުރަހަކުން މެގުއަޔާ ބޮލުން ފޮނުވާލި ބޯޅަ އާސެނަލްގެ ޖަރުމަން ގޯލްކީޕަރު ބާނަޑް ލެނޯ ވަނީ މަތަކޮށްފައެވެ.
އާސެނަލަށް އެއްވަރުކޮށްދިނީ ފުރަތަމަ ހާފުގެ އެންމެ ފަހު މިނެޓުގައި، މިމެޗުގައި އެޓީމުގެ ކެޕްޓަން ބޭންޑް އަޅައިގެން ކުޅުނު މެސުޓް އޮޒިލް އެވެ. މިއީ އެޓީމުގެ ބެލަރީން ދިން ބޯޅައަކުން އޮޒިލް ކާމިޔާބުކުރި ރީތި ގޯލެކެވެ. މިގޯލާއެކު އޮޒިލް ވަނީ ލީގުގައި 30 ލަނޑު ހަމަކޮށް، އެންމެ ގިނަ ގޯލްޖެހި ޖަރުމަންގެ ކުޅުންތެރިޔާގެ ޝަރަފު ހޯދައިފައެވެ. މީގެކުރީން، މި ރެކޯޑް އޮންނަނީ 29 ގޯލްޖަހައިގެން ޖަރުމަންގެ ޤައުމީޓީމުގެ ކުރީގެ ކޯޗު އަދި ޓޮޓެންހަމްގެ ފޯވާޑް ޔާގަން ކްލިންސްމަން އާއި މެންޗެސްޓަރ ސިޓީގެ ކުރީގެ ފޯވާޑް އުވެ ރޮސްލާ އަތުގައެވެ.
އާސެނަލަށް މިމެޗުގައި ފުރަތަމަ ފަހަރަށް ލީޑް ނަގައިދިނީ ދެވަނަ ހާފުގައި ކުޅެން ނިކުތް އިތުބާރު ފޯވާޑް ޕިއޭރް އެމެރިކް އޯބާމަޔަން އެވެ. އޭނާ ވަނީ ގާތްގާތުގައި ދެލަނޑު ކާމިޔާބުކޮށްފައެވެ. އެގޮތުން، މެޗުގެ 63 ވަނަ މިނެޓުގައި ބެލަރީން ދިން ބޯޅައަކުން އޭނާ ވަނީ މެޗުގެ ނަތީޖާ 2-1 އަށް ބަދަލުކޮށްލާފައެވެ. އޭގެ ތިން މިނެޓުފަހުން، އޮޒިލް ތަނަވަސްކުރި ފުރުޞަތަކުން އޯބާމަޔަން ވަނީ އާސެނަލަށް ތިން ޕޮއިންޓް ކަށަވަރުކޮށްދީފައެވެ. މިއީ ލީގުގައި އޭނާ ކާމިޔާބުކުރި ހަވަނަ ގޯލެވެ.
އާސެނަލްގެ ތިންވަނަ ލަނޑަށްފަހު، އެޓީމުގެ ފްރާންސް ފޯވާޑް އަލެކްސެންޑަ ލަކަޒޭ އަށް ވަނީ ލަނޑުޖެހުމަށް ރަނގަޅު ދެފުރުޞަތުލިބި ބޭނުންހިފޭގޮތްނުވެފައެވެ.
މިމުބާރާތުގައި އާދީއްތަ ދުވަހު ކުޅުނު މެޗުގައި އަމިއްލަ ދަނޑުގައި 2-0 އިން ކްރިސްޓަލް ޕެލަސް ބަލިކޮށް އެވަޓަން ވަނީ ތާވަލްގެ 8 ވަނައަށް ޖެހިލައިފައެވެ. މިމެޗުގައި އެވަޓަން އިން ކާމިޔާބުކުރި ދެލަނޑުވެސް ޖެހީ މެޗުގެ އެންމެ ފަހު ތިން މިނެޓުގެތެރޭގައެވެ. އެގޮތުން، ޑޮމިިނިކް ކެލްވަޓް ލުވިން އެޓީމުގެ ފުރަތަމަ ލަނޑު ޖަހައިދިންއިރު، ފަހު ލަނޑު ޖަހައިދިނީ ސެންކް ޓޯސަން އެވެ.