ޔުއެފާ ޗެމްޕިއަންސް ލީގުގައި ރޭ ރަށުން ބޭރުގައި ޗެކް ރިޕަބްލިކްގެ ވިކްޓޯރިއާ ޕްލެޒެން 2-1 އިން ބަލިކޮށް އެންމެފަހުގެ ޗެމްޕިއަން ރެއާލް މެޑްރިޑްގެ މޮޅުނުވުމުގެ ސިލްސިލާ ނިމުމަކަށް ގެނެސްފިއެވެ.
މިއީ މިސީޒަނުގައި އެޓީމު އެންމެ ފަހުން ކުޅުނު ހަމެޗުގެ ތެރެއިން މޮޅުވި ހަމައެކަނި މެޗެވެ. މީގެކުރީން، އެޓީމު ކުޅުނު ފަސްމެޗުގެ ތެރެއިން ހަތަރު މެޗުން ބަލިވެފައިވާއިރު އެއްމެޗުން އެއްވަރުވެފައިވެއެވެ.
މިމެޗުން މޮޅުވެ ރެއާލް ވަނީ ހަ ޕޮއިންޓް ހަމަކޮށް ގްރޫޕް ޖީގެ ދެވަނައަށް ޖެހިލައިފައެވެ. އެއްވަނައިގައި އުޅޭ އޭއެސް ރޯމާ އަށް ވެސް މިއަދަދަށް ޕޮއިންޓް ލިބިފައިވާއިރު ރޯމާ އަށް ކުރިލިބެނީ ފައިދާ ގޯލްގެ ތަފާތުންނެވެ. ތިންވަނައިގައި އުޅޭ ސީއެސްކޭއޭ މޮސްކޯ އަށް ހަތަރު ޕޮއިންޓް ލިބިފައިވާއިރު އެއްޕޮއިންޓާއެކު އެންމެ ފުލުގައި އޮތީ ވިކްޓޯރިއާ ޕްލެޒެން އެވެ.
ރެއާލުން މިމެޗަށް ނިކުތީ ލީގުގައި އެޓީމު އެންމެ ފަހުން ކުޅުނު މެޗުގެ ފުރަތަމަ އެގާރަ އަށް ފަސް ބަދަލެއް ގެނެސްގެންނެވެ. އެގޮތުން، އެންމެ ފާހަގަކޮށްލެވެނީ ތިބައުޓް ކޯޓުއާ އާއި ރަފައެލް ވަރާންގެ ބަދަލުގައި ކޭލޯ ނަވާސް އަދި ނާޗޯ ފެނާންޑޭޒް މިމެޗުގެ ފުރަތަމަ އެގާރައިގައި ހިމަނާފައިވުމެވެ.
ރެއާލްގެ ސެންޓިއާގޯ ބާނެބެއު ސްޓޭޑިއަމްގައި ކުޅުނު މިމެޗުގެ 11 ވަނަ މިނެޓުގައި އެޓީމަށް ލީޑް ނަގައިދިނީ ކަރީމް ބެންޒެމާ އެވެ. މިއީ އެޓީމުގެ ކަނާތު ފުލްބެކަށް މިމެޗުގައި ކުޅުނު ލޫކަސް ވަޒްކޭޒް ނަގައިދިން ހުރަހަކުން ލިބުނު ބޯޅައެއް، ބޮލުން ގޯލްގެ ވާތްފަރާތުގެ ތިރީކަނަށް އަމާޒުކޮށްލައިގެން ބެންޒެމާ ކާމިޔާބުކުރި ގޯލެކެވެ. މިގޯލާއެކު ބެންޒެމާ ވަނީ ބާސެލޯނާގެ ލިއޮނަލް މެސީ އާއި ރެއާލްގެ ކުރީގެ ތަރި ރައުލް ގޮންޒާލެޒް އަށް ފަހު ޔުއެފާ ޗެމްޕިއަންސްލީގުގެ ތާރީޚުގައި ވިދިވިދިގެން 14 ސީޒަނުގައި ގޯލެއް ކާމިޔާބުކުރި ތިންވަނަ ކުޅުންތެރިޔާއަށެވެ.
މިހާފުގައި ރެއާލްގެ ލީޑް ފުޅާ ކުރުމަށް ބެންޒެމާގެ އިތުރުން ގަރެތު ބޭލް އާއި އިސްކޯ ފޮނުވާލި ހަމަލާތަކުގެ ހުރަހަކަށްވީ ޕްލެޒެން ގޯލްކީޕަރު އަލެސް ރުސްކާ އެވެ. މިމެޗުގެ ފުރަތަމަ ހާފު ނިމުނީ 1-0 އިން ރެއާލް ކުރީގައިއޮވެގެންނެވެ.
ދެވަނަ ހާފު ފެށިގެން، 10 ވަނަ މިނެޓުގައި ބްރެޒިލްގެ ފުލްބެކް މާސެލޯ ވަނީ ރެއާލްގެ ލީޑް ފުޅާކޮށްދީފައެވެ. މިއީ އެޓީމަށް ކުޅޭ ވޭލްސްގެ ހުނަރުވެރި ވިންގާ ބޭލް ތަނަވަސްކުރި ފުރުޞަތަކުން އޭނާ ކާމިޔާބުކުރި ގޯލެކެވެ. މިއީ ރެއާލް އެންމެ ފަހުން ކުޅުނު ދެމެޗުގައި މާސެލޯ ކާމިޔާބުކުރި ދެވަނަ ގޯލެވެ.
އޭގެފަހުން، ރެއާލްގެ ލޫކާ މޮޑްރިޗް އާއި ބޭލްގެ އިތުރުން ބެންޒެމާ އަށް ލަނޑުޖެހުމަށް ލިބުނު ފުރުޞަތުތަކުގެ ބޭނުންނުހިފުމުގެ ނަތީޖާއަކަށްވީ މެޗު ނިމެން 12 މިނެޓަށްވެފައިވަނިކޮށް ޕްލެޒެންގެ ޕެޓްރިކް ރޮސޯވްސްކީ ގޯލެއް ކާމިޔާބުކޮށް އެޓީމަށް ފަރަގު ކުޑަކޮށްދިނުމެވެ.
ރެއާލްގެ މާސެލޯ އަށް އަނިޔާވުމުން އެޓީމުގެ ހުރިހާ ބަދަލެއް ހަމަވެފައިވުމުން އޭނާގެ ބަދަލުގައި އިތުރު ކުޅުންތެރިއަކު އެރުވޭނެގޮތެއް ނެތުމުން، މެޗުގެ ފަހުބައި އެޓީމުން ކުޅުނީ 10 ކުޅުންތެރިންނާއި އެކު އެވެ.
މި ގްރޫޕުގައި ދެން ހިމެނޭ އިޓަލީގެ ރޯމާ ވަނީ އަމިއްލަ ދަނޑުގައި ކުޅެ ރަޝިއާގެ ސީއެސްކޭއޭ މޮސްކޯ އަތުން 3-0 ގެ ތަފާތު ބޮޑު ނަތީޖާއަކުން މޮޅުވެފައެވެ. ރޯމާގެ ތިންލަނޑުގެ ތެރެއިން ދެލަނޑުޖަހައިދިނީ ބޮސްނިއާ އެންޑް ހާޒެގޮވީނާގެ ފޯވާޑް އެޑިން ޖެކޯ އެވެ. އެޓީމުގެ އަނެއް ލަނޑުޖަހައިދިނީ ތުރުކީގެ ހުނަރުވެރި ވިންގާ ޗެންގީޒް އުންޑާ އެވެ.