އިލެކްޝަންސް ކޮމިޝަންގެ ރައީސް ބޭސްފަރުވާއަކަށް ރާއްޖޭން ބޭރަށް ފުރާވަޑައިގެންފިއެވެ.
ޝަރީފްވަނީ ދުވަސްކޮޅަކަށް ރާއްޖޭން ބޭރަށް ވަޑައިގަންނަވަނީ ކަމަށް ވިދާޅުވެ ޓްވީޓެއް ކުރައްވާފައެވެ. ޝަރީފް ވަޑައިގަންނަވާ ގައުމެއް ވިދާޅުވެފައިނުވި ކަމުގައި ވިޔަސް އެ ބޭފުޅާ ވަޑައިގެންނެވީ ސްރީލަންކާއަށް ކަމަށް މައުލޫމާތު ލިބެއެވެ.
ޝަރީފް ކުރެއްވި ޓްވީޓުގައި ވަނީ ރާއްޖެއިން ބޭރަށް ވަޑައިގެންނެވިކަން އޭނާ ހޯދާ މަންޖެ ކައިރީ ބުނެދިނުމަށް ރައީސް އަބްދުﷲ ޔާމީންގެ ތަރުޖަމާނު އިބްރާހީމް މުއާޒު އަލީ ކައިރިން އެދިވަޑައިގެންފައެވެ.
Out of country for a short break, @IbrahimMuazAli ma hoadha manje kairee bunelaathi
— Ahmed Shareef (@ShareefRangondi) October 24, 2018
ރިޔާސީ އިންތިހާބަށްފަހު ޕީޕީއެމްއިން ބާއްވާ ސިލްސިލާ މުޒާހަރާގައި އީސީ ޝަރީފުއަށް އަމާޒުކޮށް ފާޑު ކިޔާފައިވެއެވެ. އެގޮތުން ޕީޕީއެމްގެ އަންހެން އެކްޓިވިސްޓަކު "އީސީ ޝަރީފު، އަންނާށޭ، އަދި އީސީ ޝަރީފޫ ގެނަމުން މުހާޠަބްކޮށް ދައްކާފައިވާ ވާހަކަތައް ސޯޝަލް މީޑިއާގައި ދަނީ ދައުރުވަމުންނެވެ.
ޝަރީފު ރާއްޖެއިން ބޭރަށް ވަޑައިގެންނެވި އިރު ނިމި ދިޔަ ރިޔާސީ އިންތިހާބު އޮޅުވާލި ކަމަށް ޝަރީފާއި އިލެކްޝަންގެ މެންބަރުންނަށް ވެރިކަން ކުރާ ޕީޕީއެމާއި ރައީސް އަބްދުﷲ ޔާމީން ވަނީ ތުހުމަތު ކުރައްވާފައެވެ. އިންތިހާބު އޮޅުވާލި ކަމަށް ތުހުމަތުކޮށް އިންތިހާބު ބާތިލު ކުރަން ރައީސް ޔާމީން ހުށަޅުއްވި މައްސަލާގައި އިންތިހާބު ބާތިލު ކުރަން ނުޖެހޭ ކަމަށް ސްޕްރީމް ކޯޓުން ވަނީ ހުކުމްކޮށްފައެވެ.