ޔުއެފާ ޗެމްޕިއަންސް ލީގުގައި ރޭ އަމިއްލަ ދަނޑުގައި މުހައްމަދު ސަލާހު ޖެހި ދެ ލަނޑާ އެކު 4-0 ގެ ތަފާތު ބޮޑު ނަތީޖާއަކުން ސާބިއާގެ ރެޑް ސްޓާ ބެލްގްރޭޑް އަތުން ލިވަޕޫލް މޮޅުވެއްޖެ އެވެ.
މި މޮޅާއެކު ލިވަޕޫލް ވަނީ ގްރޫޕް ސީގެ އެއްވަނަ އަށް ޖެހިލައިފައެވެ. ކުޅުނު 3 މެޗުން ލިވަޕޫލަށް 6 ޕޮއިންޓް ލިބިފައިވާއިރު ނަޕޯލީ އޮތީ 5 ޕޮއިންޓާއެކު ދެވަނައިގައެވެ. ހަތަރު ޕޮއިންޓާއެކު ގަދަފަދަ ޕީއެސްޖީ އޮތީ ތިންވަނައިގައެވެ. އެންމެ ފުލުގައި އުޅޭ ރެޑް ސްޓާ އަށް ލިބިފައިވަނީ އެންމެ ޕޮއިންޓެކެވެ.
ލިވަޕޫލްގެ އެންފީލްޑްގައި ރޭ ކުޅުނު މެޗުގެ 20 ވަނަ މިނެޓުގައި އެޓީމަށް ލީޑް ނަގައިދިނީ ބްރެޒިލްގެ ފޯވާޑް ރޮބާޓޯ ފިރްމީނޯ އެވެ. މިއީ އެޓީމުގެ އެންޑްރޫ ރޮބަޓްސަން ތަނަވަސްކުރި ފުރުޞަތަކުން އޭނާ ކާމިޔާބުކުރި ގޯލެކެވެ.
އޭގެފަހުން، މެޗުގެ 38 ވަނަ މިނެޓުގައި ލިވަޕޫލްގެ ޒެރްދާން ޝަކީރީ އަށް އެޓީމުގެ ލީޑް ފުޅާކުރުމަށް ލިބުނު ފުރުޞަތުގައި ފޮނުވާލި ބޯޅަ ރެޑް ސްޓާގެ ގޯލްކީޕަރު މިލާން ބޯރްޖާން މަތަކުރިއެވެ.
ފުރަތަމަ ހާފުގެ އެންމެ ފަހު މިނެޓުގައި ލިވަޕޫލްގެ ދެވަނަ ލަނޑު، މިސްރުގެ މުހައްމަދު ސަލާހް ޖަހައިދިނީ ޝަކީރީ ދިން ބޯޅައަކުންނެވެ.
އޭގެފަހުން، ދެވަނަ ހާފުގެ ކުޅުން ފެށިތާ ހަ މިނެޓުގެތެރޭގައި ލިބުނު ޕެނަލްޓީއަކުން ސަލާހް ވަނީ ނަތީޖާ 3-0 އަށް ބަދަލުކޮށްލާފައެވެ. މިމެޗުގައި ކާމިޔާބުކުރި ދެލަނޑާއެކު ސަލާހް ވަނީ ލިވަޕޫލަށް ކުޅެދިން 65 މެޗުގައި 50 ލަނޑު ހަމަކޮށްފައެވެ.
މެޗުގެ 76 ވަނަ މިނެޓުގައި ރެޑް ސްޓާގެ ކުޅުންތެރިއެއް ބޯޅައިގައި އަތްލުމުން ލިވަޕޫލަށް ލިބުނު ޕެނަލްޓީ އެޓީމުގެ ސަޑިއޯ މާނޭ ފޮނުވާލުމުން ރެޑް ސްޓާގެ ކީޕަރު ބޯރްޖާން މަތަކުރިއެވެ.
ނަމަވެސް، އޭގެ ހަތަރު މިނެޓުފަހުން ޑެނިއަލް ސްޓަރިޖް ތަނަވަސްކުރި ފުރުޞަތަކުން މާނޭ ވަނީ ލިވަޕޫލްގެ ހަތަރުވަނަ ލަނޑު ކާމިޔާބުކޮށްދީފައެވެ.
ލިވަޕޫލްގެ ލީޑް ފުޅާ ކުރުމަށް އެޓީމުގެ އެޑަމް ލަލާނާގެ އިތުރުން ސްޓަރިޖަށް ލިބުނު ފުރުޞަތުގައި ފޮނުވާލި ދެ ހަމަލާގެ ހުރަހަކަށްވީ ވެސް ރެޑް ސްޓާގެ ކީޕަރު ބޯރްޖާން އެވެ.
މިގްރޫޕުގައި ހިމެނޭ ޕީއެސްޖީ އާ ނަޕޯލީ ބައްދަލުކުރި މެޗު ނިމުނީ 2-2 އިން ދެޓީމު އެއްވަރުވެގެންނެވެ. ޕީއެސްޖީގެ ދަނޑުގައި ކުޅުނު މިމެޗުގެ ފުރަތަމަ ހާފުގައި ކުރީން ލީޑް ނެގީ ވެސް ނަޕޯލީ އިންނެވެ. މެޗުގެ 29 ވަނަ މިނެޓުގައި އިޓަލީގެ ހުނަރުވެރި ކުޅުންތެރިޔާ ލޮރެންޒޯ އިންސީނިއޭ މިލަނޑު ޖަހައިދިންއިރު މިހާފު ނިމުނީ 1-0 އިން ނަޕޯލީ ކުރީގައިއޮވެގެންނެވެ.
މިމެޗުގެ ދެވަނަ ހާފުގެ ކުރީކޮޅު، ޕީއެސްޖީ އިން ނަތީޖާ ހަމަހަމަކުރިއެވެ. މިއީ ނަޕޯލީގެ މާރިއޯ ރުއި އަތުން ބައިކޮޅަށް ވަން ގޯލެކެވެ. އޭގެފަހުން، މެޗުގެ 77 ވަނަ މިނެޓުގައި ނަޕޯލީ އަށް ދެވަނަ ފަހަރަށް މިމެޗުގައި ލީޑް ނަގައިދިނީ ބެލްޖިއަމްގެ ޑްރީސް މާޓެންސް އެވެ. މިނަތީޖާގައި އޮވެ މެޗު ނިމެން ދަނިކޮށް ޕީއެސްޖީ އަށް ޕޮއިންޓެއް ހޯދައިދިނީ މެޗުގެ އިތުރުވަގުތުގެ ތިންވަނަ މިނެޓުގައި އެންހެލް ޑި މާރިއާ ކާމިޔާބުކުރި ރީތި ގޯލުންނެވެ.