މިހާރު އެވޯޑްސްގައި ހޮވާ އަހަރުގެ އެންމެ މޮޅު ފުޓްބޯޅަ ކުޅުންތެރިޔާ އާއި އެންމެ މޮޅު ޒުވާން ކުޅުންތެރިޔާގެ މަޤާމަށް ނިމިގެން ދިޔަ ދިރާގު ދިވެހި ޕްރިމިއާ ލީގުގެ ފުރަތަމަ ބުރުން ވާދަކުރާ ކުޅުންތެރިން ކަނޑައެޅިއިރު އައްޑޫ ސިޓީ އަށް ނިސްބަތްވާ ދެ ކުޅުންތެރިންކަމަށްވާ އިބްރާހިމް މަހުދީ (ފޭދޫ އިއްބެ) އާއި ހަސަން ރާއިފް އަހުމަދު (ހަންނަ) ވަނީ މި ދެ ކެޓަގަރީ އިން ނޮމިނޭޓްވެފައެވެ.
މިހާރު އެވޯޑްސްގެ ފުޓްބޯޅައިގެ ފަނޑިޔާރުންގެ ޕެނަލުން ޝޯޓްލިސްޓްކޮށްފައިވާ ކުޅުންތެރިންނަކީ، ޓީސީ ސްޕޯޓްސް ކްލަބަށް ނިސްބަތްވާ އަލީ އަޝްފާގް (ދަގަނޑޭ) އާއި އިބްރާހިމް މަހުދީ (ފޭދޫ އިއްބެ) އާއި ނިއުރޭޑިއަންޓްގެ އަލީ ފާސިރު (ސެންޓޭ) އަދި ކްލަބް އީގަލްސްގެ އަހުމަދު ރިޒުވާން (ރިޒޭ) ގެ އިތުރުން މާޒިޔާގެ ނާއިޒް ހަސަން (ދާދު) އެވެ.
މިމުބާރާތުގެ އެންމެ މޮޅު ޒުވާން ފުޓްބޯޅަ ކުޅުންތެރިޔާގެ މަޤާމަށް ވާދަކުރަނީ، ކްލަބް އީގަލްސްގެ ހަސަން ރާއިފް (ހަންނަ) އާއި މާޒިޔާގެ ގޯލްކީޕަރު ހުސެއިން ޝަރީފާއި ނިއުރޭޑިއަންޓްގެ ރިހާމް އަބްދުލްގަނީ (ބޮބީ) އަދި ޓީސީ ސްޕޯޓްސް ކްލަބްގެ މުހައްމަދު ސާދު ނިޒާރުގެ އިތުރުން ށ. ފޯކައިދޫގެ މުހައްމަދު ޖައިލަމް (އޮގީ) އެވެ.
މިސީޒަނުގައި ޓީސީ އަށް ކުޅެދިން މެޗުތަކުގައި ފޭދޫ އިއްބެ މިހާތަނަށް ޖުމްލަ 13 ގޯލް ކާމިޔާބުކޮށް ލީގުގައި މޮޅުކުޅުމެއް ދައްކަމުން އަންނައިރު އެންމެ ފަހުގެ ސާފް ޗެމްޕިއަންޝިޕް ދިވެހި ޤައުމީޓީމުން ކާމިޔާބުކުރުމުގައި އޭނާ މުހިއްމު ދައުރެއް އަދާކޮށްފައިވާއިރު، މިހާރު އެވޯޑްސްގެ ފަނޑިޔާރުންގެ ޕެނަލުން ހޮވި އެމުބާރާތުގެ އެންމެ މޮޅު ފަސް ކުޅުންތެރިންގެ ތެރޭގައިވެސް އިއްބެ ވަނީ ހިމެނިފައެވެ. އެންމެ މޮޅު ޒުވާން ކުޅުންތެރިޔާގެ އެވޯޑަށް ވާދަކުރާ ރާއިފް އަހުމަދު (ހަންނަ) ވަނީ މިހާތަނަށް 3 ގޯލް ކާމިޔާބުކޮށް އީގަލްސް ޓީމަށް ގިނަ ލަނޑުތަކެއް ޖަހަން އެހީތެރިވެ މޮޅުކުޅުމެއް ދައްކާފައެވެ.
މިދިޔަ އަހަރު ތައާރަފްކުރި މިހާރު އެވޯޑްސްގެ އަހަރުގެ އެންމެ މޮޅު ކުޅުންތެރިޔާގެ މަގާމް ނިއުގެ ސެންޓޭ ހޯދިއިރު އެންމެ މޮޅު ޒުވާން ކުޅުންތެރިޔާގެ އެވޯޑް ހާސިލްކުރީ މިހާރު މާޒިޔާ އަށް ކުޅެމުން އަންނަ ދާދު އެވެ.