ތިލަފުށި ބޭރުގައި އޮތް "ސަން ޓޫނާ" ނަމަކަށް ކިޔާ ބާޖުގައި ރޯވި އަލިފާން އެމްއެންޑީއެފް ފަޔަރ އެންޑް ރެސްކިއު ސަރވިސްއިން ނިއްވާލައިފިއެވެ.
މަސްގަނެ އައިސް ވިއްކުމުގައި ހަރަކާތްރިވާ މި ބާޖުގައި އަލިފާން ރޯވެފައިވާކަމުގެ މައުލޫމާތު ލިބިފައިވަނީ މިއަދު ހެނދުނު 7:35 އެހާއިރުކަމަށް އެމްއެންޑީއެފުން ބުނެއެވެ. މި ބާޖަކީ ސަން ޓޫނާ ނަމަކަށް ކިޔާ 320 ފޫޓުގެ ބޮޑު ބާޖެެކެވެ.
ފަޔަރ ފައިޓަރުން ކުރި މަސައްކަތުން އަލިފާންގަނޑު އެއްކޮށް ނިއްވާލެވިފައިވަނީ މިއަދު 14:25 ހާއިރު ކަމަށް އެމްއެންޑީއެފުން ބުނެއެވެ. ބާޖްގައި ރޯވެފައިވާ އަލިފާން ކޮންޓްރޯލް ކުރުމަށް ވަގުތުނަގަނީ ބާޖުގައޮހުރި ގޭހުގެ ސަބަބުންކަމަށް ވެސް އެމްއެންޑީއެފުން ބުނެއެވެ.
ބާޖްގައި ރޯވިއިރު އޭގައި 20 މީހުން ތިބިކަމަށާއި އެންމެންވެސް ފުލުންގެ ލޯންޗެއްގައި ސަލާމަތްކޮށްފައިވާ ކަމަށް އެމްއެންޑީއެފުން ބުނެއެވެ.