އިނގިރޭސި ޕްރިމިއާ ލީގުގައި މިރޭ ކުޅުނު މެޗުގައި މުހައްމަދު ސަލާހުގެ މޮޅު ކުޅުމާއެކު ކާޑިފް ސިޓީ ބަލިކޮށް ލިވަޕޫލް އެއްވަނަ އަށް ޖެހިލައިފިއެވެ. މިމެޗު ލިވަޕޫލުން ކާމިޔާބުކުރީ 4-1 އިންނެވެ.
ލިވަޕޫލްގެ އަމިއްލަ ދަނޑުގައި ކުޅުނު މި މެޗު ފެށިގެން ބޯޅަ ކޮންޓްރޯލްކޮށް ރަނގަޅަށް ކުޅުނީ ވެސް އެޓީމުންނެވެ. އެގޮތުން، މެޗުގެ 10 ވަނަ މިނެޓުގައި ލިވަޕޫލަށް ލީޑް ނަގައިދިނީ މުހައްމަދު ސަލާހް އެވެ. މި ލަނޑާއެކު އޭނާ ވަނީ މިސީޒަނުގައި އެންމެ ފަހުން ކުޅުނު ތިން މެޗުގައި ހަތަރު ލަނޑު ހަމަކޮށްފައެވެ.
މި ލަނޑަށްފަހުވެސް ލިވަޕޫލް އިން ދިޔައީ ހަމަލާ އުފައްދަމުންނެވެ. އެގޮތުން، މެޗުގެ 13 ވަނަ މިނެޓުގައި އެޓީމުގެ ވާޖިލް ވެން ޑައިކް އަށް ވަނީ ރަނގަޅު ފުރުޞަތެއްލިބި ބޭކާރުވެފައެވެ. ސަލާހް ނަގައިދިން ހުރަހަކުން ވެން ޑައިކް ބޮލުން ފޮނުވާލި ބޯޅަ ގޯލްގެ ހުރަސް ދަނޑީގައި ޖެހިފައިދިޔައިރު އޭގެފަހުން، އެޓީމުގެ ޓްރެންޓް އެލެގްޒެންޑާ އާނޯލްޑް އާއި އަލްބާޓޯ މޮރޭނޯ ފޮނުވާލި ބޯޅަ ދިޔައީ ގޯލްގެ ދަނޑިކައިރިން ބޭރަށެވެ.
ފުރަތަމަ ހާފު ނިމެންދަނިކޮށް، އެޓީމުގެ ރޮބާޓޯ ފިރްމީނޯ އާއި ވެން ޑައިކް އަށް ލިބުނު ފުރުޞަތުގައި ފޮނުވާލި ހަމަލާތައް ގޯލަށް އަމާޒުވާގޮތެއްނުވިއެވެ. މި ހާފް ނިމުނީ 0-1 ގެ ނަތީޖާއިން ލިވަޕޫލް ކުރީގައި އޮވެގެންނެވެ.
ދެވަނަ ހާފް ފެށިގެންވެސް ރަނގަޅަށް ކުޅުނީ ލިވަޕޫލްއެވެ. އެގޮތުން 66 ވަނަ މިނެޓުގައި ސާޑިއޯ މާނޭ ވަނީ އެޓީމުގެ ލީޑު އިތުރަށް ފުޅާކޮށްދީފައެވެ.
މެޗުގެ 77 ވަނަ މިނެޓުގައި ކާޑިފްގެ ކެލުމް ޕެޓަސަން ވަނީ ނަތީޖާގެ ފަރަގު އެއްލަނޑަށް ކުޑަކޮށްފައެވެ.
އޭގެފަހުން، ލިވަޕޫލްގެ ލީޑް ފުޅާކުރުމަށް އެޓީމު އެލެގްޒެންޑާ އާނޯލްޑް އާއި ސަލާހް އަށް ލިބުނު ފުރުޞަތުގެ ބޭނުންހިފޭގޮތެއްނުވިއެވެ. މި ދެ ކުޅުންތެރިން ފޮނުވާލި ހަމަލާ ވެސް ކާޑިފްގެ ގޯލްކީޕަރު ނީލް އެތަރިޖް މަތަކުރިއެވެ.
ލިވަޕޫލްގެ ތިންވަނަ ލަނޑު، 84 ވަނަ މިނެޓުގައި ސަލާހުގެ އެހީތެރިކަމާއެކު ޒެރްދާން ޝަކީރީ ކާމިޔާބުކުރިއިރު، މެޗުނިމެން ތިން މިނެޓަށްވެފައިވަނިކޮށް އެޓީމުގެ ހަތަރުވަނަ ލަނޑު ޖަހައިދިނީ މާނޭ އެވެ. މި ލަނޑު ޖެހުމަށް އެހީތެރިވެދިނީ މުޅި މެޗުގައި ވެސް މޮޅު ކުޅުމެއްދެއްކި ސަލާހް އެވެ.
މި ނަތީޖާއާއެކު ލިވަޕޫލް ވަނީ 26 ޕޮއިންޓާއެކު ލީގު ތާވަލްގެ އެއްވަނަ އަށް ޖެހިލައިފައެވެ. ދެވަނައިގައި އޮތް މެންޗެސްޓަރ ސިޓީ އަށް 23 ޕޮއިންޓް ލިބިފައިވާއިރު ތިންވަނައިގައި އޮތް ޗެލްސީ އަދި ހަތަރުވަނައިގައި އޮތް އާސެނަލް އަށް ލިބިފައިވަނީ 21 ޕޮއިންޓެވެ.