އިޓާލިއަން ސެރިއޭގައި ރޭ ކުޅުނު މެޗުގައި ކްރިސްޓިއާނޯ ރޮނާލްޑޯ ކާމިޔާބުކުރި ދެލަނޑުން މިސީޒަނުގައި އަލަށް ޕްރޮމޯޓުވީ ކްލަބް އެމްޕޯލީ އަތުން ފަހަތުން އަރައި ޔުވެންޓަސް މޮޅުވެއްޖެއެވެ. މިމެޗު ޔުވެންޓަސް އިން ކާމިޔާބުކުރީ 2-1 ގެ ނަތީޖާއަކުންނެވެ.
މިމެޗުން މޮޅުވެ ޔުވެންޓަސް ވަނީ ތާވަލްގެ އެންމެ ކުރީގައި ހަތް ޕޮއިންޓްގެ ލީޑެއް ނަގައިފައެވެ. އެޓީމަށް 10 މެޗުން 28 ޕޮއިންޓް ލިބިފައިވާއިރު ދެވަނައިގައި އޮތް ނަޕޯލީ އަށް 9 މެޗުން ލިބިފައިވަނީ 21 ޕޮއިންޓެވެ. މިމެޗުން ބަލިވި އެމްޕޯލީ އޮތީ ހަ ޕޮއިންޓާއެކު ތާވަލްގެ 18 ވަނައިގައެވެ.
ޔުވެންޓަސް އިން މިމެޗަށް ނިކުތީ އަނިޔާގެ ސަބަބުން ކެޕްޓަން ޖިއޯޖިއޯ ކިއެލީނީގެ ބަދަލުގައި ޑެނިއެލި ރުގާނީ އެޓީމުގެ ފުރަތަމަ އެގާރައިގައި ހިމަނައިގެންނެވެ. މީގެއިތުރުން، އެޓީމުން މިމެޗަށް ނިކުތްއިރު އެންމެ ފަހުން ޔުއެފާ ޗެމްޕިއަންސް ލީގުގައި މެންޗެސްޓަރ ޔުނައިޓެޑާ ދެކޮޅަށް ކުޅުނު މެޗުގެ ފުރަތަމަ އެގާރައިގައި ހިމެނުނު ޖޮއާއޯ ކަންސޭލޯ އާއި ހުއާން ކުއަޑްރާޑޯ ބަދަލުގައި ޑި ޝީލިއޯ އާއި ފެޑެރީކޯ ބާނަޑެސްކީ އަށް ވަނީ މިމެޗުގެ ފުރަތަމަ އެގާރައިން ފުރުޞަތު ދީފައެވެ.
އެމްޕޯލީގެ ސްޓާޑިއޯ ކާލޯ ކަސްޓެލާނީގައި ކުޅުނު މިމެޗު ފެށިގެން ހަވަނަ މިނެޓުގައި ޔުވެންޓަސްގެ އަލެކްސް ސެންޑްރޯ އަށް އެޓީމަށް ލީޑްނަގައިދިނުމަށް ލިބުނު ފުރުޞަތުގައި އޭނާ ފޮނުވާލި ބޯޅަ އެމްޕޯލީގެ ގޯލްކީޕަރު އިވާން ޕްރޮވެޑެލް މަތަކުރިއެވެ.
28 ވަނަ މިނެޓުގައި އެމްޕޯލީ އަށް ލީޑް ނަގައިދިނީ ފްރާންޗެސްކޯ ކަޕޫޓޯ އެވެ. މިއީ އެޓީމުގެ އަފްރިޔިއޭ އަކުއާ މެދުރޮނގާއި ހަމައިން ހިފައިގެން އައި ބޯޅައަކުން އުފެއްދި އެޓޭކަކުން ޔުވެންޓަސްގެ ރޮޑްރިގޯ ބެންޓަންކޫރް ދިފާއުކުރަން އުޅުމުގެ ތެރޭގައި އެބޯޅަ އެމްޕޯލީގެ ކަޕޫޓޯ އަށް ލިބުމުން އޭނާ ކާމިޔާބުކުރި ރީތި ގޯލެކެވެ.
ފުރަތަމަ ހާފުގައި ޔުވެންޓަސް އަށް އެއްވަރުކޮށްދިނުމަށް ޕައޮލޯ ޑިބާލާ އަށް ލިބުނު ފުރުޞަތުގައި އޭނާ ފޮނުވާލި ބޯޅަ ގޯލަށް އަމާޒުވާގޮތްނުވިއިރު ސެންޑްރޯ ނަގައިދިން ހުރަހަކުން ރޮނާލްޑޯ ބޮލުން ފޮނުވާލި ބޯޅަ އެމްޕޯލީގެ ކީޕަރު ޕްރޮވެޑެލް މަތަކުރިއެވެ. މިހާފު ނިމުނީ 1-0 އިން އެމްޕޯލީ ކުރީގައިއޮވެގެންނެވެ.
ދެވަނަ ހާފު ފެށިގެން ޔުވެންޓަސް އިން ކުޅުން ރަނގަޅު ކުރިއެވެ. އެގޮތުން، އެޓީމުގެ ބްރެޒިލް ފުލްބެކް ސެންޑްރޯ އާއި ބޮސްނިއާގެ މިޑްފީލްޑަރު މިރަލެމް ޕިޔަނިޗް އަށް ވަނީ ނަތީޖާ ހަމަހަމަކުރުމަށް ރަނގަޅު ފުރުޞަތުތަކެއް ލިބި ބޭކާރުވެފައެވެ. އެގޮތުން، މި ދެ ކުޅުންތެރިން ފޮނުވާލި ހަމަލާތަކުގެ ހުރަހަކަށްވީ އެމްޕޯލީގެ ކީޕަރު ޕްރޮވެޑެލް އެވެ.
އޭގެ ކުޑައިރު ކޮޅެއް ފަހުން، 54 ވަނަ މިނެޓުގައި ޔުވެންޓަސް އަށް އެއްވަރުކޮށްދިނީ ލިބުނު ޕެނަލްޓީއަކުން ރޮނާލްޑޯ އެވެ. މިއީ ޔުވެންޓަސްގެ ކެޕްޓަން ބޭންޑް އަޅައިގެން މިމެޗުގައި ކުޅުނު ޑިބާލާ އަށް އެމްޕޯލީގެ އިސްމާއިލް ބެންނަސާ ކުރި ފައުލަކަށް ރެފްރީ ދިން ޕެނަލްޓީއެކެވެ.
މެޗުގެ 70 ވަނަ މިނެޓުގައި ޔުވެންޓަސް އަށް ފުރަތަމަ ފަހަރަށް ލީޑް ނަގައިދިނީ ވެސް ރޮނާލްޑޯ އެވެ. މިއީ އެމްޕޮލީގެ ޕެނަލްޓީއޭރިޔާބޭރުން، ގޯލާއި ގާތްގަނޑަކަށް 25 މީޓަރު ދުރުން ފޮނުވާލި ބާރު ހަމަލާއެއް ގޯލްގެ މަތީކަނަށް އަމާޒުކޮށްލައިގެން އޭނާ ކާމިޔާބުކުރި ރީތި ގޯލެކެވެ. މިއީ ލީގުގައި ރޮނާލްޑޯ ކާމިޔާބުކުރި ހަތްވަނަ ގޯލެވެ. މީގެއިތުރުން، މިއީ ލީގުގައި އެންމެ ފަހުން ކުޅުނު ތިން މެޗުގައި އޭނާ ކާމިޔާބުކުރި ހަތަރުވަނަ ގޯލެވެ.
އޭގެފަހުން، އެމްޕޯލީ އަށް ނަތީޖާ ހަމަހަމަކޮށްދިނުމަށް އެޓީމުގެ ސަލިހް އުޗަން އާއި ރަޑޭ ކްރުނިޗްގެ އިތުރުން ކަޕޫޓޯ އަށް ލިބުނު ފުރުޞަތުތަކުގައި ފޮނުވާލި ހަމަލާތަކުގައި ގޯލެއް ކާމިޔާބުކުރެވޭގޮތެއްނުވިއެވެ.
މިމުބާރާތުގައި އިއްޔެ ކުޅުނު އެހެން މެޗުތަކުގެ ނަތީޖާއަށް ބަލާއިރު، ޕާމާ އަތުން 3-0 އިން އެޓަލާންޓާ މޮޅުވިއިރު ޓޮރީނޯ އާ ފިއޮރެންޓީނާ ބައްދަލުކުރި މެޗު ނިމުނީ 1-1 އިން އެއްވަރުވެގެންނެވެ.