ޖަރުމަން ބުންޑަސްލީގާގައި ރޭ ކުޅުނު މެޗުގައި ރަށުން ބޭރުގައި މައިންޒް ބަލިކޮށް އެންމެ ފަހުގެ ޗެމްޕިއަން ބަޔާން މިއުނިކް ތާވަލްގެ ދެވަނައަށް ޖެހިލިއިރު އެންމެ ކުރީގައި އުޅޭ ބޮރޫޝިއާ ޑޯޓްމަންޑް އަށް ހާތާ ބާލިން އަތުން މޮޅުނުވެވުނެވެ.
މައިންޒްގެ ދަނޑުގައި ކުޅެ 2-1 އިން ބަޔާން މޮޅުވިއިރު އަމިއްލަ ދަނޑުގައި ހާތާ އާ ދެކޮޅަށް ޑޯޓްމަންޑް ކުޅުނު މެޗު ނިމުނީ 2-2 އިން އެއްވަރުވެގެންނެވެ.
ރޭ ކުޅުނު މެޗުތަކަށްފަހު، އެއްވަނައިގައި އުޅޭ ޑޯޓްމަންޑް އަށް 9 މެޗުން 21 ޕޮއިންޓް ލިބިފައިވާއިރު މިވަގުތު ދެވަނައިގައި އޮތް ބަޔާން އަށް ލިބިފައިވަނީ 19 ޕޮއިންޓެވެ. ތިންވަނައިގައި އޮތް ބޮރޫޝިއާ މޮންޗެންގްލަޑްބަކް އަށް 9 މެޗުން 17 ޕޮއިންޓް ލިބިފައިވާއިރު 8 މެޗުން 17 ޕޮއިންޓް ހަމަކޮށްގެން ހަތަރުވަނައިގައި އޮތް ވާޑާ ބްރޭމަން އަށް ކުރިއަށް އޮތް ބަޔާ ލެވަކޫސަން އާ ދެކޮޅަށް ކުޅޭ މެޗުން މޮޅުވެއްޖެނަމަ ދެވަނަ ލިބޭނެއެވެ.
މައިންޒްގެ އޮޕެލް އެރީނާގައި ކުޅުނު މެޗުގެ 39 ވަނަ މިނެޓުގައި ބަޔާންގެ ޖޯޝުއާ ކިމިކް ތަނަވަސްކުރި ފުރުޞަތަކުން ލިބުނު ބޯޅައެއް އެއްފަހަރުން ފޮނުވާލައިގެން ލިއޮން ގޮރެޓްޒްކާ ކާމިޔާބުކުރި ގޯލުން އެޓީމު އެއްލަނޑުގެ ލީޑެއްގައި އޮވެ ފުރަތަމަ ހާފު ނިންމާލިއިރު ދެވަނަ ހާފު ފެށިގެން ތިން ވަނަ މިނެޓުގައި މައިންޒް އަށް އެއްވަރުކޮށްދިނީ ޖީން-ޕައުލް ބޮއޭޓިއަސް އެވެ.
އޭގެފަހުން، މެޗުގެ 62 ވަނަ މިނެޓުގައި ބަޔާން އަށް ތިން ޕޮއިންޓް ކަށަވަރުކޮށްދިނީ ސްޕެއިނުގެ މިޑްފީލްޑަރު ތިއާގޯ އަލްކަންޓާރާ ކާމިޔާބުކުރި ގޯލުންނެވެ. މިއީ އެޓީމުގެ ޕޮލެންޑް ފޯވާޑް ރޮބަޓް ލެވަންޑޯސްކީ ނަގައިދިން ހުރަހަކުން ތިއާގޯ ކާމިޔާބުކުރި ގޯލެކެވެ.
ލީގުގައި ރޭ ހާތާ އާ ދެކޮޅަށް ޑޯޓްމަންޑް ކުޅުނު މެޗުގެ 27 ވަނަ މިނެޓުގައި އެޓީމަށް ލީޑް ނަގައިދިނީ ޖަރުމަންގެ މާރިއޯ ގޮޓްޒޭ ތަނަވަސްކުރި ފުރުޞަތަކުން އިނގިރޭސި ވިލާތުގެ އުއްމީދީ ކުޅުންތެރިޔާ ޖޭޑަން ސަންޗޯ އެވެ.
ނަމަވެސް، ފުރަތަމަ ހާފު ނިމުމުގެކުރީން ޑޯޓްމަންޑްގެ މަހްމޫދު ދަހޫދު އަށް ހެދުނު ގޯހެއްގެ ފައިދާނަގައި ހާތާގެ މެކްސިމިލިއަން މިޓެލްސްޓަޑް ދިން ޕާހަކުން ސަލޮމަން ކަލޫ ވަނީ ނަތީޖާ ހަމަހަމަކޮށްދީފައެވެ.
މެޗުގެ 61 ވަނަ މިނެޓުގައި ޑޯޓްމަންޑް އަށް ދެވަނަ ފަހަރަށް ލީޑް ނަގައިދިނީ ވެސް އުމުރުން އެންމެ 18 އަހަރުގެ ސަންޗޯ އެވެ. މިއީ އެޓީމުގެ އަޝްރަފް ހަކީމީ ތަނަވަސްކުރި ފުރުޞަތަކުން އޭނާ ކާމިޔާބުކުރި ގޯލެކެވެ.
މިމެޗުގެ އިތުރުވަގުތުގެ ފުރަތަމަ މިނެޓުގައި، ހާތާ އަށް ދެވަނަ ފަހަރަށް އެއްވަރުކޮށްދިނީ ވެސް ކަލޫ އެވެ. މިއީ އެޓީމުގެ ޑޭވީ ސެލްކޭ އަށް ޑޯޓްމަންޑްގެ ޕެނަލްޓީއޭރިޔާތެރެއިން ގޯލްކީޕަރު ރޯމަން ބުރްކީ ކުރި ފައުލަކަށް ރެފްރީ ދިން ޕެނަލްޓީއަކުން ކަލޫ ކާމިޔާބުކުރި ގޯލެކެވެ.
މިމުބާރާތުގައި މިހަފްތާގައި ކުޅުނު އެހެން މެޗުތަކުގެ ނަތީޖާއަށް ބަލާއިރު، ހެނޯވާ އަތުން 2-1 އިން އޮގްސްބާގް މޮޅުވިއިރު ހޮފެންހައިމް ވަނީ 4-0 ގެ ތަފާތު ބޮޑު ނަތީޖާއަކުން ސްޓުޓްގާޓް ބަލިކޮށްފައެވެ. ފްރެއިބާގް އަތުން 1-3 އިން މޮންޗެންގްލަޑްބަކް ބަލިވިއިރު ވުލްފްސްބާގް ވަނީ 3-0 އިން ފޯޗުނާ ޑުސެލްޑޯފް އަތުން މޮޅުވެފައެވެ.