ރައްޔިތުންގެ މަޖިލީހުގެ ތިން ވަނަ ދައުރުގެ ފުރަތަމަ ޖަލްސާ ފަށައިފިއެވެ.
މިއަދު ޖަލްސާ ފެށިއިރު، ޖަލްސާގައި 42 މެމްބަރުން ބައިވެރިވެވަޑައިގެންނެވިއެވެ. ޖަލްސާގެ ރިޔާސަތުގައި އިންނެވީ މަޖިލީހުގެ ނައިބު ރައީސް ރީކޯ މޫސާ މަނިކުއެވެ.
އެންމެފަހުން މަޖިލީސް ޖަލްސާއެއް ބާއްވާފައިވަނީ އޯގަސްޓް މަހުގެ އެއްވަނަ ދުވަހުއެވެ.
މިދިޔަ އަހަރުގެ ޖުލައި މަހު މަސީހުގެ އިތުބާރު ނެތް ކަމުގެ މައްސަލަ މަޖިލީހަށް ހުށަހެޅުމަށްފަހު 12 މެންބަރުންގެ ގޮނޑި ގެއްލުވާލި މައްސަލައަށް ފަހުގައި ގުޅިފައިވާ ސިޔާސީ ޕާޓީތަކަށް ނިސްބަތްވާ ފަރާތްތަކުން ވަނީ މަޖިލީހުގެ ޖަލްސާތައް ބޮއިކަޓުކޮށްފައެވެ. އެގޮތުން މަސީހު މަޖިލީހުގެ ރައީސް ކަމުގެ މަގާމުގައި އިންވެނީ ގާނޫނުތަކާ ހިލާފަށް ކަމަށާއި މަސީހު ރިޔާސަތުގައި އިންނަވައިގެން ކުރިއަށް ގެންދާ ޖަލްސާތަކަކީ ޣައިރު ގާނޫނީ ޖަލްސާތަކެއް ކަމަށް އިދިކޮޅު ފަރާތްތަކުން ތުހުމަތު ކުރެއެވެ. މިއީ އެއަށްފަހުގައި މަޖިލީހުގެ ޖަލްސާތަކުގައި ގުޅިފައިވާ ސިޔާސީ ޕާޓީތަކުން ބައިވެރިވާ ފުރަތަމަ ފަހަރެއެވެ.
މިއަދުގެ ރައްޔިތުންގެ މަޖިލީހުގެ ޖަލްސާއަށް ވަނީ ގިނަ މުހިއްމު ކަންތައްތަކެއް އެޖެންޑާ ކުރެވިފައެވެ. އެގޮތުން އިންތިހާބީ ރައީސް އިބްރާހީމް މުހައްމަދު ސޯލިހު ރައީސުލްޖުމްހޫރިއްޔާކަމުގެ މަގާމުގެ ހުވާ ކުރެއްވުން ބާއްވަންޖެހޭ ރައްޔިތުންގެ މަޖިލީހުގެ ޖަލްސާ ބާއްވާނެ ދުވަސް ކަނޑައެޅުމަށް އެޖެންޑާކޮށްފައި ވެއެވެ.
މީގެ އިތުރުން ކުރީގެ ރައީސް މުހައްމަދު ނަޝީދުގެ މައްޗަށް ކޮށްފައިވާ ހުކުމް ބާތިލު ކުރުމާއި، އދ. ގެ ނިންމުންތައް ތަންފީޒު ކުރުމަށް އިލްތިމާސްކޮށް ރައްޔިތުންގެ މަޖިލީހުގެ ގަވާއިދުގެ 142 ވަނަ މާއްދާގެ ދަށުން ހުށަހަޅުއްވާފައިވާ ޤަރާރު އިއްވުމެވެ.
ހަމަ އެހެންމެ،ރައްޔިތުންގެ މަޖިލީހުގެ މެމްބަރުންގެ ގޮނޑި ގެއްލޭ ގޮތަށް މިދިޔަ އަހަރު ފާސްކޮށްފައިވާ އެންޓި ޑިފެކްޝަން ގާނޫނު އުވާލުމަށް ވިލުފުށި ދާއިރާގެ މެމްބަރު ރިޔާޒު ރަޝީދު ހުށަހަޅުއްވާފައިވާ ބިލު ހިމެނޭއިރު، އަބުރު ރައްކާތެރިކޮށްދިނުމާއި ހިޔާލު ފާޅުކުރުމުގެ މިނިވަންކަމުގެ ގާނޫނު އުވާލުމަށް ރައްޔިތުންގެ މަޖިލީހުގެ ކުރީގެ ރައީސް އަދި ހެންވޭރު އުތުރު ދާއިރާގެ މެމްބަރު އަބްދުﷲ ޝާހިދު ހުށަހަޅުއްވާފައިވާ ބިލް ވެސް ހިމެނެއެވެ.
މިއަދުގެ ޖަލްސާގައި އިންތިޚާބީ ރައީސް އިބްރާހިމް މުހައްމަދު ސޯލިހް އާއި އިންތިޚާބީ ނައިބު ރައީސް ފައިސަލް ނަސީމް ބައިވެރިވެވަޑައިގަންނަވަ އެވެ.