އިންތިހާބީ ރައީސް އިބްރާހީމް މުހައްމަދު ސޯލިހު އާއި އިންތިހާބީ ނާއިބު ރައީސް ފައިސަލް ނަސީމު ހުވާކުރުމަށް ބާއްވަންޖެހޭ ރައްޔިތުންގެ މަޖިލީހުގެ ޖަލްސާ ނޮވެމްބަރު 11 ގައި ބޭއްވުމަށް ގާނޫނީ އެއްވެސް ހުރަހެއް ނެތް ކަމަށާއި އަދި އެކަމުގައި ބަހުސް ކުރަންވީ ކަމެއް ނެތް ކަމަށް ރައްޔިތުންގެ މަޖިލީހުގެ މާމިގިލީ ދާއިރާގެ މެމްބަރު އަދި ޖުމްހޫރީ ޕާޓީގެ ލީޑަރ ގާސިމް އިބްރާހީމް ވިދާޅުވެއްޖެ އެވެ.
މިއަދުގެ ރައްޔިތުންގެ މަޖިލީހުގެ ޖަލްސާގައި އިންތިހާބީ ރައީސް އާއި އިންތިހާބީ ނާއިބު ރައީސް ހުވާކުރުމަށް ބާއްވަންޖެހޭ ޖަލްސާ ބާއްވާނެ ދުވަހެއް ކަނޑައެޅުމަށްޓަކައި ހުށަހަޅާފައިވާ މައްސަލައިގައި ވާހަކަ ދައްކަވަމުން ގާސިމް ވިދާޅުވީ އިންތިހާބު ކުރެވޭ ރައީސްގެ ދައުރު ފެށޭ ދުވަހަކީ ނޮވެމްބަރު މަހުގެ 11 ގައި ކަން ގާނޫނުއަސާސީން އެނގޭ ކަމަށެވެ. ރައީސަކު އިންތިހާބު ކުރަންޖެހޭ ހުރިހާ ކަމެއް ނޮވެމްބަރު 10ގެ ކުރިން ނިންމަން ޖެހޭ ކަމަށް އެމަނިކުފާނު ވަނީ ވިދާޅުވެފައެވެ. ގާނޫނުއަސާސީގެ ރޫހަކީ ވެސް އެއީ ކަމަށް ގާސިމް ވިދާޅުވި އެވެ.
ގާސިމް ވިދާޅުވީ ރައީސުލްޖުމްހޫރިއްޔާ އާއި ރައީސުލްޖުމްހޫރިއްޔާގެ ނައިބު، ދައުރުގެ މެދުތެރެއިން އިސްތިއުފާ ދެއްވައިފިނަމަ، ނުވަތަ ދައުރު ފުރިހަމަ ނުކުރައްވާ އިސްތިއުފާ ދެއްވައިފިނަމަ، ދެން ރައީސުލްޖުމްހޫރިއްޔާ ކަމުގެ ޒިންމާ ރައްޔިތުންގެ މަޖިލީހުގެ ރައީސް ނަންގަވާ، ދެ މަސް ދުވަހުގެ ތެރޭގައި އިންތިހާބެއް ބާއްވަން ޖެހޭ ކަމަށެވެ. އަދި އެ އިންތިހާބުވި މީހަކު ވެރިކަމުގައި ހުންނަވަނީ އެ ދައުރު ނިމެންދެން ކަމަށާއި އޭނާއަށް ފަސް އަހަރު ފުރިހަމަ ކުރަން ލިބިގެން ނުދާނެ ކަމަށްވެސް ގާސިމް ވިދާޅުވި އެވެ.
މިއަދުގެ ޖަލްސާގައި ވާހަކަ ދައްކަވަމުން އިންތިޚާބީ ރައީސް އިބްރާހީމް މުހައްމަދު ސޯލިހް ވިދާޅުވީ، މިކަމާ ގުޅޭގޮތުން އިންތިޚާބީ ރައީސްގެ ހައިސިއްޔަތުން ވާހަކަ ދައްކަވަން ދަތިވެވަޑައިގަންނަވާ ކަމަށެވެ. ނަމަވެސް މިއީ ރައްޔިތުންގެ މަޖިލީހުން ގޮތެއް ކަނޑައަޅާ، ފަހުން އޭގެ އިތުރު ބަހުސަކަށް ދާންޖެހުމުގެ ފުރުސަތެއް ދީގެން ނުވާނެ ކަމެއް ކަމަށް އެމަނިކުފާނު ވިދާޅުވިއެވެ.