ފްލައިމީގެ ދަތުރުތައް އައްޑޫއަށް އަންނަ މަހު 15 ގައި ފެށުމަށް ވިލާ އެއާއިން ދަނީ ތައްޔާރުވަމުންނެވެ.
އައްޑޫއަށް ދަތުރުފަށާ ތާރީޚުގައި ފުވައްމުލަކަށް ވެސް ފްލައިމީގެ ދަތުރުތައް ފަށާ ގޮތަށް ވަނީ ހަމަޖެހިފައެވެ.
ފްލައިމީގެ ދަތުރުތައް މީގެ ކުރިން އައްޑޫ އަދި ފުވައްމުލަކަށް ކުރަމުން ދިޔައިރު އަގުތަކަށް ހެޔޮ ބަދަލެއް އައިސް ދަތުރުފަތުރު ކުރުމަށް މި ދެ އަތޮޅުގެ ރައްޔިތުންނަށް ގިނަގުނަ ފަސޭހަތަކެއް ލިބިގެންދިޔައެވެ. ފްލައިމީގެ ދަތުރުތަކުގެ އަގާއި، އެފަރާތުން ދޭ ޚިދުމަތް ވެގެން ދިޔައީ ރައްޔިތުން ނުހަނު ޝުކުރުވެރިކަމާއެކު ބަލައިގަތް ޚިދުމަތްތަކަކަށެވެ.
ފްލައިމީގެ ދަތުރުތައް ހުއްޓުމާއެކު އައްޑޫ އަދި ފުވައްމުލަކަށް ދަތުރުކުރާ ހަމައެކަނި އެއާލައިނަށް ގައުމީ އެއާލައިން މޯލްޑިވިއަން އޮތީވެފައެވެ. ވާދަވެރި އެހެން އެއާލައިނެއް ނެތުމުގެ ސަބަބުން އަގު ކިތަންމެ ބޮޑުވި ކަމުގައި ވިޔަސް އިތުރު ޗޮއިސްއެއް ނެތުމުން ރައްޔިތުންގެ ޝަކުވާ ގިނަވިޔަސް ދަތުރުކުރުން ނޫން ގޮތެއްނެތި ދިޔަ ދުވަސްތަކަށް އަނެއްކާވެސް މިއޮތީ ނިމުމެއް އަންނަން ގާތްވެފައެވެ.
ފްލައިމީގެ ދަތުރުތައް ފެށުމަށްޓަކާ ގްރައުންޑް އޮޕަރޭޝަންސް އެސިސްޓެންޓުން ހޯދުމަށް ވަނީ އިއުލާން ކޮށްފައެވެ. ޝައުޤުވެރިވާ ފަރާތްތަކުން ނޮވެމްބަރު މަހުގެ 1 ވަނަ ދުވަހުގެ 16:00 ގެ ކުރިން ފޯމާއެކު ބޭނުންވާ ލިޔެކިޔުންތައް ހުށަހެޅުމަށް ފްލައިމީން ވަނީ އެދިފައެވެ.
