ކުރީގެ ރައީސް މުހައްމަދު ނަޝީދުގެ މައްޗަށް އިއްވާފައިވާ 13 އަހަރުގެ ޖަލު ހުކުމް ރިވިއު ކުރަން ޕްރޮސިކިއުޓާ ޖެނަރަލް، ޕީޖީގެ ފަރާތުން ސުޕްރީމް ކޯޓަށް މިއަދު ހުށަހަޅައިފި އެވެ.
ކުރިމިނަލް ކޯޓުން ރައީސް ނަޝީދުގެ މައްޗަށް އިއްވި ޖަލު ހުކުމް ދައުލަތުން ވަނީ ހައިކޯޓުގައި އިސްތިއުނާފު ކޮށްފައެވެ. އެ ކޯޓުން ވަނީ އެ ހުކުމް ރަނގަޅު ކަމަށް ނިންމާފަ އެވެ. އޭގެފަހުން މައްސަލަ ސުޕްރީމް ކޯޓަށް ހުށަހެޅީ ވެސް ދައުލަތުންނެވެ. އެ މައްސަލާގައި ސުޕްރީމް ކޯޓުން ވަނީ 13 އަހަރުގެ ޖަލު ހުކުމް ރަނގަޅު ކަމަށް ބުނެ އެއީ ނިހާއީ ހުކުމެއްގެ ގޮތުގައި ކަނޑައަޅާފަ އެވެ.
އެހެން ނަމަވެސް ރައީސް ނަޝީދުގެ ފަރާތުން އިސްތިއުނާފުގެ ހައްގުގެ ބޭނުން ހިފާފައެއް ނުވެ އެވެ.
އަންނަ ނޮވެމްބަރު މަހުގެ އެއްވަނަ ދުވަހު ރައީސް ނަޝީދު ވަނީ ރާއްޖެ ވަޑައިގެންނެވުމަށް ނިންމަވާފައެވެ. ބައެއް ފަރާތްތަކުން ދިޔައީ ހުކުމް ރިވިއު ކުރަން ސުޕްރީމް ކޯޓަށް ހުށަހަޅަން ރައީސް ނަޝީދަށް ގޮވާލައްވަމުންނެވެ. ރައީސް ނަޝީދަށް ތާއިދު ކުރާ ފަރާތްތަކުން ދިޔައީ އެ މައްސަލަ ރިވިއުއަށް ހުށަހަޅަން ޖެހޭނީ ދައުލަތުން ކަމަށް ވެސް ބުނަމުންނެވެ.