އިނގިރޭސި ޕްރިމިއާ ލީގުގައި ރޭ ކުޅުނު މެޗުތަކުން ޗެލްސީ އާއި މެންޗެސްޓަރ ޔުނައިޓެޑް މޮޅުވިއިރު ކްރިސްޓަލް ޕެލަސް އާ ދެކޮޅަށް އާސެނަލް ކުޅުނު މެޗުން އެއްވަރުވެ އެޓީމުގެ މޮޅުވުމުގެ ސިލްސިލާ ނިމުމަކަށް އަތުވެއްޖެއެވެ.
ރަށުން ބޭރުގައި ބާންލީ އަތުން 4-0 އިން ޗެލްސީ މޮޅުވިއިރު ޔުނައިޓެޑް ވަނީ 2-1 އިން އަމިއްލަ ދަނޑުގައި އެވަޓަން ބަލިކޮށްފައެވެ. ޕެލަސްގެ ދަނޑުގައި އާސެނަލް ކުޅުނު މެޗު ނިމުނީ 2-2 އިން އެއްވަރުވެގެންނެވެ.
ލީގުގައި ރޭ ކުޅުނު މެޗުތަކަށްފަހު، 24 ޕޮއިންޓާއެކު ޗެލްސީ ދެވަނައަށް ޖެހިލިއިރު ތިންވަނައިގައި އޮތް މެންޗެސްޓަރ ސިޓީ އަށް 9 މެޗުން 23 ޕޮއިންޓް ލިބިފައިވާއިރު، މިރޭ ރަށުންބޭރުގައި ޓޮޓެންހަމް ހޮޓްސްޕާ އަތުން ބަލިނުވެ ފަރުޖައްސާލައިފިނަމަ އެ ޓީމަށް އަލުން އެއްވަނަ އަށް އެރޭނެ އެވެ. ޔުނައިޓެޑް ވަނީ 10 މެޗުން 17 ޕޮއިންޓް ހަމަކޮށް 8 ވަނަ އަށް ޖެހިލައިފައެވެ. ޕެލަސް އަތުން ލިބުނު ޕޮއިންޓާއެކު އާސެނަލް އޮތީ 22 ޕޮއިންޓާއެކު ހަތަރުވަނައިގައެވެ. ޕެލަސް ވަނީ 10 މެޗުން 8 ޕޮއިންޓް ހަމަކޮށް 14 ވަނަ އަށް އަރާފައެވެ.
ބާންލީގެ ދަނޑުގައި ކުޅުނު މެޗުގެ 22 ވަނަ މިނެޓުގައި ޗެލްސީ އަށް ލީޑްނަގައިދިނީ ރޮސް ބާކްލޭ ދިން ރީތި ޕާހަކުން އަލްވާރޯ މޮރާޓާ އެވެ. މިހާފު ނިމުނީ 1-0 އިން ޗެލްސީ ކުރީގައިއޮވެގެންނެވެ.
ދެވަނަ ހާފު ފެށިގެން، 12 ވަރަކަށް މިނެޓުގެތެރޭގައި ބާކްލޭ ވަނީ ޗެލްސީ އަށް ދެލަނޑުގެ ލީޑެއް ނަގައިދީފައެވެ. މިއީ އެޓީމުގެ ފްރާންސް މިޑްފީލްޑަރު އެންގޯލޯ ކާންޓޭ ތަނަވަސްކުރި ފުރުޞަތަކުން އޭނާ ކާމިޔާބުކުރި ގޯލެކެވެ.
އޭގެ ފަސް މިނެޓުފަހުން، ބާކްލޭ ދިން ބޯޅައަކުން ވިލިއަން ވަނީ ނަތީޖާ 3-0 އަށް ބަދަލުކޮށްލާފައެވެ. ޗެލްސީގެ ފަހު ލަނޑު، މެޗުގެ އިތުރުވަގުތުގެ ދެވަނަ މިނެޓުގައި ޖަހައިދިނީ ރުބެން ލޮފްޓަސް-ޗީކް އެވެ.
އޯލްޑް ޓްރެފޯޑްގައި ރޭ ކުޅުނު މެޗުގައި އެވަޓަން ކޮޅަށް ޔުނައިޓެޑްގެ ފުރަތަމަ ގޯލް ވައްދާލީ ފްރާންސްގެ މިޑްފީލްޑަރު ޕައުލް ޕޮގްބާ އެވެ. މިއީ މެޗުގެ 27 ވަނަ މިނެޓުގައި ޔުނައިޓެޑްގެ އެންތަނީ މާޝިއަލް އަށް އެވަޓަންގެ ކުޅުންތެރިއަކު ކުރި ފައުލަކަށް ރެފްރީ ދިން ޕެނަލްޓީއަކުން ޕޮގްބާ ފޮނުވާލި ބޯޅަ އެވަޓަންގެ ގޯލްކީޕަރު ޖޯޑަން ޕިކްފޯޑް މަތަކުރުމުން ރީބައުންސްގައި ފޮނުވާލައިގެން ޕޮގްބާ ކާމިޔާބުކުރި ގޯލެކެވެ. މިހާފުގައި ދެޓީމުގެ ފަރާތުން އިތުރުން ގޯލެއް ފެނިގެންގޮސްފައިނުވާއިރު އެވަޓަން އަށް ވަނީ އެއްވަރުކުރުމަށް ރަނގަޅު ފުރުޞަތުތަކެއްލިބި ބޭކާރުވެފައެވެ.
މިމެޗުގެ ދެވަނަ ހާފު ފެށިގެން ހަތަރުވަނަ މިނެޓުގައި އެވަޓަންގެ ޕެނަލްޓީއޭރިޔާބޭރުން ފޮނުވާލި ރީތި ހަމަލާއަކުން ޔުނައިޓެޑްގެ މާޝިއަލް ވަނީ އެޓީމަށް ދެލަނޑުގެ ލީޑެއްނަގައިދީފައެވެ.
މެޗުގެ ފުރިހަމަ ވަގުތު ހަމަވާން 13 މިނެޓަށްވެފައިވަނިކޮށް، އެވަޓަންގެ ހަމައެކަނި ލަނޑު ޖަހައިދިނީ ލިބުނު ޕެނަލްޓީއަކުން ގިލްފީ ސިގަޑްސަން އެވެ. މިއީ އެޓީމުގެ ރިޗާލިސަން އަށް ޔުނައިޓެޑްގެ ކްރިސް ސްމޯލިން ކުރި ފައުލަކަށް ރެފްރީ ދިން ޕެނަލްޓީއެކެވެ.
މިމުބާރާތުގައި ރޭ ކުޅުނު އަނެއް މެޗުގައި، ޕެލަސްގެ ސެލްހާސްޓް ޕާކްގައި ކުޅެ އާސެނަލް އެއްވަރުވި މެޗުގައި ކުރީން ލީޑް ނެގީ ވެސް ޕެލަސް އިންނެވެ. ފުރަތަމަ ހާފުގެ އިތުރުވަގުތުގައި ލިބުނު ޕެނަލްޓީއަކުން މިލަނޑު އެޓީމަށް ޖަހައިދިނީ ކެޕްޓަން ލޫކާ މިލިވޯޔެވިޗް އެވެ. މިއީ އެޓިމުގެ ޝިކު ކުޔާޓޭ އަށް އާސެނަލްގެ ޝްކޮޑްރަން މުސްތާފީ ކުރި ފައުލަކަށް ރެފްރީ ދިން ޕެނަލްޓީއެކެވެ.
މިމެޗުގެ ދެވަނަ ހާފު ފެށިގެން ހަވަނަ މިނެޓުގައި އާސެނަލް އަށް ނަތީޖާ ހަމަހަމަކޮށްދިނީ ހިލޭޖެހުމަކުން ފޮނުވާލި ރީތި ބޯޅައަކުން ގްރެނިޓް ޒާކާ އެވެ. އޭގެ ފަސް މިނެޓުފަހުން، އާސެނަލަށް ފުރަތަމަ ފަހަރަށް ލީޑް ނަގައިދިނީ ޕިއޭރް-އެމެރިކް އޯބާމަޔަން އެވެ.
މެޗު ނިމެން ހަތް މިނެޓަށްވެފައިވަނިކޮށް ޕެލަސްގެ ވިލްފްރައިޑް ޒާހާ އަށް އާސެނަލްގެ ޒާކާ ކުރި ފައުލަކަށް ރެފްރީ ދިން ޕެނަލްޓީ، ގޯލްގެ ތެރެއަށް ވައްދާލައިގެން ޕެލަސް އަށް ދެވަނަ ފަހަރަށް އެއްވަރުކޮށްދިނީ ވެސް މިލިވޯޔެވިޗް އެވެ.