އަތޮޅު ތެރޭގައި ފުރަތަމަ ފަހަރަށް ކުރެވުނު ހުޅު ބަދަލުކުރުމުގެ އޮޕަރޭޝަން ހިތަދޫ ރީޖަނަލް ހޮސްޕިޓަލްގައި މިއަދު ކާމިޔާބު ކަމާއެކުކޮށް ނިންމާލައިފިއެވެ.
އޮޕަރޭޝަނަށްފަހު ނޫސްވެރިންނާއި ބައްދަލު ކުރައްވައި ޑރ. މުޒްނީ ވިދާޅުވީ މި އޮޕަރޭޝަނަކީ ޑރ. ފައިސަލް އަދި ޑޮކްޓަރު ހަބީބްގެ އެހީތެރިކަމާއި އެކު ކުރިއަށް ގެންދިޔަ އޮޕަރޭޝަނެއްކަމަށެވެ. މީގެ އިތުރުން އައިޖީއެމްއެޗްގައި ޕިޒިކަލް ރިހެބިލިޓޭޝަން ސްޕެޝަލިސްޓު ޢަބްދުﷲ ރާފިއު ބައިވެރިވިއެވެ.
2:30 މިނިޓަށް ދިގުދެމިގެންދިޔަ މި ކާމިޔާބު އޮޮޕަރޭޝަނަށް ފަހު މާދަމާ ޕޭޝަންޓް ހިނގުވާނެ ކަމަށް މުޒްނީ ވިދާޅުވިއެވެ.
މުޒްނީ ވިދާޅުވީ މިއޮޕަރޭޝަނަޑް ބައެއް އާލާތްތައް މާލެއިން ގެންނަން ޖެހުނު ކަމަށެވެ. އަދި މިއީ އޮޕަރޭޝަން ކުރުމަށް ދިމާވި ގޮންޖެހުމެއްކަމަށް މުޒްނީ ވިދާޅުވިއެވެ. ނަމަވެސް ދުނިޔޭގެ ގިނަ ބޮޑެތި ގައުމުތަކުގައި ވެސް މިކަން މިގޮތަށް ކުރިޔަށް ގެންދާ ކަމަށް ވެސް އޭނާ ވިދާޅުވިއެވެ.
އައްޑޫގައި ހުޅުގެ އޮޕަރޭޝަންތައް ކުރަން ޖެހިފައިވާ ގިނަ ފަރާތްތަކެއް ތިބި ކަމަށް މުޒްނީ ވިދާޅުވިއެވެ. އެހެންވެ މަހަކު އެއް ފަހަރު ހިތަދޫ ރީޖަނަލް ހޮސްޕިޓަލްގައި އެފަދަ އޮޕަރޭޝަންތައް ކުރިއަށް ގެންދަން ނިންމަވާފައިވާކަމަށް މުޒްނީ ވިދާޅުވިއެވެ. އަދި އެގޮތަށް ކުރިއަށް ހުރި ދުވަސްތަކުގައި މަހަކު ދެތިން އޮޕަރޭޝަންވެސް ކުރެވޭނެ ކަމަށް އޭނާ ވިދާޅުވިއެވެ.
ރާއްޖޭގައި މިހާރު ތިއްބެވި ދިވެހި ކަށީގެ ޑޮކްޓަރުންގެ ތެރޭގައި ގިނައިން ތިއްބެވީ އައްޑޫ ސިޓީއަށް ނިސްބަތްވާ ޑޮކްޓަރުންނެވެ. އެހެން ކަމުން އެބޭފުޅުންގެ އިސްނެންގެވުމުގެ މަތިން މާލެ ފިޔަވާ އަތޮޅު ތެރޭގައި އެންމެ ފުރަތަމަ ހުޅު ބަދަލުކުރެވުނު އޮޕަރޭޝަން އައްޑޫ ސިޓީގައި ކުރެއްވުމަށް ނިންމެވި ކަމަށް ވެސް މުޒްނީ ވިދާޅުވިއެެވެ. މުސްތަޤްބަލުގައި ރާއްޖޭގެ އެކި ހިސާބުތަކުގެ ރީޖަނަލް ހޮސްޕިޓަލް ތަކުގައި މި އޮޕަރޭޝަން ކުރެއްވުމަށް ނިންމަވާފައިވާ ކަމަށް ވެސް ޑރ. މުޒްނީ ވިދާޅުވިއެވެ. އައްޑޫ އަށްފަހު އަންނަމަހު ގދ. ތިނަދޫގައި ވެސް ހުޅު ބަދަލުކުރުމުގެ އޮޕަރޭޝަނެއް ކުރެއްވުމަށް ތައްޔާރުވަމުންދާ ކަމަށް އޭނާ ވިދާޅުވިއެވެ.
ޑރ. ހަބީބް ވިދާޅުވީ އަލަށް ހުޅުވޭ ހޮސްޕިޓަލް ވެގެންދާނީ ދިވެހިރާއްޖޭގައި އެންމެ ފުޅާކޮށް ކަށީގެ މައްސަލަތަކަށް ޚާއްސަކުރެ ވޭ ހޮސްޕިޓަލަށް ކަމަށެވެ. އެގޮތުން ރާއްޖޭގެ އެކި ކަންކޮޅުތަކުން މިޚިދުމަތް ލިބިގަންނަން އައްޑޫއަށް އައުމަށް މަގުފަހިވެގެންދާނެ ކަމަށް ވެސް ހަބީބް ވިދާޅުވިއެވެ.
ހުޅު ބަދަލު ކުރުމުގެ އިތުރުން މުސްތަޤްބަލްގައި ހިތަދޫ ރީޖަނަލް ހޮސްޕިޓަލްގައި ކަށީގެ ތަފާތު އޮޕަރޭޝަން ތަކާއި، މައިބަދައިގެ އޮޕަރޭޝަނުގެ އިތުރުން ލިގަމެންޓްގެ އޮޕަރޭޝަން ތަކަކީ ވެސް ކުރެވިދާނެ އޮޕަރޭޝަންތައް ކަމަށް ޑރ. މުޒްނީ ވިދާޅުވިއެވެ.
ހިތަދޫ ރީޖަނަލް ހޮސްޕިޓަލުގައި މިފަދަ ފުރުސަތުތައް ފަހިވެގެން ދިޔުމަކީ ބޭނުންވެފައިވާ ރައްޔިތުންނަށް ނުހަނު ހިތްހަމަޖެހުމާއި އުފާވެރިކަން ގެނެސްދޭނެ ޚަބަރެއްކަން ޔަގީނެވެ.