ރައްޔިތުންގެ މަޖިލީހުގެ ޗެމްބަރަށް ފެން ލީކްވަމުންދާތީވެ، މިއަދު ހެނދުނު 9:00 ގައި ފެށުމަށް ތާވަލްކޮށްފައިވާ ރައްޔިތުންގެ މަޖިލީހުގެ ތިން ވަނަ ދައުރުގެ ތިން ވަނަ ޖަލްސާ ފެށުން ލަސްވެއްޖެ އެވެ.
އޮފިޝަލަކާއި ހަވާލާދެއްވާ ރާއްޖެއެމްވީ އިން ރިޕޯޓް ކޮށްފައިވާ ގޮތުގައި ފެން ލީކްވުމުގެ މައްސަލަ ދަނީ ހައްލު ކުރަމުންނެވެ.
މިއަދުގެ ޖަލްސާއަށް އެޖެންޑާކޮށްފައިވަނީ އޮޑިޓަރ ޖެނެރަލް އޮފީހުގެ އަންނަ އަހަރުގެ ބަޖެޓާއި، ރައްޔިތުންގެ މަޖިލީހުގެ ގަވާއިދަށް ގެންނަ ބަދަލެއް ފާސްކުރުމެވެ.
ޕާކިސްތާނުގެ ސަރުކާރުގެ އެހީގައި އިމާރާތްކޮށްފައިވާ މަޖިލީހުގެ އިމާރާތުން ފެން ލީކްވުމާއި ކަރަންޓްގެ މައްސަލަ ދޭތެރެ ދޭތެރެއިން ދިމާވެ އެވެ.
މިއަދު މަޖިލީހުގެ އިދާރާއަށް ފެންލީކްވަމުން ދަނީ، ރޭ މެންދަމުން ފެށިގެން މެދުކެނޑުމެއް ނެތީ މާލެ އަށް ބޯކޮށް ވާރޭ ވެމުންދާތީ އެވެ. ރާއްޖޭގެ ބޮޑު ބަޔަކަށް މިދުވަސްވަރު ވަނީ މޫސުމް ގޯސްވެފައެވެ. މާލެއެކޭ އެއްގޮތަށް ގިނަ ރަށްރަށުގައި ވެސް ވަނީ ހިނގާބިނގާ ނޫޅެވޭ ވަރަށް ފެންބޮޑުވެފައެވެ.