މޯލްޑިވްސް މީޑިއާ ކައުންސިލަށް ކުރިމަތިލުމަށް ހުޅުވާލައިފިއެވެ.
މި ފުރުސަތު ހުޅުވާލާފައި ވަނީ ހޯމް މިނިސްޓްރީން ކޮށްފައިވާ އިއުލާނެއްގައެވެ. އެ އިއުލާނުގައި ބުނެފައިވަނީ މީޑިއާ ކައުންސިލުގެ ޤާނޫނުގެ ދަށުން އެކުލަވާލެވިފައިވާ މީޑިއާ ކައުންސިލްގެ މިދައުރުގެ މެންބަރެއްގެ މުއްދަތު އޮގަސްޓު 27ގެ ނިޔަލަށް ހަމަވެފައިވާ ކަމަށެވެ. އަދި މި ދައުރުގެ 13 މެންބަރުންގެ މުއްދަތު މިއަހަރުގެ ޑިސެންބަރު 12 ގެ ނިޔަލަށް ހަމަވާތީ އެ ކައުންސިލަށް މެންބަރުން އައްޔަންކުރުމަށް ބޭނުންވާ ކަމަށެވެ. ޖުލްމަ 15 މެންބަރުން ތިބޭ އިރު އެއް މެންބަރެއްގެ ދައުރު ހަމަވާނީ ފެބްރުއަރީ މަހުއެވެ.
ހޯމް މިނިސްޓްރީން ބުނީ މީޑިއާ ކައުންސިލްގެ މަގާމުތަކަށް އެދޭ ފަރާތްތަކުން ފޮޓޯ އާއި ވަނަވަރު، އައިޑެންޓިޓީ ކާޑުގެ ކޮޕީ އާއި، ތަޢުލީމީ ފެންވަރު އަންގައިދޭ ލިޔުންތަކުގެ ކޮޕީ އާއި ކުށުގެ ރެކޯޑްގެ ކޮޕީއަކާ އެކު އެމިނިސްޓްރީ އަށް ސިޓީއަކުން ހުށަހެޅުމަށް އެދޭ ކަމަށެވެ. އަދި މީޑިއާގެ އަށް ގޮޑިއަށް ކެންޑިޑޭޓުން ހުށައަޅާނީ މީޑިއާތަކުން ކަމަށާއި، އެ ގޮތުން ކެންޑިޑޭޓުން ހުށައަޅާ ކޮންމެ މީޑިއާއަކުން ވެސް އެ މީޑިއާއަކުން ހުށައަޅާ ކެންޑިޑޭޓްގެ ވަނަވަރު އެނގޭ ގޮތަށް ހުށަހަޅަން ޖެހޭ ކަމަށް ވެސް ހޯމް މިނިސްޓްރީން މައުލޫމާތު ދެއެވެ.
މީޑިއާ ކައުންސިލްގައި މީޑިއާގެ އަށް މެންބަރުންނާއި އާންމުންގެ ހަތް މެންބަރުން ހިމެނެއެވެ. އާންމު މެންބަރުންގެ ގޮތުގައި ބަލާނީ މީޑިއާގައި މަސައްކަތް ނުކުރާ ފަރާތްތަކެވެ. ކައުންސިލުގެ މެންބަރުންގެ މުއްދަތަކީ މީލާދީ ދެ އަހަރެވެ. އަދި އެއްވެސް ފަރާތަކަށް ކައުންސިލުގެ މެންބަރުކަމުގައި ވިދިވިދިގެން ދެ ދައުރު އަދައެއް ނުކުރެވޭނެއެވެ. މީޑިއާ ކައުންސިލްގެ މެންބަރުންނަށް މަހަކު 5،000ރ. ގެ އެލަވަންސްއެއް ދޭ އިރު ގަވާއިދުގައިވާ ގޮތުން ކައުންސިލުން ބާއްވަންޖެހެނީ މަހަކު މަދުވެގެން އެއް ބައްދަލުވުމެވެ. މިހާރު އޮތް މީޑިއާ ކައުންސިލުން ހަފުތާއަކު ޖަލްސާއެއް ބޭއްވި ނަމަވެސް އިތުރު އެވެސް އެލަވަންސެއް ނުލިބެއެވެ.
މީޑިއާ ކައުންސިލްގެ މަގާމުތަކަށް އެދޭ ފަރާތްތަކުން 07 ނޮވެމްބަރު ވާ ބުދަ ދުވަހުގެ 14:00 ގެ ކުރިން އިއުލާނުގައި ބުނެފައިވާ ލިޔުންތަކާއެކު ހޯމް މިނިސްޓްރީއަށް ސިޓީއަކުން ހުށަހަޅަންޖެހެއެވެ.