ރާއްޖޭގެ ބައެއް ރައްޔިތުން ނުހައްގު ގޮތުގައި މުއްސަނދިވެފައިވާ މައްސަލަތައް ބެލުމަށް ރައްޔިތުންގެ މަޖިލީހުގެ ފޭދޫ ދާއިރާގެ މެންބަރު އިބްރާހީމް ދީދީ ގޮވާލައްވައިފިއެވެ.
އިބްރާހީމް ދީދީ މިކަމަށް ގޮވާލެއްވީ ރައްޔިތުންގެ މަޖިލީހުގައި އޮޑިޓަ ޖެނެރަލް އޮފީހުގެ އަންނަ އަހަރަށް ކަނޑައަޅާފައިވާ ބަޖެޓު، ކޮމިޓީން ދިރާސާކޮށް ނިންމި ގޮތުގެ ރިޕޯޓަށް ބަހުސް ކުރުމުގެ މަރުހަލާގައި ވާހަކަދައްކަވަމުންނެވެ.
އިބްރާހީމް ދީދީ ދެއްކެވި ވާހަކައިގާ ވިދާޅުވީ އޮޑިޓް ކުރަންވީ ހަމައެކަނި ދައުލަތުގެ އިދާރާތައް އެކަނި ނޫން ކަމަށެވެ. ރައްޔިތުންގެ މަޖިލީހުގެ މެންބަރުންނާއި، ނުހައްގުން މުއްސަނދިވާ މީހުންގެ މައްސަލަތައް ވެސް ބަލައި، ފިޔަވަޅު އަޅަންޖެހޭ ކަމަށެވެ.
އިބްރާހީމް ދީދީ ވިދާޅުވީ ރާއްޖޭގައި ހިންގާފައިވާ ބޮޑެތި ބިޔަ މަޝްރޫއުތައް ހިންގާފައިވަނީ ކޮރަޕްޝަނަށް މަގުފަހިވާ ގޮތަށް ކަމަށް ބުނެ އެކަން ބެލުމަށް ބައެއް ފަރާތްތަކުން ގޮވާލަމުންދާކަމަށެވެ. އެގޮތުން ބަލަން ޖެހޭނީ ވަކި ބައެއްގެ މައްސަލަތައް އެކަނި ނޫން ކަމަށް ވެސް އިބްރާހީމް ދީދީ ވިދާޅުވިއެވެ.
އަދި ވައްކަމާއި ކޮރަޕްޝަންގެ ވާހަކަތައް މީގެކުރިން ދެއްކި މީހުން، މިއަދު އެކަންކަން ބެލުމަށް އިބްރާހީމް ދީދީ ގޮވާލެއްވިއެވެ. އޮޑިޓް އޮފީހުން ބަލަންޖެހޭ މައްސަލަތަކުގެ ތެރޭގައި ރައްޔިތުންގެ މަޖިލީހުގެ ޖަލްސާތަކުގައި ބައިވެރިވެ ވަޑައިނުގެން، މެންބަރުން މުސާރަ ނަންގަވާ މައްސަލަވެސް ހިމެނޭ ކަމަށް އިބްރާހީމް ދީދީ ވިދާޅުވިއެވެ.