އޮކްޓޯބަރުމަހުގެ 6 ވަނަ ދުވަހުގެ ރޭ މަރަދޫފޭދޫ ބޮޑުމަގުގައި ހިންގި މާރާމާރީއެެއްގައި ސ. މަރަދޫ، ބޯޅަދަނޑިގެ، މުހައްމަދު އީވާނަށް ތޫނު އެއްޗަކުން ހަމަލާދީ ޒަހަމްކޮށްލުމާއި ގުޅިގެން ހައްޔަރުކުރި އެންމެން ދޫކޮށްލައިފިއެވެ.
ފުލުހުންގެ މީޑިއާ އޮފިޝަލާއި ހަވާލާދެއްވާ ރާއްޖެއެމްވީއިން ރިޕޯޓްކޮށްފައިވާ ގޮތުގައި އެ މާރާމާރީއާ ގުޅިގެން ހައްޔަރުކުރި 10 މީހުން ކްރިމިނަލް ކޯޓުން އަންގާރަ ދުވަހު ވަނީ ދޫކޮށްލާފައެވެ. އަދި އެމީހުން ދޫކުރި މައްސަލަ މިހާރު އިސްތިއުނާފު ކުރުމަށް ކޯޓަށް ހުށަހަޅާފައިވާ ކަމަށް ވެސް ފުލުހުން ބުންޏެވެ.
ގުރޫޕަކުން އީވާނަށް ހަމަލާދީފައިވަނީ މަރަދޫފޭދޫ ބޮޑުމަގުގައި ހުންނަ ގަރާޖެެއް ކައިރިންނެވެ. މި މާރާމާރީގައި އީވާންގެ ބުރަކަށްޓަށާއި، ކަރަށް އަދި ބޮލަށް ތޫނު އެއްޗަކުން ހަމަލާދީފައިވާއިރު އޭނާގެ ފުއްޕާމެއަށް ވެސް ބޮޑެތި ގެއްލުންތަކެއް ވަނީ ލިބިފައެވެ.
މިހާދިސާގައި އިވާނުގެ ފުއްޕާމެއަށް ލިބުނު ޒަހަމްތަކާއި ގުޅިގެން އޮކްޓޫބަރ 7 ވަނަ ދުވަހުގެ މާލެ ގެންގޮސް އައިޖީއެމްއެޗްގައި ފަރުވާ ދެމުންދާ އިރު ފުއްޕާމޭގެ އޮޕަރޭޝަނެއްވެސް ވަނީ ކޮށްފައެވެ. މައުލޫމާތު ލިބޭ ގޮތުގައި އަދިވެސް އީވާންގެ ހާލަތު ރަނގަޅެއް ނޫނެވެ.
މި މާރާމާރީއާ ގުޅިގެން 17 އަހަރުގެ ކުޑަ ކުއްޖަކު ހުޅުމީދޫއަށް ދިއުމުން ކޯޓު އަމުރެއްގެ ދަށުން އެ ރަށުން ފުލުހުން ވަނީ އޭނާ ހައްޔަރު ކޮށްފައެވެ. އަދި އަނެއް 5 މީހުން ހައްޔަރު ކޮށްފައިވަނީ ފޭދޫ ގެއެއްގެ ތެރޭގައި ފިލާ ތިއްބާ ކަމަށް ފުލުހުން އޭރު ވަނީ ބުނެފައެވެ.
މި މާރާމާރީއަށް ފަހު މާލެ އާއި އައްޑޫގައި ސިލްސިލާ މާރާމާރީތަކެއް ހިންގައި އިތުރު 4 މީހަކު ޒަހަމްކޮށްލާފައިވެއެވެ.