އިޓާލިއަން ސެރިއޭގައި ރޭ ކުޅުނު މެޗުގެ އެންމެ ފަހު ވަގުުތު ކެޕްޓަން އަލެސިއޯ ރޮމަނޯލީ ކާމިޔާބުކުރި ލަނޑުން ޖެނޯއާ ބަލިކޮށް އޭސީ މިލާން ލީގު ތާވަލްގެ ހަތަރުވަނަ އަށް ޖެހިލައިފިއެވެ. މިމެޗުން މިލާން މޮޅުވީ 1-2 އިންނެވެ.
މިއީ މިދިޔަ އޯގަސްޓް މަހުގެ 19 ވަނަ ދުވަހު ކުޅުމަށް ހަމަޖެހިފައި އޮތް މެޗެކެވެ. މިމެޗު ފަސް ކުރެވުނީ، އޯގަސްޓް މަހުގެ 14 ވީ އަންގާރަ ދުވަހު ޖެނޯއާ އާއި ސަމްޕްޑޯރިއާ ނިސްބަތްވާ ސިޓީގައި ބްރިޖެއް ވެއްޓި ހިނގި ހާދިސާއެއްގައި އެތައް ބަޔަކު މަރުވެފައިވާތީ އެކަމުގެ ހިތާމައިގައެވެ.
މިލާންގެ ސެންސީރޯގައި ކުޅުނު މެޗު ފެށިގެން ހަތަރުވަނަ މިނެޓުގައި އެޓީމަށް ލީޑް ނަގައިދިނީ ސޫސޯ އެވެ. މިއީ ޗެލްސީއިން ލޯން އެއްބަސްވުމެއްގެ ދަށުން މިލާނަށް ބަދަލުވި ފްރާންސްގެ ޑިފެންސިވް މިޑްފީލްޑަރު ޓިމޮއޫ ބަކަޔޯކޯ ތަނަވަސްކުރި ފުރުޞަތަކުން ސޫސޯ ކާމިޔާބުކުރި ގޯލެކެވެ. މިމެޗުގެ ފުރަތަމަ ހާފު ނިމުނީ 1-0 އިން މިލާން ކުރީގައިއޮވެގެންނެވެ.
މެޗުގެ 56 ވަނަ މިނެޓުގައި ޖެނޯއާ އިން ނަތީޖާ ހަމަހަމަކުރިއެވެ. މިއީ މިލާންގެ ޑިފެންޑަރު ރޮމަނޯލީ އަތުން ބައިކޮޅަށްވަން ގޯލެކެވެ.
މިލާނަށް މިމެޗުން ތިން ޕޮއިންޓް ކަށަވަރުކޮށްދިނީވެސް ރޮމަނޯލީ އެވެ. މިމެޗުގެ އިތުރުވަގުތުގެ ފުރަތަމަ މިނެޓުގައި އޭނާ މިލަނޑު ކާމިޔާބުކުރީ ޖެނޯއާގެ ޕެނަލްޓީއޭރިޔާބޭރުން ފޮނުވާލި ހަމަލާއަކުން ގޯލްގެ ކަނާތްފަރާތު މަތީކަނަށް އަމާޒުކޮށްލައިގެންނެވެ.
މި މެޗުން ހޯދީ ތިން ޕޮއިންޓާއެކު މިލާން އޮތީ 10 މެޗުން 18 ޕޮއިންޓް ހަމަކޮށް ހަތަރުވަނައިގައެވެ. ލާޒިއޯ އަށް ވެސް މިއަދަދަށް ޕޮއިންޓް ލިބިފައިވީނަމަވެސް މިލާނަށް ކުރި ލިބެނީ ފައިދާ ގޯލްގެ ތަފާތުންނެވެ. އަދިވެސް އެއްވަނައިގައި އޮތީ 28 ޕޮއިންޓާއެކު އެންމެ ފަހުގެ ޗެމްޕިއަން ޔުވެންޓަސް އެވެ. ދެވަނައިގައި އޮތް އިންޓަ މިލާނާއި ތިންވަނައިގައި އޮތް ނަޕޯލީ އަށް 22 ޕޮއިންޓް ލިބިފައިވާއިރު އިންޓަ އަށް ވެސް ކުރި ލިބެނީ ފައިދާ ގޯލްގެ ތަފާތުންނެވެ.
ލީގުގައި މިލާނަށް ދެން އޮތީ އަންނަ ނޮވެންބަރު މަހުގެ 4 ވަނަ ދުވަހު ރަށުން ބޭރުގައި އުދިނޭޒީ އާ ދެކޮޅަށް ކުޅޭ މެޗެވެ.